Tom 24

A Gyuumine Naŋ Da De Saanaa Duori A Pɔɔl

1Beri anuu puoriŋ, a Naaŋmen bagmaalkare neŋkpoŋ Ananeɛ da sigi waɛ la ane a nembɛrɛ ane a gɔbena nɔbaŋkpoŋ kaŋ yuori naŋ da di Tɛtulu. Ba da wa manne la a ba yɛlɛ ba naŋ taa kyaare ne a Pɔɔl a ko a gɔbena. 2Ba naŋ da wa te boɔle a Pɔɔl, Tɛtulu da piili duoro o la ne saanaa, a yele:

“N Ba Naa, a fo zuiŋ, te taa la emmaaroŋ, kyɛ a fo bammo la so ka a teŋɛ nyɛ yelpaalba a noba ŋa zie. 3Te sage de la a yeli ŋa sori zaa poɔ ane zie zaa ne ameseɛrɛ. 4Kyɛ te naŋ ba boɔrɔ ka fo zeŋ kɔɔre zuiŋ, N sɔrɔ fo la, aŋa fo naŋ maŋ sagra yɛlɛ lɛ, vɛŋ ka N kyɛ a yɛlɛ ŋmaare ko fo. 5Yelmeŋɛ zaa, te nyɛɛ la ka a dɔɔ ŋa waa la zisaana, a dɔɔnɔ a Gyuumine a tendaa zaa poɔ, kyɛ o na la a Naazɛrɛ laŋne noba#24:5 Naazɛrɛ Laŋne Noba: A Yeezu naŋ da yi Naazɛrɛ zuiŋ, ba da boɔlɔ la a o potuuribo Naazɛrɛ laŋne noba a saŋ na a puoruu naŋ da piili. wederɛ. 6O gba da boɔrɔ la ka o sãã a Naaŋmen die, lɛ la ka te da nyɔge o. 7[Te da na di la o sɛrɛɛ a seŋ a te begɛ naŋ biŋ lɛ. Kyɛ a sogyɛre turi neŋkpoŋ Lisitera da waɛ la a wa faa o a te nuuri poɔ ane faŋ, kyɛ tere noɔre ka banaŋ naŋ taa yelzaa kyaare ne o wa fo zie.] 8Ka fõõ meŋɛ soore o, fo na nyɛ la ka a yɛlɛ zaa te naŋ yeli kyaare ne o waa la a lɛ.”

9A Gyuumine meŋ da poɔ la ba noɔre a yeli ka a saanaa ba naŋ de tuo o waa la yelmeŋɛ.

A Pɔɔl Naŋ Yeli Yɛlɛ Ka O Faa O Meŋɛ A Fɛlise Niŋesogɔ

10A gɔbena naŋ da wa ko a Pɔɔl sori ka o yeli yɛlɛ, O da yelee la:

“N poɔ pɛle la yaga ka N tu n noɔre ko fo, bonso, N baŋ ka fo di la a teŋɛ ŋa noba sɛrɛɛ yuomo yaga. 11Fo na baŋ soore la a nyɛ, a ba zuo beri pie ne ayi n naŋ da gaa ka N te puori a Gyɛruzɛlɛm poɔ. 12Ba da ba nyɛ ka N ŋmeɛrɛ nɔkpeɛne ane neɛzaa bee a nyɛ ka N dɔɔnɔ noba laŋna taa a Naaŋmen die poɔ bee a puoruuderi poore bee a teŋkpoŋ poɔ. 13Ba gba kontoɔ̃ wuli fo ka a saanaa na ba naŋ de duoro ne ma waa la yelmeŋɛ. 14Kyɛ N sagɛɛ la ko yɛ kyaare ne a Sori na ba naŋ boɔlɔ laŋne. N puoro la a te sããkommine Naaŋmen, a sage de a yɛlɛ na zaa a Naaŋmen nɔɛ naŋ biŋ bee a anaŋ a Ŋmen-yelmanneba naŋ sɛge. 15N taa la teɛretɔroo#24:15 Teɛretɔroo: A Dagaaba mine maŋ yeli ka ‘Kyelloo.’ Naaŋmen zie; a teɛretɔroo na bamenne naŋ sage ka a nemmenne ane a nenfaare zaa na leɛ-iri la a kuuni poɔ. 16Azuiŋ, N erɛ la aneɛ ka N taa teɛroŋ soŋ Naaŋmen zie ane nensaalba zaa zie. 17Yuomo mine naŋ tɔle, N da waɛ la, a taa boma wa ne ka N wa soŋ nembaalba a n teŋɛ poɔ kyɛ maale bagre. 18N naŋ da erɛ a yeli ŋa, ba da nyɛ ma la a Naaŋmen die poɔ ka N tu a n meŋɛ peeroo yɛlɛ zaa te peɛlɛ baaroo, ka neŋyaga da ba kyebe bee ka dɔɔne dɔ̃ɔ̃. 19Kyɛ a Gyuu noba mine naŋ yi Ezeya, da seŋ ka ba be a kyɛ a wuli n saanaa, ka ba naŋ da taa yeli zaa kyaare ne ma. 20Bee e ka a noba bama naŋ be a kyɛ, yeli a n yelsaanaa a saŋ na N naŋ da are a sɛrediribe niŋesogɔ, 21ka maa taa saanaa zaa, ona la N naŋ da yeli ka kuuni na leɛ-iri la. ‘Azuiŋ la ka N are a fo niŋesogɔ ka ba dire n sɛrɛɛ a zenɛ bebiri.’ ”

22Kyɛ Fɛlise naŋ da baŋ a Sori ŋa yɛlɛ velaa da eɛɛ la ka ba leɛre a yɛlɛ biŋ, kyɛ ka o pãã yeli, “Ka Lisiya, a sogyɛre turi neŋkpoŋ wa sigi wa, N na kpulli la a fo yeli ŋa zu.” 23Lɛ la ka o da ko a sogyɛre kɔɔ neŋkpoŋ noɔre ka ba guuro a Pɔɔl kyɛ vɛŋ ka o so o meŋɛ, a ta pigi o bamine kanzaa naŋ na boɔrɔ ka o kaara o zu.

Pɔɔl Naŋ Are Fɛlise Ane Durusela Niŋesogɔ

24Beri mine puoriŋ, a Fɛlise ane o pɔge Durusela naŋ da waa Gyuumine pɔgeyaa da waɛ la. A Fɛlise da toŋɛɛ la ka ba te taa a Pɔɔl wa ne, ka o wa manne a yeldeebo naŋ kyaare ne a Kirista Yeezu ka o woŋ. 25O naŋ da yele yelmennoŋ, meŋɛ bantaabo ane a sɛrɛɛdiibu naŋ waana yɛlɛ, dabeɛ̃ da kpɛ la a Fɛlise ka o yeli, “A naŋ ta ŋaa, gɛrɛ, kyɛ ka maa wa nyɛ vuo, N na leɛ boɔle fo la.” 26O meŋ da teɛre ka Pɔɔl na ko o la libiri, azuiŋ, o da maŋ boɔle o la gbɛɛ yaga ka ba yeli yɛlɛ.

27Yuomo ayi puoriŋ, Ponsio Fɛstu da leɛre la a Fɛlise zu; kyɛ a Fɛlise naŋ da boɔrɔ ka o ne a Gyuumine yɛlɛ kpɛtaa zuiŋ, o da bare la a Pɔɔl a nempagdie poɔ.

Currently Selected:

Tom 24: DNTTP

Highlight

Copy