Filipainima 4

1Dinzuɣu m mabiyurisi bɛn nyɛ n suhu ni kul ye shɛb’ nyabu zuɣu la, yinima n-nyɛ bɛn chɛ ka m mali suhupiɛlli, ka nyuri bara yi zuɣu. M mabiyurisi, bamiya zani viɛnyɛliŋga ti Duuma ni! 2N kpamdi Yuɔdia mini Sintike jaande ni bɛ zaŋm’ bɛ noya naai taba ti Duuma zuɣu. 3Ka nyini ŋun nyɛ n tumtumdikpee ŋɔ, n suhir’ a ni a sɔŋmi paɣiba maa, dama m mini ba zaŋ tabili Klɛmɛnt ni n tumtumditaba bɛn yuya sabi nyɛvili litaafi ni la n-daa laɣim tumdi lahibal’ suŋ molo molibu tuma.

4Kul maliya suhupiɛlli ti Duuma zuɣu sahakam; n lan yɛri ya mi yaha, kul maliya suhupiɛlli!

5Maliya biɛrisuŋ zaŋ chaŋ sokam zaa sani. Ti Duuma labbuna miriya. 6Di chɛliya ka yi suhuri jiɣindi shɛli zuɣu, amaa yi suhigu zaa puuni, yɛlimiya Naawuni yi ni bɔri shɛli, ka kul balimmiya Naawuni ni wumpaɣibo din yiri yi suhuri ni na. 7Ka Naawuni suhudoo din yaɣi ninsal’ milinsi zuɣu la ni gbibi yi suhuri mini yi tɛha Yisa Masia ni.

8M mabihi, din bahindi nyaaŋa nyɛla ŋ-ŋɔ, chɛliya ka binshɛɣukam din viɛli ka simdi paɣibu n-kul be yi tɛha ni. Dina n-nyɛ: Binshɛŋa din nyɛ yɛlimaŋli mini binshɛŋa din tahiri sizuura lubu na ni binshɛŋa din tuhi ni binshɛŋa din be kasi ni binshɛŋa din mali jiri ni binshɛŋa din mali jilima! 9Doliya yi ni bɔhim shɛli mini yi ni deei shɛli n san’ la zaŋ tabili n yɛtɔɣa mini n tuma; ka Naawuni ŋun tiri ti suhudoo la ni be yi sani.

Pool puhi bɛn ti o pini

10M mali suhupiɛlli pam ti Duuma zuɣu, dama di ni yuui pam la nyaaŋa yi lan wuhi ni yi baɣa be n ni. M bi yɛlimi ni yi chɛ ma la lihibu, amaa yi yi bi nyala soli din ni doli niŋ li. 11M bi yɛli dimbɔŋɔ ni di wuhi ni n kɔŋla shɛli, dama m bɔhim ni n chɛ ka n nini tiɣi n ni mali shɛli. 12M mi kɔŋsim biɛhigu, ka mi malibu gba biɛhigu. M pun bɔhim baŋ ashili ŋɔ: N ni be luɣ’ shɛlikam mini saha shɛlikam zaa puuni, n yi nya n-di bee n yi gbe kum, ka n yi mali pam bee n yi malila biɛla n nini tiɣiri li mi. 13N ni tooi niŋ shɛlikam zaa Masia ni tiri ma yaa la zuɣu.

14Amaa yi ni daa niŋ ma nirilim sɔŋ ma n wahala puuni la viɛli pam. 15#2 Kɔr 11.9 Yinim’ Filipainim’ mi ka biɛhiŋ kani ni lahibal’ suŋ molo molibu piligu ni saha, n ni daa yiɣisi Masidɔnia la, yi kɔŋko n-daa nyɛ cheechi shɛli niriba bɛn pahi n zuɣu baŋ deebu mini tibu yɛla. 16#Tuma 17.1 Saha shɛli n ni daa ti be Tɛsalɔnaika la yi daa tim sɔŋsim na ti ti ma, ka daa lan niŋ lala di nyaaŋa zaŋ chana. 17Di bi wuhiri ni n yula pina deebu hali, amaa n lee bɔrimi ni yi nya laara pahi. 18#Yibu 29.18 Yi ni ti ma shɛlikam la shɛhira gbaŋ m-bɔŋɔ, hal yi ni daa ti ma shɛli maa yaɣi n ni bɔri shɛm zuɣu gba. Ka Ɛpafurɔditus ni daa zaŋ yi pina la zaa na ti ti ma la zuɣu chɛ ka n yipa mali din simdi ma zaa pumpɔŋɔ. Yi pina maa ŋmanila tulaale zim sara maligu Naawuni sani, ka nyɛ o ni deeri shɛli ni din tiɣir’ o nini. 19N Duuma Naawuni ni tin ya din simdi ya zaa o bundaantali din be Yisa Masia ni la zaa puuni. 20Ti Duuma Naawuni ŋun nyɛ ti Ba ŋɔ simdi paɣibu pumpɔŋɔ hal ni saha din ka bahigu! Ami!

Puhigu din bahindi nyaaŋa

21Puhimiya Naawuni ninvuɣ’ gahinda bɛn be Yisa Masia ni la zaa ti ma. Ti mabihi bɛn be n san’ la puhiri ya. 22Yisa nyaandoliba zaa bɛn be kpe ŋɔ puhiri ya, di bahi bamdi bɛn be Naa Siiza yiŋ’ la. 23Ti Duuma Yisa Masia daalibarika kpalimmi be yi ni!

Currently Selected:

Filipainima 4: DBwDB

Highlight

Copy