Uro 11

Naaŋmen Ba Gyɛ A Izerayɛl Noba Bare Kpokpo

1N pãã soorɔ la, Naaŋmen mɔɔ gyɛ la a O noba bare be? A koŋ baŋ waa lɛ togitogi! Maa meŋɛ waa la Izerayɛl bie, a yi Aboraham boorɔ poɔ, a waa Bɛŋgyamen bale neɛ. 2Naaŋmen ba gyɛ a O noba O naŋ da daŋ baŋ bare. Yɛ ba baŋ lɛ a gansoŋ naŋ da yeli a Elaagya yɛlɛ be, a lɛ o naŋ da sɔre ka Naaŋmen iri O nimiri eŋ a Izerayɛl biiri? 3“Daana, ba ko la a fo Ŋmen-yelmanneba, ba ŋmore la a fo bagmaalkubo bare; Maa yoŋ la kyɛre, kyɛ ka ba naŋ boɔrɔ ka ba iri n nyɔvore.” 4Kyɛ wola ka a Naaŋmen da yeli sɔge o? “N taa la noba turi ayopoĩ naŋ ba gbi dumo a Baal niŋesogɔ.” 5A lɛ meŋ la ka a waa a zenɛ bebiri, a noba belaa naŋ bebe la ka Naaŋmen kaa-iri a O garaaseɛ zuiŋ. 6Kyɛ ka anaŋ wa e garaaseɛ zuiŋ la ka O kaa-iri ba, a koŋ la e ka ba toma zuiŋ la, ka lɛ naane, garaaseɛ koŋ la waa garaaseɛ.

7Ka boŋ pãã la? A Izerayɛl biiri da kɔŋ la bonna ba naŋ da boɔrɔ. A Naaŋmen neŋkaa-irri da nyɛ a la, kyɛ banaŋ naŋ kyɛre na da darɛɛ la, 8aŋa ba naŋ da sɛge lɛ:

“Naaŋmen da eɛɛ la ka ba waa maaroŋ ba teɛroŋ poɔ,

a ko ba nimie naŋ koŋ baŋ nyɛ

ane tobo naŋ ba wono,

a wa tɔ a zenɛ bebiri.”

9Ka Davil yeli:

“Vɛŋ ka ba diibu tabole leɛ bɛraa a nyɔge ba taa,

a e ba gbɛŋmɛ-le bon ane ba dɔgroo zie.

10Vɛŋ ka ba nimie sɔɔ ka ba ta nyɛrɛ,

kyɛ ka ba woore dɔgle ba zu a e ka ba kɔɔ-guri tegitegilɛ.”

A Nemboore-yobo Faabo Yɛlɛ

11Lɛnso N soorɔ la, ba mɔɔ ŋmɛ la gbɛre a na le be? A koŋ baŋ e a lɛ! Kyɛ a yi a ba gbɛŋmɛ eŋɛŋ la ka faabo wa a Nemboore-yobo#11:11 Nemboore-yobo: Noba na zaa naŋ da ba waa Gyuumine la a Nemboore-yobo. zie, ka ka lɛ e ka nyuuri kpɛ a Izerayɛl biiri. 12Pampana ŋa, ka a ba gbɛre ŋmeɛbo wa ko a andonɛɛ bondaanoŋ, ka a ba leebu ko a Nemboore-yobo bondaanoŋ, wola ka a na waa ka ba zaa wa poɔ a faabo poɔ!

13Pampana ŋa, N yele la yɛlɛ korɔ yɛnee Nemboore-yobo. A naŋ pãã waa ka N waa la a yɛ Nemboore-yobo apostolii, N ire la a n tonnoɔre ŋa yuori, 14ka ka N e ka n meŋɛ noba nyuuri iri, ka a lɛ e ka N toɔ̃ faa ba mine. 15Bonso, ka a ba gyɛbaroo wa e a andonɛɛ leɛ maale taa, boŋ ka a ba sagedeebo na waa ka kuuni poɔ leɛ-iruu naane! 16Ka a zɔŋ-buuri mine ba naŋ de tere kyɔɔtaa ka a waa wɔŋ dɛndɛŋ naŋ e soŋ, ka lɛ a zɔŋ-buuri zaa waa la soŋ; ka a teɛ nyagre wa soma, a lɛ eŋ, a ulli meŋ na soma la.

17Kyɛ ka ba naŋ da kɔɔre a teɛ ulli#11:17 Teɛ ulee bee teɛ ulli: A Dagaaba mine maŋ boɔle la teɛ ulee bee teɛ ulli ka danu bee danuuri. mine bare kyɛ ka ba de yɛnee naŋ waa moɔ poɔ kããteere ulli naŋ tore yi wa tɔnne ne a zie, ka yɛ meŋ nyu a kããteɛ ŋa nyaga naŋ nyɛ maaloo koɔ̃, 18yɛ ta wullo yɛmenne aŋa yɛ seɛ la a ulli na ba naŋ kɔɔre bare. Ka yɛnee wa wullo yɛmenne, yɛ leɛ baŋ ka yɛnee naane nyɔge a nyagre taa, kyɛ a nyagre la nyɔge yɛ taa. 19Yɛ na yeli la, “Ba da kɔɔre la ulli bare kyɛ na de te tɔnne ne.” 20A lɛ waa la yelmeŋɛ. Ba da kɔɔre a la bare, ba naŋ da ba sage de zuiŋ, kyɛ yɛnee are la yeldeebo yoŋ zuiŋ. Azuiŋ yɛ ta wullo yɛmenne, kyɛ yɛ taa Naaŋmen dabeɛ̃ zoobu. 21Ka Naaŋmen da ba bare a teɛ meŋɛ ulli, kaapɔge O koŋ bare yɛ meŋ. 22Yɛ pãã leɛ kaa a Naaŋmen nimimaaroŋ ane O nimitoloŋ yɛlɛ. Naaŋmen taa la nimitoloŋ kyaare ne a banaŋ naŋ e yelbieri, kyɛ leɛ O nimimaaroŋ kyaare yɛ, ka yɛnee naŋ wa kyɛnɛ be a O nimimaaroŋ poɔ; ka lɛ naane, O na kyɛ la yɛ meŋ ŋmaa bare. 23Haali a banaŋ naŋ waa a Izerayɛl noba, ka ba naŋ ba wa kpãã toori be a ba yeldeebo bataabo poɔ, ba na leɛ de ba la wa tɔnne eŋ. Bonso, Naaŋmen taa la a kpeɛ̃õ ka O la leɛ de ba tɔnne. 24Ka ba naŋ da kyɛ yɛ ŋmaa yi moɔ poɔ kããteɛ eŋɛ a taa yɛ wa tɔnne kããteɛ ba naŋ sɛle eŋɛ, wola ka a koŋ e mɔlɔ ka ba leɛ de a kããteɛ meŋɛ ulli a wa tɔnne a menne kããteɛ eŋɛ.

A Izerayɛl Noba Zaa Na Nyɛ La Faabo

25N yɔɔmine ane n yɔɔpuuli, ka yɛ ta wa yeli ka yɛ waa la yɛmbaŋnema gaŋ lɛ a naŋ da seŋ ka yɛ waa, N boɔrɔ la ka yɛ baŋ a Naaŋmen yelsɔglaa ŋa tɛgɛ. Sukyie daroo wa la a Izerayɛl biiri mine sukyie poɔ a na te ta saŋ na a Nemboore-yobo zaa naŋ na wa sage de. 26A lɛ ka a Izerayɛl noba zaa na nyɛ faabo; aŋa ba naŋ da sɛge lɛ:

“A Zaayɔn teŋɛ poɔ la ka a Faara na yi wa;

O na wa digi la Naaŋmen ba-emmo yi a Gyekɔb bale poɔ.”

27“A N nɔ-eŋnaa N naŋ eŋ ne ba la ŋa,

ka maa wa de a ba yelbebe bare.”

28Ba e la Naaŋmen dɔndɔnne a yɛ zuiŋ, a kyaara ne a Ŋmen-yelnoore. Kyɛ a kyaare ne a neŋkaa-irri, ba waa la Naaŋmen poyɛŋ noba, a ba sããkommine zuiŋ; 29bonso, Naaŋmen kyɔɔtaare ane O boɔlaa ba taa leɛrebaroo. 30Aŋa lɛ yɛ naŋ da zagre Naaŋmen noɔre kyɛ ka pampana ka yɛ nyɛ a O nyonono a ba noɔre zagroo zuiŋ, 31lɛ la ka pampana ŋa ka ba waa nɔzagreba; ka ka aŋa ba naŋ da zo yɛ nyonono lɛ, ka ba na zo ba meŋ nyonono. 32Bonso, Naaŋmen nyɔge la nensaalba zaa pɔge noɔre zagroo poɔ ka ka O toɔ̃ zo ba zaa nyonono.

33Nyɛ a Naaŋmen bondaanoŋ, yɛŋ ane a O bammo naŋ waa zuluŋ seŋ lɛ! A O sɛrɛɛdiibu ba taa mannoo, ka a O sobie ba taa peɛroo!

34“Nembuo la baŋ a Daana poteɛrɛ?

Bee nembuo la yele yɛlɛ wullo a Daana?”

35“Bee nembuo la ko a Daana kyɔɔtaa,

a na la leɛ nyɛ kyɔɔtaa yi O zie?”

36Bonso, a O zie la ka boma zaa yi, a O zie la ka boma zaa tu kyɛ wa, a O zie la ka a boma zaa be. Ona la seŋ ne puubu tegitegilɛ. Ameena.#11:36 Ameena: A Ameena tɛgɛ la, ‘Ka a e a lɛ.’

Currently Selected:

Uro 11: DNTTP

Highlight

Copy