Kahigibu 16

Lahi din pali Naawuni suhuyiɣisili

1Di saha ka n daa wum kukol’ tital’ shɛli damli Naawuni jɛmbu duu maa ni ka di yɛri malaikanima ayopɔin la, “Zaŋmiya Naawuni suhuyiɣisili ni pali lah’ ayopɔin shɛŋa la n-chaŋ ti kpaai bahi dunia ni!” 2#Yibu 9.10 Ka malaika ŋun daŋ tooni daa chaŋ ti kpaag’ o laa ni dini bahi dunia ni, ka yuma din bie ka kabiri ʒim daa niŋ ninvuɣ’ shɛb’ bɛn mali biŋkɔbigu la dalinli ka jɛmd’ o binnan’ la. 3Ka malaika ŋun pah’ ayi daa kpaag’ o laa ni dini bahi teeku ni, ka di niŋ kaman kpim’ ʒim la, ka binnɛɔŋ kam ŋun be teeku maa ni kpi. 4#Yibu 7.17-21; Yila 78.44 Ka malaika ŋun pah’ ata daa kpaag’ o laa ni dini bahi mɔɣa mini kɔbilisirima ni, ka di leei ʒim.

5Ka n daa wum ka malaika ŋun su kom fukumsi yɛli,

“Yaa ti Duuma ŋun nyɛ kasitalilana ka be ka daa pun be ŋɔ,

a saria karibu ŋɔ nyɛla din tuhi!

6A zaŋ ʒim ti bɛn daa yih’ a wuntizɔriba

mini anabinim’ ʒim la ni bɛ nyu.

Di ni simdi ni a niŋ ba shɛm m-bala.”

7Ka n daa wum ka kukol’ shɛli yi bimbin’ ni na yɛra,

“Yɛlimaŋli, ti Duuma Naawuni Zallakudura Naa,

a saria karibu nyɛla yɛlimaŋli ni din tuhi!”

8Ka malaika ŋun pah’ anahi daa kpaag’ o laa ni dini m-bahi wuntaŋ’ zuɣu, ka ti o yiko ni o tulim be kaman buɣim la n-wɔb’ daadamnima; 9ka tulim maa daa kpe daadamnim’ pam hal ka bɛ ti turi Naawuni ŋun su alɔbo balibu kam maa fukumsi la, ka zaɣisi ni bɛ ku niŋ tuuba n-ti o jilima.

10 # Yibu 10.21 Ka malaika ŋun pah’ anu daa kpaag’ o laa ni dini bahi biŋkɔbigu la nam ʒiishee, ka o nam sulinsi tariga zaa daa zibigi, ka niriba daa dimdi be zilima biɛrim zuɣu, 11ka turi Naawuni ŋun su alizanda ŋɔ bɛ ni daa nya biɛrim shɛli maa mini yuma din gbahi ba la zuɣu, ka zaɣisi ni bɛ ku niŋ tuuba bɛ tuumbiɛri zuɣu. 12#Aiz 11.15 Ka malaika ŋun pah’ ayɔbu daa kpaag’ o laa ni dini m-bahi Yufretiiz Mɔɣili din galisi pam la ni, ka di kom nyuui zaa ni di mali soli ti wulimpuhili polo nanima. 13Ka n daa nya shi’ biɛr’ ata bɛn ŋmani poloya, ka bɛ yiri waɣ’ biɛ’ tital’ la mini biŋkɔbigu la ni anabi ʒirilan’ la noya ni na. 14Bɛ nyɛla alizin’ biɛri n-chani dunia nanim’ zaa sani nti wuhiri shihira ni bɛ laɣim ba lo tɔbu gu Naawuni Zallakudura Naa ŋɔ dabisi’ tital’ la dali. 15#Mat 24.43-44; Luk 12.39-40; Kah 3.3 Ti Duuma yɛliya, “Nyama, n ni kana kaman tayiɣ’ la! Ŋum bi gbihiri ka mal’ o binyɛra zali ni o di ti chaŋ o zaɣim n-dih’ omaŋ’ vi mal’ alibarika!” 16#2 Nan 23.29; Zak 12.11 Ka alizin’ biɛri maa daa laɣim dunia ŋɔ nanim’ zaa n-zali luɣ’ shɛli bɛ ni booni Hiburuli ni Aamagɛdɔn la. 17Ka malaika ŋun pah’ ayopɔin mi daa kpaag’ o laa ni dini bahi pɔhim ni, ka kukol’ shɛli daa yi jɛmbu duu nam ʒiishee la na n-tahiri pampam yɛra, “Di naaya!” 18#Kah 8.5; 11.13, 19 Ka saa daa gbaai nyaɣisibu ka tahira, ka vuri mɔni, ka tiŋgbani daa dam pam, ka tiŋgbani dambu lala tatabo daa na ʒi n-niŋ daadamnim’ nambu piligu ni zaŋ kana di saha maa. 19#Aiz 51.17 Ka tin’ tital’ la daa bɔɣi ʒii buta, ka zuliya kam tinsi daa lu n-dahim zaa. Ka Naawuni daa teei Babilɔn din nyɛ tin’ tital’ la yɛla, ka zaŋ o suhuyiɣisili wain pipia la n-ti Babilɔnnima ni bɛ nyu di zaa. 20#Kah 6.14 Ka tiŋgban’ bihi din zaa be teeku sunsuuni daa vuui, ka zoya zaa gba vuui; 21#Yibu 9.23; Kah 11.19 ka sakuɣ’ kara din tibisim sania zuɣu nyɛ kaman kilɔgiram pihinahi ni anu daa yi zuɣusaa n-luri niriba zuɣu na hal ka bɛ ti turi Naawuni alɔbo sakuɣa maa zuɣu. Di daalɔbo maa daa mali dabiɛm pam.

Currently Selected:

Kahigibu 16: DBwDB

Highlight

Copy

Compare