Levitico 2
2
Jini majtañʌl melbil tac bʌ ti trigo
1Che' an juntiquil yom bʌ i yʌq'ueñon trigo tic majtan, la' i ch'ʌm tilel wen juch'bil bʌ trigo yic'ot olivo aceite yic'ot i pomil. 2La' i yʌq'ueñob i yalobilob Aarón. Juntiquil motomaj mi caj i ch'ʌm junmujch' majtañʌl loq'uem bʌ ya' ba' chajpʌbil cha'an mi' pule' yic'ot pom. Mic mulan ili majtañʌl. 3Jini i colobal jini juch'bil bʌ trigo i cha'anix Aarón yic'ot i yalobilob cha'an i bʌlob i ñʌc'. Pero mic ch'ʌm ti wenta pejtelel jini majtañʌl che' bajche' ch'ujul bʌ c majtan.
4Ba' ora ma' wʌc' waj ti horno cha'an mi' tic'an c majtan, wen juch'bil yom. Yom xajc'ubil yic'ot olivo aceite, pero mach yomic yic'ot levadura. Mi mejlel a wʌq'ueñon galleta ja'el, pero mach yomic yic'ot levadura. Yom ma' bon yic'ot olivo aceite. 5Che' ja'el mi tsa' wʌc'ʌ jini majtañʌl tac ch'ilbil bʌ ti sartén, yom wen juch'bil bʌ harina. Mach yomic che' an levadura. Yom xajc'ubil yic'ot aceite. 6Che' jini yom ma' bic'ti xut'. Aq'uen aceite, come majtañʌlʌch.
7Mi tsa' wʌc'ʌ jini majtañʌl ch'ʌxbil bʌ ti p'ejt, yom wen juch'bil bʌ harina yic'ot olivo aceite. 8Che' jini yom ma' ch'ʌmbeñon tilel pejtelel majtañʌl tac, mi tiq'uesʌbil, mi ch'ilbil. Yom ma' wʌq'uen jini motomaj cha'an mi' yʌq'ueñon ya' ti pulʌntib. 9Jini motomaj mi caj i pul lamital jini majtañʌl cha'an c ña'tʌntel. Mi caj c ch'ʌm ti wenta ti' pejtelel. 10Jini i colobal majtañʌl mu' bʌ i cʌytʌl i cha'anix Aarón yic'ot i yalobilob cha'an mi' c'uxob. Pero ch'ujulʌch c majtan ti pejtelel.
11Mach yomic xʌbʌl yic'ot levadura* mi junchajpic jini majtañʌl mu' bʌ a wʌq'ueñon. Mach yomic che' xʌbʌl ti chab mic pulbentel c majtan. 12Mi mejlel la' wʌq'ueñon yic'ot ñaxan bʌ i wut pʌc'ʌbʌl, pero mach yomic mi la' wʌc' ti' pulʌntib yic'ot xojocña bʌ c majtan. 13Yom ma' wotsʌben i yʌts'mil pejtelel majtañʌl mu' bʌ a wʌq'ueñon, come jini ats'am mi' yʌc' ti' ña'tʌntel jini xuc'ul* bʌ t'an tsa' bʌ cʌq'ueyetla.
14Mi tsa' wʌq'ueyon jini ñaxan bʌ i wut a pʌc'ʌb, yom ma' ch'il ti c'ajc jini yax to bʌ i wut jini trigo. Cujbil yom ja'el. Yom ma' wʌq'ueñon jini juch'bilix bʌ i wut trigo. 15Yom ma' xajc'un ti olivo aceite. Yom ma' wotsʌben jini pom, come majtañʌlʌch. 16Che' jini, jini motomaj mi caj i pul lamital jini juch'bil bʌ trigo. Yom xajc'ubil yic'ot aceite yic'ot jini pom che' ma' wʌq'ueñon.
Currently Selected:
Levitico 2: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
