Exodo 37
37
I melol chuqui mi' c'ʌjñel ti Tabernáculo
(Ex. 25.10-40; 27.1-8; 30.1-10)
1Bezaleel tsi' c'ʌñʌ acaciate' i mel jini Arca. An jump'ejl metro yic'ot junc'al centímetro i tamlel, yic'ot 75 centímetro i xujc, yic'ot 75 centímetro chanlel. 2Tsi' tep'e' ti puro oro ti' pat yic'ot ti' mal, yic'ot ti' pam. Tsi' mele ti oro ja'el i ti'il i xujc ti' joytʌlel. 3Tsi' mele ja'el chʌnxojt tsucu taq'uin melbil bʌ ti oro tsa' bʌ i yʌc'ʌ ti jujunwejl i yoc. An cha'p'ejl ti junwejl yic'ot yambʌ cha'p'ejl ti yambʌ junwejl i xujc. 4Tsi' mele bara tac ja'el melbil bʌ ti te' i c'aba' acacia. Tsi' tep'e ti oro. 5Tsi' jucu tac ochel jini bara ti jujunwejl i xujc Arca ba' xotol tac jini tsucu taq'uin melbil bʌ ti oro cha'an mi mejlel i q'uechob majlel jini Arca. 6Tsi' mele ti oro jini ba' mi' ñusʌbentelob i mul ya' ti' pam jini Arca. I tamlel jiñʌch jump'ejl metro yic'ot 25 centímetro. I xujc jiñʌch 75 centímetro. 7Ti' jujunwejl ba' mi' ñusʌbentelob i mul tsi' yʌc'ʌ i yejtal ángelob, melbil bʌ ti puro oro. Jats'bil ti martillo. 8Tsi' yʌc'ʌ i yejtal ángelob ti jujunwejl. Jini i yejtal ángelob ya' jach tem tsuyul ya' ti' majc jini Arca ba' mi' ñusʌntel mulil. 9Jini ángelob tich'bil i wich' ya' ti' pam jini Arca. Jini i wutob mi' laja q'uelob i bʌ. Che' ja'el lajal mi' q'uelob ya' ba' mi' ñusʌntel mulil.
10Tsi' mele jump'ejl mesa ti te' i c'aba' acacia. Jump'ejl metro i tamlel. Ojlil metro i xujc. I chanlel 75 centímetro. 11Tsi' tep'e ti puro oro. Tsi' melbe i ch'ʌjlil ti oro ti' joytʌlel i ti'il i xujc tac. 12Tsi' mele ja'el i ch'ʌjlil ti oro ti' joytʌlel i xujc tac. I weltʌlel jiñʌch che' bajche' jump'ejl pach'c'ʌb. Ya' ti' ti'il tsi' cha' aq'ue yambʌ i ch'ʌjlil ts'ita' ch'och'oquix bʌ ti puro oro ja'el. Bulu tselel tsi' melbe i ch'ʌjlil i ti'il jini i xujc. 13Tsi' mele ja'el chʌnxojt tsucu taq'uin ti oro. Tsi' yʌc'ʌ ya' ti jujunwejl i xujc jini mesa. An jujump'ejl ti jujunts'ijt i yoc jini mesa. 14Jini xotol bʌ mi' yajñel ti' ti'il cha'an mi' mejlel ti ochel jini bara tac. Che' jini mi' mejlel ti ch'uyol majlel jini mesa. 15Tsi' mele jini bara ti acaciate'. Tsi' tep'e ti puro oro. Jiñʌch cha'an mi' c'ʌñob i ch'uyob majlel jini mesa. 16Tsi' c'ʌñʌ puro oro ti' melol jini plato tac yic'ot jini ñuc tac bʌ plato yic'ot jini jara tac cha'an lʌmʌl bʌ majtañʌl tac.
17Tsi' mele i ts'ʌjbib c'ajc ti puro oro. Melbil i c'ʌclib yic'ot i te'el ti martillo. Melbil ti martillo ja'el ba' mi' lejmel jini c'ajc tac yic'ot i ch'ʌjlil tac. Jump'ejl jach oro tsa' mejli ti' pejtelel. 18An wʌcts'ijt i c'ʌb i yajñib ba' mi' lejmel c'ajc, uxts'ijt i c'ʌb ti jujunwejl. 19An uxp'ejl i ch'ʌjlil lajal bʌ che' bajche' i nich te' i c'aba' almendro ti jujunwejl. Ti jujump'ejl i ch'ʌjlil an che' bajche' i yutbal i nich pimel. An i nich ja'el. Che' lajal ti' wʌcts'ijtlel i c'ʌb i ts'ʌjbib c'ajc. 20Ya' ti' t'ejl ba' mi' lejmel jini c'ajc an chʌmp'ejl i ch'ʌjlil melbil bʌ che' bajche' i nich almendro, am bʌ i yutbal yic'ot i nich ti jujump'ejl. 21Che' ja'el an cha'p'ejl i yutbal ti yebal jini cha'ts'ijt i c'ʌb yic'ot yambʌ cha'p'ejl i yutbal ya' ti yebal jini yambʌ cha'ts'ijt i c'ʌb, yic'ot yambʌ cha'p'ejl i yutbal ti yebal jini yambʌ cha'ts'ijt i c'ʌb. Che' lajal an ti jini wʌcts'ijt i c'ʌb i te'el ba' mi' lejmel jini c'ajc. 22Pejtelel i yutbal tac yic'ot i c'ʌb tac tsa' mejli ti jump'ejl jach oro. Melbil yic'ot martillo. 23Ti puro oro tsi' mele jini wucp'ejl vaso ba' mi' cha'len lejmel jini c'ajc, yic'ot mu' bʌ i c'ʌn i yʌp jini c'ajc. Tsi' melbe i yajñib i tʌñʌl jini c'ajc ja'el. 24Tsi' c'ʌñʌ lujump'ejl i yuxc'al (50) kilo puro oro ti' melol pejtelel iliyi. Tsi' mele pejtelel chuqui tac yom cha'an mi' c'ʌjñel.
25Che' ja'el tsi' mele i pulʌntib* pom. Tsi' c'ʌñʌ acaciate'. I tamlel jiñʌch ojlil metro ti jujunwejl i xujc. Jump'ejl metro i chanlel. Tsi' melbe i xulub tac, ya' jach tem loq'uem i xulub tac ya' ti' xujc tac jini pulʌntib. 26Tsi' tep'e ti puro oro, pejtelel ti' joyol, yic'ot i xujc, yic'ot ti' joytʌlel. 27Ya' ti' yebal i ti' ti' cha'wejlel i xujc tsi' yʌc'ʌ cha'p'ejl xotol tac bʌ tsucu taq'uin melbil bʌ ti oro. Jiñʌch cha'an mi' juc ochel jini bara cha'an mi mejlel i q'uechob. 28Tsi' c'ʌñʌ acaciate' ti' melol jini bara tac. Tsi' tep'e ti oro ja'el.
29Che' ja'el tsi' c'ʌñʌ i ña'tʌbal cha'an mi' chajpan ch'ujul bʌ aceite cha'an bojñibʌl. Tsi' mele uts'at bʌ xojocña bʌ pom ja'el.
Currently Selected:
Exodo 37: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
