Éxodo 11

Tqanil tu'n kykyim qe nej k'wa'lb'aj xinaq

1Tzaj tma'ntl Qman te Moisés: Atx juntl k'ixb'isab'l tu'n ttzaj wu'ne tib'aj Faraón ex kyib'aj aj Egipto. Te tib'ajxi jlu che elex tzoqpi'ne tu'n, ex lajo'n che elexe kykyaqile tu'n. 2Ja'lotzun q'manxa kye aj Israel, tu'n t-xi kyqanin qe xinaq ex qe xu'j qe ti'xti saq pwaq ex q'an pwaq kytx'otx'il kye aj Egipto aqeju kyvesin, chi Qman te Moisés.

3Tu'n Qman b'a'n e e'la qe aj Israel tuj kywitz aj Egipto. Ax ikx te Moisés ma'xix toklen e'la tuj kywitz qeju attoq kyoklen ttxlaj Faraón ex tuj kywitz kykyaqil aj Egipto.

4Xi tma'n Moisés te Faraón: Chi Qmane kyja': Chin ik'ele tmij aq'b'il ja'lo tuj tkyaqil tx'otx' Egipto, 5ex che kymel kykyaqil qe nej k'wa'lb'aj xinaq tuj tkyaqil tx'otx' Egipto; kymel tnejel tky'ajal Faraón in kub' qe' tuj tq'uqb'il, ex kpol b'aj ti'j tnejel tal majen xu'j in che'n ti'j kya'. Ax ikx che kymel kykyaqil qe tnejel kyal alumaj. 6Kjawil nimxix tq'ajq'ajel kywi xjal tuj tkyaqil tx'otx' Egipto. Aju tq'ajq'ajel lu b'ajx b'injtz jun maj ikju ex mlay b'injtztl. 7Atzun kyxol kykyaqil aj Israel mi jun tx'yan kqawil kyi'j xjal ex mi kyi'j alumaj, tu'ntzun tel kynik'e wi'je, aqine Kyman, ex wu'ne pa'maj qe aj Egipto kyi'j qe aj Israel, chi Qmane, chi Moisés. 8Kykyaqil qeju at kyoklen ttxlaja, che pol wuk'ile, che b'el mok'e' nwitze ex ok kyma': Texa tzalu kyuk'ix kykyaqil xjal ate' tuj tkwenta. Tb'ajlenxitzun kyma'n weye ikju, chin elexe, chi Moisés te Faraón.

In q'ojltoq Moisés wen, ex etz twitz Faraón.

9Otoq tzaj tma'n Qman te Moisés: Mlayx che okx b'i'ne tu'n Faraón, tu'ntzun kyb'ant nimku techal wu'ne tuj tx'otx' Egipto, chi Qman.

10B'anttzun kykyaqil techal lu tu'n Moisés ex Aarón twitz Faraón, ex tu'nju otoq kub' tkyuwsa'n Qman tanmi Faraón, minti' e je'tz ttzoqpi'n qe aj Israel tu'n kyetz tuj ttx'otx'.

Currently Selected:

Éxodo 11: MAMNO

Highlight

Copy

Compare