Levitico 27
27
Jini sʌq'uesʌbil tac bʌ ti' tojlel Dios
1-2Lac Yum tsi' sube' Moisés: Yom ma' suben pejtelel jini israelob: Che' an majqui mi' ña'tan i yʌq'ueñon i bʌ, che'ʌch yom mi' mel: 3Mi an junc'al i jabilel c'ʌlʌl ti uxc'al jini winic, yom mi' yʌc' jo'lujunc'al (300) peso. 4Mi x'ixic am bʌ junc'al i jabilel c'ʌlʌl ti uxc'al yom mi' yʌc' lujunc'al (200) peso. 5Che' ja'el mi ch'iton am bʌ jo'p'ejl i jabilel c'ʌlʌl ti junc'al i jabilel, yom mi' yʌc' wʌcc'al (120) peso. Mi xch'oc la' i yʌc' uxc'al (60) peso. 6Pero mi an jax to jump'ejl uw c'ʌlʌl ti jo'p'ejl jab, che' jini mi mejlel i yʌc' lujump'ejl i cha'c'al (30) peso. Mi xch'oc, uts'at mi' yʌc' junc'al peso. 7Pero mi an winic ñumeñix bʌ i jabilel ti uxc'al jab, la' i yʌc' lujump'ejl i jo'c'al (90) peso. Mi x'ixic uts'at mi' yʌc' uxc'al peso. 8Pero mi c'ax p'ump'un jax, che' jini yom mi' pʌjyel majlel ba'an jini motomaj cha'an mi mejlel i ña'tan bajche' mi mejlel i yʌc'. Che' jini an ti' wenta jini motomaj cha'an mi' yʌl bajche c'amel yom mi' yʌc'.
9Che' ja'el mi tsi' yʌc'ʌ i t'an cha'an mi' yʌq'ueñon alʌc'ʌl, wersa mi caj i yʌc'. 10Mach mejlic i q'uex i t'an. Mach mejlic i jem. Mach mejlic ti q'uextʌl uts'at bʌ ti mach bʌ uts'atic. Mi tsa' q'uexle juncojt alʌc'ʌl yic'ot yambʌ alʌc'ʌl, che' jini mux c ch'ʌm ti' cha'cojtlel. 11-12Mi mach sʌquic jini alʌc'ʌl cha'an mi yʌq'ueñon cha'an c majtan, yom mi' pʌjyel majlel ba'an jini motomaj cha'an mi' q'uel bajche' yilal. An ti' wenta jini motomaj cha'an mi' ña'tan bajche' yom i tojol. 13Mi yom mi' cha' ch'ʌm alʌc'ʌl jini winic, la' i yʌc' i tojol. Che' ja'el yom mi' yʌc' i ñumel che' bajche' cha'yajl bʌ i diezmojlel.
14Che' an majqui mi' yʌq'ueñon i yotot, 15mi yom i cha' ch'ʌm, uts'at mi' q'uel jini motomaj cha'an mi' ña'tan bajche' i tojol. Che'ʌch yom mi' yʌc' i tojol jini winic. Yom mi' yʌc' i ñumel ja'el, che' bajche' cha'yajl bʌ i diezmojlel. Che' jini i cha'anix jini otot.
16Che' an winic mu' bʌ i yʌq'ueñon i yalʌ lum, mi mejlel i yʌc' i tojol che' bajche' an i ñuclel, che' bajche' jayp'is mi' cha'len pac'. Mi jump'is i pʌc'ol jini cebada yom ma' c'ajtin jo'lujunc'al peso. 17Mi tsi' yʌq'ueyon i lum che' ujtel to i jabilel la' tijicñʌyel, on yom i tojol. 18Pero mi tsa'ix ñumi i jabilel la' tijicñʌyel, che' jini yom i tojol che' bajche' jayp'ejl to jab yom cha'an i jabilel la' tijicñʌyel. 19Mi yom mi' cha' ch'ʌm i lum jini winic tsa' bʌ i yʌc'ʌ, yom mi' yʌc' i tojol jini lum che' bajche' mi' sub jini motomaj. Yom mi' yʌc' i ñumel ja'el, jiñʌch cha'yajl bʌ i diezmojlel. 20Pero mi mach yomic i cha' ch'ʌm i lum, mi tsa' chojni ti' tojlel yambʌ winic, che' jini ma'anix majch mi mejlel i cha' mʌn. 21Che' ti' jabilel la' tijicñʌyel mi caj cʌq'uentel jini lum. Mi caj i yajñel ti wenta motomajob.
22-23Mi an winic mu' bʌ i yʌc' i lum che' mʌmbil jach i cha'an, che' mach tilemic ti' tat, jini motomaj mi caj i ña'tan jayp'ejl to jab yom c'ʌlʌl ti' jabilel la' tijicñʌyel. Jini winic mi caj i yʌq'ueñon i tojol che' bajche' mi' yʌl jini motomaj. Ch'ujulʌch, c cha'añʌch. 24Che' ti' jabilel la' tijicñʌyel, mi caj i cha' aq'uentel jini ñaxan bʌ i yum. 25Ti pejtelel chuqui tac ma' ñoptʌben i tojol, uts'at ma' toj ti taq'uin am bʌ i c'ʌjñibal la' cha'an.
26Mach mejlic la' cha' aq'ueñon jini ñaxan bʌ i yal tac la' wʌlac' come c cha'añʌch. 27Pero mi mach sʌquic jini alac'ʌl, mi mejlel la' wʌq'ueñon taq'uin cha'an i wentajlel jini la' wʌlac' che' bajche' mi' ña'tan jini motomaj. Yom mi la' wʌc' yic'ot i ñumel, che' bajche' cha'yajl bʌ i diezmojlel. Mi mach la' womic la' cha' ch'ʌm, mi mejlel la' chomben yambʌ winic. 28Pero mach mejlic ti chojñel jini tsa' bʌ la' wʌq'ueyon junyajlel, mi winicob, mi alʌc'ʌl tac, mi lum tac, come ch'ujulʌch, c cha'añʌch. 29Jini winic tsa' bʌ aq'uenti i yorajlel cha'an mi' tsʌnsʌntel mach mejlic i toj i q'uexol ti taq'uin. Wersa mi caj i chʌmel.
30Jini diezmo loq'uem tac bʌ ti la' lum, mi c'uxbil bʌ i wut jam, mi i wut pʌc'ʌbʌl, c cha'añʌch, ch'ujulʌch. 31Mi an juntiquil yom bʌ i cha' mʌn jini diezmo, mi tsepbil bʌ i wut jam, mi i wut pʌc'ʌbʌl, ts'ʌcʌl yom mi' yʌc' i tojol yic'ot i ñumel che' bajche' cha'yajl i diezmojlel. 32Pejtelel i diezmojlel jini wacax, yic'ot tiñʌme', yic'ot pejtelel jini mu' bʌ i tsijquel, c cha'añʌch. 33Mach yomic mi la' ñaxan q'uel mi uts mi jontol. Mach yomic mi la' q'uex. Mi tsa' la' q'uexe, che' jini yom mi la' wʌq'ueñon ti cha'cojtlel jini i q'uexol. Mach mejlic ti mʌñol. Che' tsi' yʌlʌ lac Yum.
34Pejtelel iliyi jiñʌch i mandar lac Yum tsa' bʌ i sube Moisés ya' ti wits i c'aba' Sinaí cha'an mi' cha' subeñob jini israelob.
Currently Selected:
Levitico 27: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
