Luka 5
5
Yesu tsɛ e kekleekle kaseli
(Mateo 4.18-22; Marko 1.16-20)
1 #
Mat 13.1-2; Mar 3.9-10; 4.1 Ligbi ko ɔ, benɛ Yesu daa si ngɛ Genesaret taku ɔ nya a, nihi fuu ba pue e nɔ nɛ a bu Mawu munyu ɔ tue. 2E na lɛ enyɔ nɛ a muɔ mɛ si ngɛ taku ɔ nya; se hɛli ɔmɛ je a mi, nɛ a ya ngɛ a ya amɛ a he fɔe. 3Yesu ya sɛ lɛ ɔ kake mi, nɛ e de Simon nɛ ji lɛtsɛ ɔ ke e tsɛ̃ lɛ ɔ yi se bɔɔ kɛ wo pa a mi. Yesu hi si ngɛ lɛ ɔ mi jehanɛ, nɛ e bɔni ma kpekpemi ɔ ní tsɔɔmi.
4Benɛ e kpa munyu ɔ tumi ɔ, e de Simon ke, “Nyɛ hlui kɛ ya pa a nɔ he nɛ mi kuɔ. Nyɛ ya pue nyɛ ya a ngɛ lejɛ ɔ konɛ nyɛɛ gbe lo.”
5 #
Yoh 21.3
Simon he nɔ ke, “Nyɔmtsɛ, wa tsu ní wawɛɛ nyɔ nɛ ɔ mi tsuo, nɛ wa nɛ nɔ́ ko. Se kɛ̃, akɛnɛ mo lɛ o de ɔ, ma pue ya a.” 6#Yoh 21.6 A hlui kɛ ya he nɛ pa a mi kuɔ ngɛ, nɛ a pue ya a. A gbe lo babauu, nɛ e piɛ bɔɔ nɛ ya a hía. 7Lɔ ɔ he ɔ, a fɔ a huɛmɛ nɛ ngɛ lɛ kpa a mi ɔ nine ke a ba piɛ a he. A ba, nɛ a ba wo lɛ enyɔ ɔmɛ tsuo a mi lo tɔtɔɔtɔ kɛ ya si lɛ ɔmɛ miɔ nɛ a ma mu. 8Benɛ Simon Petro na nɔ́ nɛ ba a, e kpla si ngɛ Yesu nane nya, nɛ e de ke, “Nyɔmtsɛ! Jee ye kasa nya, ejakaa yayami peelɔ ji mi!”
9E kɛ nihi nɛ piɛ e he ɔ tsuo a he mi po ngɛ lo babauu ɔ nɛ a gbe ɔ he. 10Simon huɛmɛ, Yakobo, kɛ Yohane, Zebedeo bimɛ ɔmɛ hu a he mi po ja nɔuu. Jehanɛ Yesu de Simon ke, “Koo ye gbeye! Kɛ je mwɔnɛ ɔ kɛ yaa a, o maa hɛ nimli ha mi kaa bɔ nɛ a hɛɛ lo.”
11A sã lɛ ɔmɛ kɛ fɔ kpo, nɛ a si a nɔ́ tsuaa nɔ́, nɛ a ya nyɛɛ Yesu se.
Yesu tsa nyumu ko
(Mateo 8.1-4; Marko 1.40-45)
12Be ko ɔ, Yesu ya je ma ko mi, nɛ nyumu ko nɛ he womi nɔ hiɔ yaya ngɛ e he hu ngɛ lejɛ ɔ. Benɛ e na Yesu ɔ, e kpla si, nɛ e kɛ e hɛ mi bu si, nɛ e kpa lɛ pɛɛ ke, “Nyɔmtsɛ, ke o suɔ ɔ, o ma nyɛ ha ye he nɛ tsɔ.”
13Yesu kpa e nine mi, nɛ e ta nyumu ɔ he, nɛ e de lɛ ke, “Ee, i suɔ! A tsa mo!” Nɛ amlɔ ɔ, hiɔ ɔ ta. 14#Mose III, 14.1-32 Yesu fa lɛ ke, “Ko de nɔ ko nɔ ko oo! Yaa tɛɛ nɛ o kɛ o he ya tsɔɔ osɔfo ɔ, nɛ e hyɛ mo! Lɔ ɔ se ɔ, yaa, nɛ o ya sã bɔ kaa bɔ nɛ Mose wo mlaa a, nɛ e pee okadi ha nihi tsuo kaa o he tsɔ niinɛ.”
15Se Yesu he sane gbɛ fĩa he tsuaa he mohu. Enɛ ɔ he je ɔ, nimli babauu baa e ngɔ, konɛ a ba bu lɛ tue, nɛ a tsa a hiɔhi ha mɛ hulɔ. 16Se ke pee ɔ, e gblaa e he si kɛ yaa nga a nɔ he ko banee, nɛ e ya sɔleɔ.
Yesu tsa nyumu ko nɛ hule pue si
(Mateo 9.1-8; Marko 2.1-12)
17Ligbi ko benɛ Yesu ngɛ ní tsɔɔe ɔ, Farisi bi komɛ, kɛ mlaa tsɔɔli komɛ hii si ngɛ lejɛ ɔ. A je Galilea ma amɛ tsuo a mi, kɛ Yudea, kɛ Yerusalem kɛ ba. Nɛ Mawu ha Yesu he wami nɛ e kɛ tsa hiɔtsɛmɛ. 18Ni komɛ hɛɛ nyumu ko nɛ hule ngɛ sa mi kɛ ba, nɛ a ka kaa a kɛ lɛ maa sɛ we ɔ mi, nɛ́ a ngɔ lɛ ya fɔ Yesu hɛ mi. 19Se nimli kpekpemi ɔ a he je ɔ, a nɛ blɔ nɛ a kɛ lɛ nɛ ya lejɛ ɔ. Lɔ ɔ he ɔ, a kuɔ kɛ ya tsu ɔ yi mi, nɛ a ya kpɔ zu longo ɔ eko, nɛ a siu hiɔtsɛ ɔ, kɛ e sa a kɛ gu puɔ ɔ mi kɛ ya fɔ ni ɔmɛ a kpɛti, ngɛ Yesu hɛ mi. 20Benɛ Yesu na hemi kɛ yemi nɛ ni ɔmɛ kɛ tsu ní ɔ, e de hiɔtsɛ ɔ ke, “Maminyumu! A kɛ o he yayami ɔmɛ pa mo.”
21Jehanɛ, mlaa tsɔɔli ɔmɛ, kɛ Farisi bi ɔmɛ bɔni a he bimi ke, “Nɔmlɔ nɛ ɔ, mɛnɔ ji lɛ loko e ngɛ musu bɔmi munyu tue kikɛ nɛ ɔ? Mɛnɔ ma nyɛ ngɔ yayami kɛ pa, kaa ja Mawu pɛ?”
22Benɛ Yesu na a juɛmi ɔ, e bi mɛ ke, “Mɛni nyɛ ngɛ susue ɔ? 23Ke a de ke, ‘A ngɔ o he yayami ɔmɛ ngɔ pa mo’ ɔ, tse lɔ ɔ demi wa pe kaa a ma de ke, ‘Tee si nɛ o nyɛɛ lo?’ 24Lɔ ɔ he ɔ, ma tsɔɔ nyɛ kaa Nɔmlɔ Bi ɔ ngɛ he blɔ ngɛ je ɔ mi kaa e ngɔɔ yayamihi kɛ paa.” Kɛkɛ nɛ e de nyumu ɔ nɛ hule ɔ ke, “I ngɛ mo dee ke tee si! Ngɔɔ o sa a, nɛ o ho we mi ya!”
25Amlɔ ɔ, nyumu ɔ te si ngɛ ni ɔmɛ tsuo a hɛ mi; e ngɔ sa a nɛ e hwɔ nɔ ɔ, nɛ e je kɛ ho we mi ya. Benɛ e yaa a tsuo e ngɛ Mawu yi jee. 26Mɛ tsuo a he mi po, nɛ a ye gbeye, nɛ a je Mawu yi, nɛ a de ke, “Wa na nyakpɛ ní mwɔnɛ ɔ!”
Yesu tsɛ Levi
(Mateo 9.9-13; Marko 2.13-17)
27Enɛ ɔ se ɔ, Yesu je kpo, nɛ e ya na tó tsulɔ ko nɛ hii si ngɛ tó tsumi he ɔ; e biɛ ji Levi. Yesu de lɛ ke, “Ba nyɛɛ ye se!” 28Kɛkɛ nɛ Levi te si, nɛ e si e nɔ́ tsuaa nɔ́, nɛ e nyɛɛ Yesu se.
29Levi ngmɛ okplɔɔ nguaa ngɛ e we ɔ mi kɛ wo Yesu hɛ mi nyami, nɛ tó tsuli, kɛ ni kpahi fuu kɛ mɛ ba ye ní. 30#Luk 15.1-2 Kɛkɛ nɛ Farisi bi komɛ, kɛ mlaa tsɔɔli komɛ tu munyu huitihuiti kɛ si Yesu kaseli ɔmɛ ke, “Mɛni he je nɛ nyɛɛ kɛ tó tsuli, kɛ yayami peeli ngɛ ní yee, nɛ nyɛɛ kɛ mɛ ngɛ ní nue ɔ?”
31Yesu de mɛ ke, “Nihi nɛ ngɛ he wami ɔ, e hia we mɛ tsopatsɛ; nihi nɛ be he wami ɔ, mɛ mohu lɛ tsopatsɛ hia. 32I bɛ dali tsɛmi; mohu ɔ, i ba nɛ ma ba tsɛ yayami peeli, konɛ a tsake a tsui.”
Hwɔ hami
(Mateo 9.14-17; Marko 2.18-22)
33Ni komɛ ba de Yesu ke, “Yohane kaseli ɔmɛ pɔɔ hwɔ hami kɛ sɔlemi, nɛ Farisi bi ɔmɛ a kaseli ɔmɛ hu peeɔ ja nɔuu; se moo lɛɛ o kaseli ɔmɛ yeɔ ní, nɛ a nuɔ ní.”
34Yesu bi mɛ ke, “Ke nɔ ko kpee yo, nɛ e huɛmɛ ba e he nyami ɔ, anɛ nyɛ susuɔ kaa e maa ha mɛ hwɔ be mi nɛ e kɛ mɛ ngɛ ɔ lo? Dɛbi! 35Se be ma, nɛ a maa ngɔ ayɛflo huno ɔ kɛ je a he kɛ ho; nɛ jamɛ a be ɔ loko a maa ha hwɔ!”
36Yesu bu mɛ abɛ nɛ ɔ hu ke, “Nɔ ko gba we tade he nya kɛ ta we tade momo mi. Ke e pee ja kɛkɛ e hia tade he ɔ, nɛ tade he ɔ nya nɛ a je ɔ, kɛ tade momo ɔ hu be yae fiee. 37Jã kɛ̃ nɔ ko ngɔɛ wai he wui lohwe he womi tɔ momohi a mi. Ke e pee ja a, wai he ɔ ma pɛ lohwe he womi tɔ ɔmɛ, nɛ e ma pue si, nɛ lohwe he womi tɔ ɔmɛ hu ma puɛ. 38Wai he ɔ, lohwe he womi tɔ hehi a mi nɛ e sa kaa a kɛ woɔ! 39Jehanɛ ɔ hu, nɔ ko nui wai momo, nɛ e ya hlaa wai he se blɔ amlɔ. Nɔ́ nɛ e deɔ ji, ‘Momo ɔ hi!’ ”
Currently Selected:
Luka 5: Dangme
Highlight
Share
Copy
Want to have your highlights saved across all your devices? Sign up or sign in
Bible in Dangme © Bible Society of Ghana, 2018.