Romnima 1

1Gbaŋ ŋɔ yila man’ Pool ŋun nyɛ Yisa Masia dab’ so Naawuni ni pii ka boli ni n leei tumo m-moli ŋun’ Naawuni lahibal’ suŋ la sanna.

2Naawuni daa pun lo lahibal’ suŋ ŋɔ alikauli o daanabinim’ noya ni ka di yuui, hal ka di yɛla sab’ Naawuni Kundi ni. 3Lahibal’ suŋ maa wuhirila o Bia yɛla: Zaŋ chaŋ o daadamtali polo, bɛ daa dɔɣ’ o la Naa Dauda zuliya ni; 4ka zaŋ chaŋ o Naawunitali mi polo, yiko shɛli din daa chɛ ka o neei kum ni la kahigi wuhi ni o nyɛla Naawuni Bia. Ŋuna n-nyɛ ti Duuma Yisa Masia so 5ŋun zuɣu chɛ ka Naawuni daa niŋ alibarika niŋ ti ni, ka chɛ ka n leei tumo ni n wuhi zuliya kam zaa ka bɛ deeg’ o noli n-niŋ yɛda o yuli zuɣu la. 6Yinim’ bɛn be Rom gba be Naawuni ni boli shɛba ni bɛ leei Yisa Masia niriba maa kalinli ni.

7N sabiri gbaŋ ŋɔ tirila yinim’ bɛn zaa be Rom n-nyɛ Naawuni ni yuri shɛba ka boli ya ni yi leeg’ o ninvuɣ’ gahinda la:

Ti Ba Naawuni mini ti Duuma Yisa Masia niŋm’ alibarika niŋ yi ni, ka tin ya suhudoo!

Naawuni suhibu din nyɛ wumpaɣibo

8Din daŋ tooni nyɛla Yisa Masia zuɣu m paɣiri Naawuni yi zaa zuɣu, dama yi yɛda niŋbu moli gili dunia ŋɔ zaa. 9N ni tumdi Naawuni so tuma ni n suhu zaa o Bia lahibal’ suŋ tuma ni la di ma shɛhira ni n suhiri Naawuni tiri ya sahakam, 10ka kul suhiri Naawuni ni di yi nyɛ o yubu, ŋun’ malim’ soli ti ma ka m bahi ka yi sanna pumpɔŋɔ; 11dama n suhu kul yɛmi ni n nyan ya n-zaŋ Naawuni Shia Kasi pin’ shɛli kpaŋsi ya. 12N ni yɛli shɛm maa wuhiri ni ti yɛda niŋbu ni kpaŋsi tab’ suhuri: Yi yɛda ni kpaŋsi n suhu, ka n gba yɛda kpaŋsi yi gba suhuri.

13 # Tuma 19.21 M mabihi, m bɔri ni yi baŋ ni n kul lɔri nia ni n ka yi sanna ti sɔŋ yi ni shɛb’ ka bɛ niŋ Yisa yɛda kaman n ni pun niŋ shɛm bɛn pa Yɛhudianim’ shɛb’ san’ la; amaa ka yɛl’ shɛŋa kul guri ma soli hal ni pɔŋɔ. 14Yɛl’ tibisili fukumsi n-ʒi n zuɣu zaŋ chaŋ sokam zaa polo: Bɛn mi biɛhigu soli mini bɛn ʒi biɛhigu soli ni bɛn mi gbaŋ mini bɛn ʒi gbaŋ. 15Dina n-chɛ ka n suhu kul yɛya ni n yihi Yisa lahibal’ suŋ waazu n-ti yinim’ bɛn be Rom ŋɔ gba.

Lahibal’ suŋ yiko

16 # Maak 8.38 Vi bi mali ma lahibal’ suŋ maa zuɣu, dama lahibal’ suŋ maa nyɛla Naawuni yiko din tiligiri ŋunkam niŋ li yɛda; Yɛhudianima n-daŋ tooni ka bɛn pa Yɛhudianim’ paya. 17#Hab 2.4 Lahibal’ suŋ maa wuhiri Naawuni ni chɛri ka nir’ yiri taali ni ŋun’ Naawuni sani o yɛda niŋbu zuɣu shɛm. Di piligu ni zaŋ hal ni di naabu ni, di kul nyɛla yɛda niŋbu zuɣu kaman di ni sab’ Naawuni Kundi ni shɛm la: Ŋun yi taali ni Naawuni sani kul ni bela o yɛda niŋbu zuɣu.

Daadamnim’ taali yɛla

18Naawuni ŋun be alizanda ni ŋɔ kahig’ o suhu ni yiɣisi bahi tuun’ shɛŋa din bi doli wuntia soli mini tuumbiɛ’ shɛŋa zaa ninsalinim’ ni tumdi zuɣu wuhi, dama bɛ zaŋdi bɛ tuumbiɛri maa guri yɛlimaŋli soli. 19Ninsalinim’ ni yɛn niŋ shɛm tooi baŋ Naawuni yɛla zaa dola palɔni bɛ sani, dama Naawuni maŋmaŋa m-pun kahigi li wuhi ba. 20Dunia ŋɔ nambu piligu ni hal ni pɔŋɔ Naawuni biɛhigu shɛli ti nini ni ku tooi nya ka di nyɛ o Naawunitali min’ o yiko din ka bahigu la dola palɔni, ka ninsalinim’ nyari li o ni nam binshɛŋa la ni. Dinzuɣu bɛ lan ka soli din ni doli yi taali ni. 21#Ɛfɛs 4.17-18 Bɛ ni baŋ Naawuni maa zaa yoli: Bɛ bi tir’ o jilima kaman Naawuni; bɛ mi bi puhir’ o taalitaali; amaa ka bɛ tɛha zaa naɣ’ leela tɛhi’ yoya, ka zibisim zibigi bɛ tɛhi’ yoya maa ni. 22Bɛ yɛri ni bɛ nyɛla yɛnnima, ashee bɛ nyɛla jɛra. 23#Zal 4.16-18 Bɛ zaŋ Naawuni ŋun bi kpiri ŋɔ jilima taɣi ti binnana din ŋmani ninsalinim’ bɛn kpiri ŋɔ bee noonsi bee biŋkɔbiri bee biŋgbamda.

24Lala zuɣu ka Naawuni chɛ ba bahi ka bɛ doli bɛ suhuri ni kɔr’ biɛri soli n-tumdi tuun’ shɛŋa ni bɛ taba, ka di dihiri bɛmaŋmaŋ’ nama vi. 25Bɛ zaŋ yɛlimaŋli zaŋ chaŋ Naawuni yɛla polo taɣi ʒiri, ka doli binnamda n-jɛmdi li ka chɛ Naawuni ŋun nyɛ binnamda zaa namda ŋɔ. Ŋuna n-nyɛ ŋun simdi paɣibu hal ni saha din ka bahigu! Ami!

26Dimbɔŋɔ zuɣu ka Naawuni chɛ ba bahi ka bɛ tumdi kɔr’ biɛri tuma: Bɛ paɣiba ŋmaligi n-gɔndila bɛ paɣ’ taba; 27ka dɔbba gba chɛ paɣiba golibu ka ŋmaligi doli bɛ suhuri ni kɔr’ biɛri n-gɔndila bɛ dɔtaba, ka bɛ kɔr’ biɛri tuma maa zuɣu chɛ ka bɛ nyari tibidarigibo din simdi bɛ tuumbiɛri maa.

28Bɛ ni bi lihi Naawuni kaman Naawuni maa zuɣu ka o chɛ ba bahi, ka bɛ tɛhiri tɛhi’ biɛri ka tumdi din chihiri tumbu. 29Ka bɛ suhuri pali ninvuɣ’ biɛtali balibu kam. Dina n-nyɛ: Tuumbiɛri mini bina ni kɔre kpɛbu ni biɛr’ biɛɣu ni nyuli ni ninvuɣ’ kubo ni naŋgbankpeeni ni yɔhiŋ ni jɛlinsi. Bɛ nyɛla munaafichinim’ mini 30nyaanzuriba ni bɛn je Naawuni ni ninʒeensinima ni karimbaannima ni barinyuriba ni tuumbiɛri so’ pala bɔriba ni bɛn bi deeri bɛ laamba noli 31ni jɛra ni bɛn bi ʒe yim ni ninkuunsinima ni bɛn bi zɔri nambɔɣu. 32Bɛ ni mi ni Naawuni zaligu wuhiya ni bɛn tumdi dimbɔŋɔnim’ simdi kum maa zaa yoli, bɛmaŋmaŋ’ gba kul tumdi li mi hal ka ʒe bɛn gba tumdi li nyaaŋa.

Currently Selected:

Romnima 1: DBwDB

Highlight

Copy