Failimɔn 1

1Man’ Pool ŋun nyɛ dansarika Yisa Masia zuɣu la mini ti mabia Timoti n-sabiri gbaŋ ŋɔ tiri Failimɔn ŋun nyɛ ti tumtumdikpe’ so ti ni yuri la 2#Kol 4.9 mini yɛdaniŋdiba bɛn laɣind’ o yiŋ’ la ni ti tizɔpaɣa Afia ni Aakipus ŋun nyɛ ti tɔbbikpee la. 3Ti Ba Naawuni mini ti Duuma Yisa Masia niŋm’ alibarika niŋ yi ni, ka tin ya suhudoo!

Failimɔn yɛda niŋbu min’ o yurilim

4M mabia Failimɔn, n yi ti suhiri Naawuni tir’ a, n kul paɣir’ o mi sahakam, 5dama n wum a ni niŋ ti Duuma Yisa yɛda shɛm min’ a ni yuri Yisa nyaandoliba shɛm la yɛla. 6N suhiri Naawuni ni a ni mali yurilim shɛli din yi a yɛda niŋbu ni na maa ni kpaŋs’ a ka a baŋ bin’ sun shɛŋa zaa ti ni mali Masia ni la viɛnyɛliŋga. 7M mabia, a yurilim maa zuɣu chɛ ka n nya suhupiɛlli mini suhukpaŋsibo, dama Yisa nyaandoliba nyari suhukpaŋsibo a sani.

Pool gbaai Failimɔn napɔŋ ti Onɛsimus

8Daliri ŋɔ zuɣu, hal n ni mali suhukpeeni Masia zuɣu ni n tooi wuh’ a di ni niŋ kamaata ni a niŋ shɛm la zaa yoli, 9yurilim zuɣu chɛ ka n naɣ’ suhir’ a mi. Man’ Pool ŋun nyɛ ninkurigu ka lan nyɛ dansarika Yisa Masia zuɣu la 10#Kol 4.9 suhir’ a n ni leei bi’ so ba sarika ŋɔ ni la zuɣu. Bia maa n-nyɛ Onɛsimus. 11Saha shɛli ha o daa ka a buchi, amaa pumpɔŋɔ o nyɛla ŋun mali buchi m min’ a zaa sani. 12Ka pumpɔŋɔ n labisir’ o mi na ni n ti ti a, dimbɔŋɔ wuhiri ni n zaŋla n suhu m-pah’ o zuɣu ti a. 13N di yuya ni o be n sani n-zan’ a zaani n-sɔŋdi ma n ni be sarika ŋɔ ni lahibal’ suŋ la zuɣu saha shɛli ŋɔ, 14amaa m bi bɔri ni n niŋ shɛli ka di pala a yubu ni, dama m bɔri ni a tuun’ suŋ yila amaŋmaŋ’ yubu ni na, ka pa ni muɣisigu ni na. 15Di pa shɛli Onɛsimus daa yi a sani n-zomi ni o yi kpaŋ’ biɛla, ka ti lan lab’ a sanna n-yipa ti beni sahakam. 16Ka pumpɔŋɔ o lan pala dabili kɔŋko, amaa o gari dabili; o yipa nyɛla ti mabiyurigu Masia ni. O mali ma buchi pam, amaa nyini ka o lee ni mali buchi pam, o ni nyɛ a dabili la min’ o ni nyɛ a mabia ti Duuma zuɣu la puuni. 17Dinzuɣu a yi lihi ma ni n nyɛla a tumtumdikpee, nyin’ deem’ o kaman a ni ni deei ma shɛm. 18O yi daa tum a taali bee n-di a samli, nyin’ chɛ ka di dolila mani. 19Man’ Pool maŋmaŋa n-sabi ŋɔ: N ni yo a li. Hal n ni tooi yɛli ni n samli dol’ a zaŋ chaŋ amaŋmaŋ’ nyɛvili polo. 20Dinzuɣu m mabia, n suhir’ a, Niŋm’ ma nirilim ŋɔ ti Duuma zuɣu. Kpaŋsimi n suhu Masia ni. 21N ni sabiri shɛli ŋɔ puuni, n niŋ naani ni a ni niŋ n ni suh’ a ni a niŋ shɛli ŋɔ hal n-niŋ li yaɣi lala zuɣu gba. 22Ka din pahi nyɛla, m bɔri ni a mali duu zali ma, dama m mali tahima ni Naawuni ni deeg’ a suhigu, ka labisi ma ti a.

Puhigu din bahindi nyaaŋa

23 # Kol 1.7; 4.12 Ɛpafiras ŋun be sarika ŋɔ ni pahi n zuɣu Yisa Masia zuɣu la puhir’ a. 24#Tuma 12.12, 25; 13.13; 15.37-39; 19.29; 27.2; Kol 4.10, 14; 2 Tim 4.10, 11 Maak mini Aristakus ni Diimas ni Luk bɛn nyɛ n tumtumditab’ la gba puhiri ya. 25Ti Duuma Yisa Masia daalibarika kpalimmi be yi ni!

Currently Selected:

Failimɔn 1: DBwDB

Highlight

Copy

Compare