Exodo 12
12
Jini Pascua*
1Lac Yum tsi' sube Moisés yic'ot Aarón che' añob to ti Egipto: 2Ili uw i tejchibalix jini tsiji' bʌ jabil la' cha'an. 3Subeñob pejtel jini tejclum Israel cha'an mi' ch'ʌmob tilel jujuncojt alʌ tat tiñʌme' ti jujump'ejl otot che' ti lujump'ejlel tsic ti ili uw. 4Mi ma'anic jaytiquil ya' ti jump'ejl otot la' i tem c'uxob jini juncojt tiñʌme' yic'ot i pi'ʌl ti chumtʌl che' bajche' jaytiquil añob. Mi caj i t'oxbeñob i bʌ che' bajche' c'amel yomob ti jujuntiquil. 5Yom juncojt tiñʌme' mach bʌ i p'ajomalic. Yom i tat bʌ am bʌ jump'ejl i jabil, mi tiñʌme' mi chivo. 6Cʌntanla jinto mi' ts'ʌctiyel lujump'ejl tsic ti ili uw. Che' ti ili tsic yom mi' tsʌnsañob tiñʌme' tac pejtelel israelob mu' bʌ i tempañob i bʌ. Che' ti ic'ajel mi caj i tsʌnsañob. 7Mi caj i ch'ʌmob lamital jini ch'ich'. Mi caj i boñob cha'tejc jini chumte' ti' ti' otot yic'ot i ts'omte'lel i ti' otot tac ya' ba' mi caj i c'uxob. 8Mi caj i c'uxob we'elʌl ti jini ac'ʌlel, pojpobil, yic'ot waj mach bʌ anic i levadurajlel, yic'ot ch'aj bʌ pimel. 9Mach yomic mi la' c'ux che' tsij to mi che' ch'ʌxbil ti ja', pero pojpobil yic'ot i jol yic'ot i yoc yic'ot i pusic'al yic'ot i yolmal. 10Mach yomic mi la' cʌy mi ts'ita'ic i colojbal che' mi' sʌc'an. Mi an i colojbal yom mi la' pul. 11Yom mi la' c'ux che' bajche' iliyi: Yom cʌchʌl la' cajchiñʌc, yom lʌpbil la' warach, yom chucul la' cha'an la' te'. Ora jach yom mi la' c'ux. Jiñʌch i Pascua lac Yum. 12Come mi caj c ñumel ti Egipto ti ili ac'ʌlel. Mi caj c jats' pejtel jini ascuñʌlo' bʌ ti Egipto, winicob yic'ot i yʌlac'ob. Mi caj c jisan pejtel jini dioste' tac i cha'an egiptojob. Joñon Yumʌlon. 13An i c'ʌjñibal jini ch'ich' cha'an mi' tsictesan la' wotot tac ba' chumuletla. Che' mij q'uel jini ch'ich' mi caj c ñumel. Ma'anic chuqui mi caj c tumbeñetla mi ts'ita'ic che' mic jats' jini egiptojob.
14Jiñʌch jump'ejl q'uin yom bʌ mi la' ña'tan. Yom mi la' chʌn mel ili q'uin cha'an c ña'tʌntel yic'ot la' walobilob yic'ot pejtelel la' p'olbal mu' bʌ caj i tilelob. Yom mi la' chʌn ña'tan ili q'uin ti pejtelel ora. 15Wucp'ejl q'uin mi caj la' c'ux waj mach bʌ anic i levadurajlel. Che' ti' tejchibal jini q'uiñijel mach yomic mi' tajtʌl mi ts'ita'ic levadura* ti la' wotot. Mi an majqui mi' c'ux levadura che' woli jini q'uiñijel mach mejlic i yajñel yic'ot c winicob ti Israel mu' bʌ i tempañob i bʌ.
16Ti ñaxan bʌ q'uin ch'ujul mi caj j q'ueletla che' mi la' tempan la' bʌ. Che' ja'el ti wucp'ejlel q'uin ch'ujul mi caj j q'ueletla che' mi la' tempan la' bʌ. Mach yomic mi la' cha'len e'tel ti ili q'uin. Pero mi mejlel la' chajpan jini yom bʌ mi la' c'ux. 17Mi caj la' mel i q'uiñilel waj mach bʌ anic i levadurajlel, come ti ili q'uin tsac pʌyʌyetla loq'uel ti Egipto. Jini cha'an mi caj la' mel ili q'uin jatetla yic'ot la' walobilob c'ʌlʌl ti la' p'olbal mu' bʌ caj i tilel cha'an mi la' ña'tan ti pejtelel ora. 18Ti ñaxan bʌ uw, ti chʌnlujump'ejlel tsic che' ti ic'ajel, mi caj la' c'ux waj mach bʌ anic i levadurajlel, c'ʌlʌl ti jump'ejl i cha'c'al tsic che' ti ic'ajel. 19Wucp'ejl q'uin mach yomic levadura ti la' wotot, mi ti' yotot tac jini ñajt bʌ ch'oyolob año' bʌ ti la' tojlel. Come mi an majqui mi' c'ux waj am bʌ i levadurajlel, mach mejlic i yajñel yic'ot c winicob ti Israel mu' bʌ i tempañob i bʌ. 20Mach yomic mi la' c'ux waj am bʌ i levadurajlel. Ti pejtelel la' wotot tac yom mi la' c'ux waj mach bʌ anic i levadurajlel, che'en lac Yum.
21Moisés tsi' pʌyʌ tilel pejtel jini ñoxo' bʌ ti Israel. Tsi' subeyob: Yajcanla alʌ tat tiñʌme' jujuncojt cha'an jujump'ejl otot. Tsʌnsanla tiñʌme' cha'an i q'uiñilel Pascua. 22Ch'ʌmʌla junbujts hisopo*. Ts'ajala ti ch'ich' am bʌ ti latu. Boñola ts'omte' yic'ot cha'tejc chumte' ti ch'ich' am bʌ ti latu. Mach yomic mi la' loq'uel ti la' wotot c'ʌlʌl mi' sʌc'an mi juntiquileticla. 23Come lac Yum mi caj i ñumel cha'an mi' tsʌnsan jini egiptojob. Che' mi' q'uel jini ch'ich' am bʌ ti chumte' yic'ot ti ts'omte' mi caj i ñusan la' wotot. Ma'anic mi caj i yʌc' ti ochel ti la' wotot jini Angel mu' bʌ ti jisaya.
24Mi caj la' chʌn mel Pascua yic'ot la' walobilob ti pejtelel ora. 25Ba' ora mi la' c'otel ti jini lum mu' bʌ caj i yʌq'ueñetla lac Yum che' bajche' tsi' subeyetla, xuc'ul yom mi la' chʌn mel Pascua. 26Che' mi' c'ajtibeñetla la' walobilob: “¿Chuqui i sujmlel Pascua?” mi che'ob, 27mi caj la' jac': “Jiñʌch i majtan lac Yum mu' bʌ lac tsʌnsʌben cha'an Pascua, come lac Yum tsa' ñumi ti pam i yotot tac israelob ya' ti Egipto che' bʌ tsi' tsʌnsa egiptojob. Ma'anic tsi' tsʌnsayon lojon”. Che' yom mi la' subeñob, che'en Moisés. Jini israelob tsi' lijiyob i bʌ. Tsi' ch'ujutesayob Dios. 28Che' jini tsa' majliyob israelob. Tsi' meleyob che' bajche' tsa' subentiyob, che' bajche' lac Yum tsi' yʌq'ueyob mandar Moisés yic'ot Aarón.
Tsa' chʌmiyob jini ascuñʌlo' bʌ
29Che' ti' ojlil ac'ʌlel lac Yum tsi' tsʌnsa pejtel ascuñʌlo' bʌ ti Egipto, c'ʌlʌl ti ascuñʌl bʌ i yalobil Faraón jini rey c'ʌlʌl ti ascuñʌl bʌ i yalobil xmʌjquel am bʌ ti mʌjquibʌl, yic'ot pejtel ñaxan bʌ i yal alʌc'ʌl tac ja'el. 30Faraón tsa' tejchi ti ojlil ac'ʌlel che' ja'el pejtel i pi'ʌlob ti e'tel yic'ot pejtel egiptojob. C'am tsa' cajiyob ti uq'uel ti Egipto. Come ma'anic mi jump'ejlic otot ba' ma'anic tsa' chʌmi juntiquil. 31Tsi' chocbeyob t'an Moisés yic'ot Aarón ti ac'ʌlel. Tsi' yʌlʌ: Ch'ojyenla. Loq'uenla ti' tojlel egiptojob, jatetla la' wic'ot jini israelob. Cucula, ch'ujutesan la' Yum che' bajche' tsa' la' wʌlʌ. 32C'ajtibenla Dios cha'an mi' yʌq'ueñon i yutslel i t'an ja'el. Pʌyʌla majlel la' tiñʌme' yic'ot la' wacax che' bajche' tsa' la' wʌlʌ. Cucula. Che' tsi' yʌlʌ Faraón.
33Jini egiptojob tsi' subeyob loq'uel ti' lumal ti ora, come tsi' yʌlʌyob: Ame laj chʌmicon lojon tic pejtelel, che'ob. 34Jini cha'an jini israelob tsi' ch'ʌmʌyob majlel jini c'o'ol bʌ sa' yic'ot i yajñib. Maxto otsʌbilic i levadurajlel. C'ʌcʌl ti pam i pislel tsi' q'uecheyob majlel. 35Jini israelob tsi' meleyob che' bajche' tsi' subeyob Moisés, come tsi' c'ajtibeyob egiptojob pisil yic'ot i ch'ʌjlil tac melbil bʌ ti plata yic'ot ti oro. 36Lac Yum tsi' ñijcʌbeyob i pusic'al egiptojob cha'an mi' q'uelob ti uts'at. Che' jini tsi' yʌq'ueyob i majtan tac jini israelob che' bajche' c'amel yomob. Che' jini tsi' ch'ʌmʌyob i tojol cha'an i ye'tel jini israelob.
Jini israelob tsa' loq'uiyob ti Egipto
37Jini israelob tsa' loq'uiyob ti Ramesés. Tsa' ñumiyob majlel ti' bijlel Sucot. An lujunc'al i cha'bajc' (600) mil winicob woliyo' bʌ ti majlel. Mach tsicbilobic x'ixicob yic'ot ch'itoñob yic'ot xch'ocob. 38Cabʌl yan tac bʌ winicob x'ixicob tsa' majliyob yic'otob, yic'ot tiñʌme' tac, yic'ot cabʌl wacax. 39Jini sa' tsi' meleyob ti waj che' ma'anic i levadurajlel, come ma'anic i levadurajlel che' bʌ tsa' chojquiyob loq'uel ti Egipto. Ma'anic tsa' mejli i jal'anob ti' yotot. Jini cha'an mach tic'anic tsi' ch'ʌmʌyob majlel ti bij.
40Jini israelob tsa' chumleyob ti Egipto jumbajc' yic'ot lujump'ejl i cha'c'al (430) jab. 41Che' bʌ ñumeñix jumbajc' yic'ot lujump'ejl i cha'c'al jab, ti jini jach bʌ q'uin tsa' loq'uiyob ti' lumal egiptojob pejtelel i cha'año' bʌ lac Yum. 42Lac Yum tsi' wen cʌntayob ti jini ac'ʌlel che' bʌ tsi' pʌyʌyob loq'uel ti Egipto. Jini cha'an ti pejtelel ora mi caj i chʌn ña'tʌntel ili ac'ʌlel. Mi caj i cañob i wut pejtel israelob ti' tojlel lac Yum che' ti ili ac'ʌlel.
Mandar cha'an Pascua
43Lac Yum tsi' sube Moisés yic'ot Aarón: Jiñʌch mandar cha'an Pascua: “Jini ch'oyolo' bʌ ti ñajtʌl mach mejlic i tem c'uxob we'elʌl yic'ot c cha'año' bʌ. 44Pero la' mozojob tsa' bʌ la' mʌñʌ ti taq'uin mi mejlel i c'uxob che' bʌ tsa'ix la' tsepbeyob* i pʌchʌlel. 45Mach yomic mi' c'uxob jini ch'oyolo' bʌ ti ñajtʌl mi jini xganarob jach bʌ mach bʌ la' pi'ʌlobic. 46Ti jujump'ejl otot ba' mi' pojpontel tiñʌme' ya jach yom mi la' c'ux. Mach yomic mi la' ch'ʌm majlel jini we'elʌl ti yambʌ otot. Mach yomic mi la' c'ʌsben mi junts'ijtic i bʌquel. 47Wersa mi' melob jini q'uin pejtel israelob. 48Che' an juntiquil ch'oyol bʌ ti ñajtʌl mi yom mi' melbeñon jini Pascua, la' tsepbentic i pʌchʌlel yic'ot winic bʌ i pi'ʌlob. Che' jini mi mejlel i mel jini q'uiñijel temel la' wic'ot. Lajal mi caj i yajñel che' bajche'etla. Pero mach mejlic i c'ux jini mach bʌ tsepbilic i pʌchʌlel. 49Jump'ejl jach jini mandar cha'añetla yic'ot jini ñajt bʌ ch'oyolob am bʌ ti la' tojlel”, che'en.
50Jini israelob tsi' meleyob che' bajche' lac Yum tsi' yʌq'ueyob mandar Moisés yic'ot Aarón. 51Ti jini jach bʌ q'uin lac Yum tsi' pʌyʌ loq'uel israelob ti' lumal egiptojob ti mojt ti mojt.
Currently Selected:
Exodo 12: CTU77
Highlight
Copy
Compare
Share
Want to have your highlights saved across all your devices? Sign up or sign in
Chol de Tumbalá Bible © Bible Society of Mexico, 1977. Active Translation in Process
