Exodo 15

I c'ay Moisés

1Moisés yic'ot israelob tsi' c'ʌyiyob lac Yum ti ili c'ay:

Mi caj j c'ʌyin lac Yum, come ti' ñuclel tsa'ix mʌjli i cha'an.

Tsa'ix i choco ochel ti ñajb jini caballo tac yic'ot c'ʌchʌlo' bʌ.

2Lac Yum c p'ʌtʌlelʌch, jiñʌch mu' bʌ j c'ʌyin.

Jiñʌch xcoltaya c cha'an.

Jiñʌch c Dios, mi caj j c'ʌyiben i ñuclel.

Jiñʌch i Dios c tat.

Mi caj c sub i ñuclel.

3Wen yujil guerra lac Yum.

I c'aba'ʌch lac Yum.

4Tsi' choco ochel ti ñajb i carreta tac Faraón yic'ot i soldadojob.

Tsa' chʌmiyob ti Chʌchʌc bʌ Ñajb jini yajcʌbilo' bʌ xguerrajob.

5Tsa' mujlʌyiyob ti ja'.

Lajal bajche' xajlel tsa' yajliyob ti tam bʌ ja'.

6C Yum, mi' wen tsictiyel i ñuclel a p'ʌtʌlel.

C Yum, tsa' jili a contra cha'an ti a p'ʌtʌlel.

7Cha'an ti' ñuclel a p'ʌtʌlel tsa' jisa jini tsa' bʌ i chañ'esa i bʌ ti a contra.

Tsa' jisayob ti a mich'ajel che' bajche' mi' jilel jam ti c'ajc.

8Che' bʌ tsa' loq'ui ic' ti a ni', tsa' cajli jini ja'.

Jini ja' tsa' wa'le che' bajche' bojte'.

Jini wʌlʌcña bʌ ja' tsa' tsʌts'a yilal.

9Laj contra tsi' yʌlʌ:

“Mi caj cajñesañob, mi caj c tajob.

Mi caj c chilbeñob i chubʌ'an.

Mi caj c mel chuqui com ti' tojlelob.

Mi caj c loc'san quespada ti' yotot cha'an mic jisañob”, che'en.

10Tsa' wujtayob ti ic'.

Tsa' mujlʌyiyob ti jini colem ñajb.

Tsa' yajliyob che' bajche' tsucu taq'uin che' bʌ tsi' jats'ʌyob ja'.

11C Yum, ¿am ba Dios lajal bʌ bajche'et?

¿Majqui ñuc che' bajche' jini Ch'ujul bʌ Dios?

Ma' ch'ujutesʌntel ti c'ay cha'an bʌbʌq'uen bʌ a melbal.

12Che' bʌ tsa' sʌts'ʌ a c'ʌb,

Jini pañimil tsi' mʌsayob yilal.

13Ti' yutslel a pusic'al tsa' pʌyʌ majlel a cha'año' bʌ mʌmbilo' bʌ a cha'an. Ti a p'ʌtʌlel tsa' pʌyʌyob majlel ba'an ch'ujul bʌ a chumlib.

14Jini año' bʌ ti colem tejclum tac tsi' yubiyob,

Tsiltsilñayob ti bʌq'uen.

Tsa' toj sajti i pusic'al jini filisteojob.

15Jini yumʌlob ti Edom tsa' cajiyob ti bʌq'uen.

Tsiltsilñayob jini yumʌlob ti Moab.

Tsa' toj sajtiyob i pusic'al pejtel año' bʌ ti Canaán.

16C Yum, woliyobix ti bʌq'uen.

Ñʌch'ʌlix tsa' cʌleyob cha'an wola' coltañon lojon,

Jinto mij c'otel lojon ba' samiyon lojon,

Jinto mi' laj c'otelob a cha'año' bʌ mʌmbilo' bʌ a cha'an.

17Mi caj a pʌyob ochel ti' lumal.

Mi caj a wʌc'ob ti chumtʌl ya' ti wits yajcʌbil bʌ a cha'an ya' ba'an a chumlib chajpʌbil bʌ a cha'an,

Jini ch'ujul bʌ a wajñib wa'chocobil bʌ a cha'an.

18Mi' caj ti yumʌntel lac Yum ti pejtelel ora. Che'ʌch tsi' c'ʌyiyob.

19Come tsa' laj ochiyob ti ñajb i caballo Faraón yic'ot i carreta tac yic'ot jini c'ʌchʌlo' bʌ. Lac Yum tsi' cha' ñup'u jini ja' ti' pam. Pero jini israelob tsa' ñumiyob ti tiquin lum ya' ti' yojlil colem ñajb. 20Miriam jini x'alt'an, i yijts'in Aarón, tsi' ñijca jini música am bʌ ti' c'ʌb. Jini yaño' bʌ x'ixicob tsi' tʌp'leyob majlel ti son yic'ot música. 21Miriam tsi' cʌntesayob ti c'ay:

C'ʌyinla lac Yum,

Come tsa' mʌjli i cha'an ti' ñuclel.

Tsa'ix i choco ochel ti colem ñajb jini caballo tac yic'ot c'ʌchʌlo' bʌ, che'en.

Jini ch'aj bʌ ja' am bʌ ti Mara

22Moisés tsi' pʌyʌ majlel israelob. Tsi' cʌyʌyob jini Chʌchʌc bʌ Ñajb. Tsa' ochiyob ti colem bʌ i tiquiñal lum i c'aba' Shur. Uxp'ejl q'uin tsi' cha'leyob xʌmbal. Ma'anic tsi' tajayob ja'. 23Che' bʌ tsa' c'otiyob ti Mara, ma'anic tsa' mejli i japob jini ja' come ch'aj. Jini cha'an tsa' otsʌbenti i c'aba' Mara. 24Jini cha'an jini israelob tsa' caji i yʌ'leñob Moisés. Tsi' c'ajtibeyob: ¿Chuqui mi mejlel lac jap? che'ob. 25Jini cha'an c'am tsi' pejca lac Yum Moisés. Lac Yum tsi' pʌsbe juntejc te'. Tsi' choco ochel ti ja'. Jini ja' tsa' sujti ti tsaj.

Ya'i lac Yum tsi' yʌq'ueyob i mandar cha'an i toj'esʌntel yic'ot cha'an i yilʌbentel i pusic'al. 26Tsi' yʌlʌ: Mi xuc'ul mi la' jac'beñon c t'an cha'an mi la' wen mel chuqui uts'at, ma'anic mi caj cʌq'ueñetla jini c'amʌjel tac tsa' bʌ cʌq'ueyob egiptojob. Yom mi la' wen jac'beñon c mandar yic'ot pejtel j cʌntesʌbal, come joñon Yumʌlon mu' bʌ c lajmesañetla. Che' tsi' yʌlʌ lac Yum. 27Tsa' c'otiyob ya' ti Elim. Ya'an lajchʌmp'ejl cuxul bʌ ja' yic'ot lujump'ejl i chʌnc'al palmerate'. Tsa' jijliyob ya' ti' ti' ja'.

Currently Selected:

Exodo 15: CTU77

Highlight

Copy

Compare