Mateo 11

Yohane nɔ sɔlelɔ ɔ tsɔ nihi Yesu ngɔ

(Luka 7.18-35)

1Benɛ Yesu tsɔɔ e kaseli nyɔngma kɛ enyɔ ɔmɛ ní nɛ ɔmɛ ta a, e je kɛ ho ma amɛ nɛ a kɛ lejɛ ɔ kɛ we ɔ a mi ya, nɛ e ya tsɔɔ ní, nɛ e fiɛ ngɛ lejɛ ɔmɛ.

2Jamɛ a be ɔ mi ɔ, a wo Yohane nɔ sɔlelɔ ɔ tsu. Benɛ Yohane nu níhi nɛ Kristo ngɛ tsue ɔ a he ngɛ tsu ɔ mi ɔ, e tsɔ e kaseli ɔmɛ ekomɛ kɛ sɛ gbi nɛ ɔ ba ha Yesu 3ke, “Anɛ mo ji nɔ nɛ ma a, aloo waa hyɛ nɔ kpa blɔ?”

4Yesu he nɔ ke, “Nyɛɛ ya nɛ nyɛ ya de Yohane níhi nɛ nyɛ ngɛ nue, kɛ níhi nɛ nyɛ ngɛ hyɛe nɛ ɔ. 5#Yes 35.5-6; 61.1 Hɛ yuyuili ngɛ nɔ́ hyɛe, glɔtsɛmɛ ngɛ nyɛɛe, nɛ nihi nɛ ngɛ he womi nɔ hiɔ yaya nue ɔ, a he ngɛ tsɔe; amuɛtihi ngɛ nɔ́ nue, gbogboehi ngɛ si tee, nɛ a ngɛ sane kpakpa fiɛe ha ohiatsɛmɛ. 6A gbaa nɔ nɛ mi mi fu we ngɛ ye he.”

Yesu ye Yohane he odase

(Luka 7.24-35)

7Benɛ Yohane kaseli ɔmɛ yaa a, Yesu tu Yohane he munyu kɛ tsɔɔ ma kpekpemi ɔ ke, “Mɛni nyɛ ho nga a nɔ ya nɛ nyɛ yaa hyɛ? Ngɔwu nɛ kɔɔhiɔ ngɛ lɛ mimiɛe lo? 8Mɛni nyɛ ho hyɛmi ya? Nɔmlɔ nɛ wo tade bɔdɔɔ lo? Hyɛ, ni nɛmɛ nɛ woɔ tade bɔdɔɔ ɔ, matsɛmɛ a we mi nɛ a hii. 9Nyɛ de mi koo! Mɛni he je nyɛ ho ɔ? Nɛ́ nyɛ ya hyɛ gbalɔ, pi ja? Ee! Se i ngɛ nyɛ dee ke nɔ nɛ nyɛ ya na a pe gbalɔ tete. 10#Mal 3.1 Ejakaa Yohane ɔ he lɛ a ngma ngɛ ke, ‘Hyɛ, i ngɛ ye tsɔlɔ ɔ tsɔe kɛ sɛ o hlami, nɛ e ya dla o blɔ ɔ ngɔ to mo.’ 11Niinɛ, i ngɛ nyɛ dee ke Yohane nɔ sɔlelɔ ɔ, nɔmlɔ adesa ko hí si hyɛ nɛ pe lɛ. Se kɛ̃ ɔ, nɔ nɛ ji nyafii pe kulaa ngɛ hiɔwe matsɛ yemi ɔ mi ɔ pe Yohane. 12#Luk 16.16 Kɛ je be mi nɛ Yohane nɔ sɔlelɔ ɔ bɔni fiɛmi kɛ ba si mwɔnɛ ligbi nɛ ɔ, hiɔwe matsɛ yemi ɔ na nɔ́ wawɛɛ nitsɛ; nɛ yiwutsotsɛmɛ hlaa kaa a maa ngɔ pani nya. 13Be nɛ Yohane na we nɛ e ba a, gbali ɔmɛ tsuo kɛ Mose mlaa a, matsɛ yemi ɔ he munyu a tuɔ. 14#Mal 4.5; Mat 17.10-13; Mar 9.11-13 Ke nyɛ suɔ kaa nyɛ ma he a sɛ gbi ɔ nyɛɛ ye ɔ, Yohane ɔ ji Eliya nɛ maa ba a nɛ. 15Nɔ nɛ ngɛ tue ɔ, e nu!

16“Mɛni he po ma ngɔ kikɛmɛ a yi nɔ bi nɛ ɔmɛ ngɔ to? A ngɛ kaa jokuɛwi nɛ hii si ngɛ jua nɔ, nɛ a ngɛ a juami bi dee ke, 17‘Wa kpã bɛ ha nyɛ, se nyɛ dui; wa nya awe, se nyɛ yi kɔmɔ.’ 18Benɛ Yohane ba a, e yi ní, nɛ e nui nɔ́ ko hulɔ. Se nɔ́ nɛ nihi tsuo de ngɛ e he ji, ‘Mumi yayami ngɛ e mi!’ 19Benɛ Nɔmlɔ Bi ɔ ba a, lɛɛ e yeɔ ní, nɛ e nuɔ wai. Nɛ nɔ́ nɛ nihi deɔ ji, ‘Hyɛ, jiklɔɔtsɛ, kɛ dã nulɔ; tó tsuli, kɛ yayami peeli a huɛ ɔ ji nɛ ɔ nɛ!’ Mawu nile ɔ lɛɛ níhi nɛ e tsuɔ ɔ, lɔ ɔmɛ a kɛ woɔ lɛ nguɔ.”

Nihi nɛ he we yi

(Luka 10.13-15)

20Mahi nɛ Yesu tsu nyakpɛ ní babauu ngɛ a mi ɔ, nihi nɛ ngɛ jamɛ a ma amɛ a mi ɔ tsakee we a tsui. Enɛ ɔ he je ɔ, Yesu ka a hɛ mi, nɛ e de ke, 21#Yes 23.1-18; Ezek 26.1—28.26; Yoel 3.4-8; Amos 1.9-10; Zak 9.2-4 “Korazin, musu tloo mo! Betsaida, mo hu musu tloo mo! Nyakpɛ ní babauu nɛ a pee ngɛ nyɛ mi ɔ, a ya pee ngɛ Tiro, kɛ Sidon mohu jinɛ a tsake a tsui momoomo. Jinɛ Tiro, kɛ Sidon bi ma bu kpekpe ya bo, nɛ a maa ngɔ a he kɛ wuwlua la zu mi kɛ tsɔɔ kaa a tsake a tsui niinɛ. 22I ngɛ nyɛ dee ke, kojomi ligbi ɔ, Mawu maa na Tiro kɛ Sidon bi mɔbɔ kulaa pe nyɛ! 23#Yes 14.13-15; Mose I, 19.24-28 Nɛ mo, Kapernaum, tse o ngɛ blɔ hyɛe kaa a ma wo o nɔ kɛ ya hiɔwe lokoo? Siu! Dla o he! Abosiami la a mi mohu a ma sake mo kɛ fɔ! Nyakpɛ ní babauu nɛ a pee ngɛ o mi ɔ, a ya pee ngɛ Sodom jinɛ e ko hi si kɛ ba si mwɔnɛ ɔ. 24#Mat 10.15; Luk 10.12 I ngɛ mo dee ke kojomi ligbi ɔ, Mawu maa na Sodom mɔbɔ kulaa pe mo.”

Nyɛɛ ba ye ngɔ nɛ nyɛ ba jɔɔ nyɛ he

(Luka 10.21-22)

25Jamɛ a be ɔ mi ɔ, Yesu de ke, “Tsaatsɛ, hiɔwe kɛ zugba Nyɔmtsɛ! I naa mo si, ejakaa níhi nɛ o ngɔ kɛ laa ní leli, kɛ ga leli ɔ, o je kɛ tsɔɔ nihi nɛ li nɔ́ ko. 26Ee, Tsaatsɛ, bɔ nɛ o suɔ kaa e ba mi ji nɛ ɔ nɛ.

27 # Yoh 3.35; 1.18; 10.15 “Tsaatsɛ tu níhi tsuo ngɔ wo ye dɛ mi. Nɔ ko nɔ ko li Bi ɔ, ja Tsɛ ɔ pɛ; nɔ ko nɔ ko li Tsɛ ɔ, ja Bi ɔ kɛkɛ, kɛ nihi nɛ Bi ɔ suɔ kaa e maa tsɔɔ mɛ Tsɛ ɔ.

28“Nyɛ nihi tsuo nɛ nyɛ tloo tlomi nɛ pɔ tɔ nyɛ, nyɛɛ ba ye ngɔ, nɛ ma ha nɛ nyɛɛ jɔɔ nyɛ he. 29#Yer 6.16 Nyɛɛ ngɔ ye kuɛpã tso ɔ ngɔɔ tloo, nɛ nyɛɛ kase mi; ejakaa ye he jɔ, nɛ i baa ye he si kɛ jee ye tsui mi. Ke nyɛ pee ja a, nyɛ ma na he jɔmi; 30ejakaa ye kuɛpã tso ɔ tloomi wɛ, nɛ ye tlomi ɔ hu jiɔ we.”

Currently Selected:

Mateo 11: Dangme

Highlight

Copy