II Tesa 2
2
A Dɔɔ-koŋwoŋwuluu Yɛlɛ
1Te yɔɔmine ane te yɔɔpuuli, a kyaara ne a te Daana Yeezu Kirista waabo ane te naŋ na te lantaa a O zie yɛlɛ, te sɔrɔ yɛ la, 2ka yɛ ta vɛŋ ka yɛ teɛrɛ gyɛrre bee ka dabeɛ̃ kpɛ yɛ wieouŋ lɛ, ka seeloŋ poɔ la bee ka yelbie la bee ka lɛtɛ la ka yɛ nyɛ ka a wuli seŋ ŋa te zie la ka o yi, a yele ka a Daana bebiri taɛ la baare. 3Yɛ ta vɛŋ ka neɛzaa bɛlle yɛ sori zaa poɔ, bonso, a bebiri na koŋ wa sɛre ka a nɔzagra ba daŋ de weɛ wa, kyɛ ka ba iri a koŋwoŋwuluu soba wuli; ona la ka ba nare biŋ a na sãã. 4O maŋ zɔɔrɔ la kyɛ duoro o meŋɛ gaŋ kaŋwaa ŋmen bee bonzaa ba naŋ puoro, ka ka o na zeŋ o dakogi zu a Naaŋmen die poɔ kyɛ boɔlɔ o meŋɛ Naaŋmen. 5Yɛ ba leɛ-teɛre ka N da yeli la a yɛlɛ ama ko yɛ N naŋ da naŋ kyɛnɛ be yɛ zie be? 6Kyɛ yɛ baŋ la bon naŋ pigre o sori pampana, ka ka ba na iri o wuli ka a o saŋ wa ta. 7Bonso, a koŋwoŋwuluu soba yelsɔglaa gba tonɔ la toma, kyɛ a soba na yoŋ naŋ pigi o sori pampana la iri o bare. 8A lɛ saŋ la ka ba na e ka a koŋwoŋwuluu soba sãã, ona la ka a Daana Yeezu na de O noɔre saseɛ sãã ne, kyɛ ka a O waabo sãã o bare kpɛlɛŋ kpɛlɛŋ ka o koŋ la bebe. 9A koŋwoŋwuluu soba waabo sããɛ la weliweli ne a Setaana naŋ erɛ yɛlɛ ne kpeɛ̃õ, yelwulii, zirŋma nɔmaa toma, 10ane potuoloŋ bɛllɛ boorɔ zaa a bɛllɛ ne a banaŋ naŋ weɛrɛ, ba naŋ zagre ka ba nɔŋ a yelmeŋɛ a nyɛ faabo zuiŋ. 11A ŋaa zuiŋ la ka Naaŋmen vɛŋ ka nimisɔɔ kpoŋ kpɛ ba, ka ba sage de zirii yɛlɛ, 12ka ka banaŋ zaa naŋ ba sage de a yelmeŋɛ kyɛ ka ba poore pɛllɛ ne faaloŋ na nyɛ weɛbo.
Ba Kaa-iri Yɛ La Ka Yɛ Nyɛ Faabo
13Te yɔɔmine ane te yɔɔpuuli, a Daana poyɛŋ noba, a ferɛɛ la ka te puoro Naaŋmen bareka yɛ zuiŋ, bonso, Naaŋmen kaa-iri yɛ la ka yɛ waa a wɔŋ dɛndɛŋ naŋ na tu a Vooroŋ Soŋ pɛgeyiibu ane yɛ naŋ sage de a yelmeŋɛ zuiŋ a nyɛ faabo. 14A yeli ŋa zuiŋ la ka Naaŋmen tu a yelnoore te naŋ moɔlɔ zie a boɔle yɛ ka ka yɛ na toɔ̃ nyɛ a te Daana Yeezu Kirista puubu. 15A lɛ zuiŋ n yɔɔmine ane n yɔɔpuuli, yɛ pãã are kpeɛŋaa kyɛ tuuro a yɛlɛ na te naŋ da wuli yɛ, ka noɔre yelbie la bee ka lɛtɛre la.
16Pampana, ka a te Daana Yeezu Kirista meŋɛ ane a te Saa Naaŋmen, a Onaŋ naŋ nɔŋ te a tu garaaseɛ zie a ko te mooreteroo naŋ ba taa baaroo ane teɛretɔroo#2:16 Teɛretɔroo: A Dagaaba mine maŋ yeli ka ‘Kyelloo.’ meŋɛ, 17kyɛ maa yɛ sukyie a ko ba faŋ tonsonne ane yelbie zaa eŋɛ.
First New Testament in Dagaare Language © The Bible Society of Ghana, 2013.