Kalinlinima 3
3
Aduna bidibisi
1Aduna mini Musa zuliya ni daa nyɛ shɛba saha shɛli Yawɛ ni daa tɔɣisi Musa yɛtɔɣa Sinai Zoli zuɣu la m-bɔŋɔ. 2#Kal 26.60 Aduna bidibisi yuya m-bɔŋɔ: O bituuli Nadab mini Abihu ni Ɛliɛza ni Itama. 3Aduna bidib’ shɛb’ bɛ ni daa pii ka booi kpam bahi bɛ zuɣu ni ni bɛ leei maligumaaniba n-tumdi tuma maligumaana tuma duu yuya m-bala. 4#Lɛv 10.1-2; Kal 26.61 Amaa Nadab mini Abihu bɛn daa kpila Yawɛ tooni, bɛ ni daa zaŋ buɣim shɛli din bi simdi n-nyo sara maligu Sinai Zoli gbini mɔɣu ni la zuɣu. Bɛ daa ka bihi, dinzuɣu Ɛliɛza mini Itama n-daa tumdi maligumaana tuma n-sɔŋdi bɛ ba Aduna o ʒiɛman’ ni.
Bɛ pii Lɛvinim’ ni bɛ sɔŋ maligumaaniba
5Ka Yawɛ daa yɛli Musa, 6“Zaŋm’ Lɛvi zuliya na nti zali Aduna ŋun nyɛ maligumaana la tooni, ka bɛ sɔŋd’ o. 7Bɛna nti yɛn be laɣiŋgu suɣili maa tooni n-tumdi tuma tir’ o mini niriba maa zaa ka tumdi Yawɛ biɛhigu shee suɣili la gba tuma. 8Bɛna n-yɛn su laɣiŋgu suɣili maa puuni nɛma fukumsi, ka tumdi tuma Yawɛ biɛhigu shee suɣili ni, ka lan tumdi tuma tiri Izraɛlnima. 9Ka a pii Lɛvinim’ maa Izraɛlnim’ ni n-zaŋ ba ti Aduna min’ o bidibisi, ka bɛ nyɛ o ni su shɛb’ fukumsi zaa. 10Amaa sabimi Aduna min’ o bidibisi maa yuya n-chɛ ka bɛ tumdi maligumaanitali tuma, ka ninvuɣ’ zino yi ka bɛ sanna, yin’ kum’ o.”
11Ka Yawɛ daa lan yɛli Musa, 12“M piila Lɛvinim’ Izraɛlnim’ puuni n-zaŋ ba zali Izraɛlnim’ bikpamba zaani. Lɛvinim’ maa nyɛla n ni su shɛba, 13#Yibu 13.2 dama bikpamba zaa nyɛla n ni su shɛba; n ni daa ku bikpamba Ijipti tiŋgbɔŋ ni la, ka n daa zaŋ Izraɛl tiŋgbɔŋ ni bikpamba bɛn nyɛ ninsalinim’ zaŋ tabili biŋkɔbiri bikpamba zaa leei n ni su shɛba. Bɛ nyɛla n ni su shɛba. Mani n-nyɛ Yawɛ.”
Bɛ kali Lɛvinima
14Ka Yawɛ daa yɛli Musa Sinai mɔɣu ni, 15“Kalim’ Lɛvinima kaman bɛ yaannim’ dunoya mini bɛ daŋ ni nyɛ shɛm dɔbba bɛn nyɛ kaman gol’ yini zaŋ chana.” 16Ka Musa daa kali ba kaman Yawɛ ni daa yɛl’ o ni o niŋ shɛm. 17Lɛvinim’ maa yuya m-bɔŋɔ: Gɛrishɔn mini Kɔhat ni Mɛrari. 18Gɛrishɔn bidibisi yuya ni bɛ daŋ ni nyɛ shɛm m-bɔŋɔ: Libini mini Shimɛi. 19Kɔhat bidibisi mini bɛ daŋ ni nyɛ shɛm m-bɔŋɔ: Amiram mini Izar ni Hiburɔn ni Uziɛl. 20Mɛrari bidibisi mini bɛ daŋ ni nyɛ shɛm m-bɔŋɔ: Mahili mini Mushi. Bɛmbɔŋɔ n-nyɛ Lɛvinim’ zuliya kaman bɛ yaannim’ dunoya ni nyɛ shɛm.
21Gɛrishɔn zuliya n-daa nyɛ Libini daŋ mini Shimɛi daŋ; Gɛrishɔn zuliya n-daa bala. 22Bɛ dɔbba bɛn daa nyɛ gol’ yini zaŋ chani zaa kalinli daa yiɣisila tusaayopɔin ni kɔbisinu. 23Gɛrishɔn zuliya maa daa tirila bɛ suɣa Yawɛ biɛhigu shee suɣili la nyaaŋa zaŋ lab’ wulinluhili polo. 24Laɛl bia Ɛliasaf n-daa nyɛ Gɛrishɔn zuliya maa dɔɣirikpɛma. 25Gɛrishɔn zuliya maa n-daa su Yawɛ chirigibu shee suɣili maa puuni mini di nyaaŋa binshɛŋa bɛ ni mali pindi li tuma fukumsi. Bɛna n-daa lan su Pateesa shɛli din yili di dunol’ ni 26mini Pateesa shɛŋa din yili dundɔŋ ni zaŋ tabili pateesa shɛli din daa yili dundɔŋ ni dunol’ ni n-liri Yawɛ biɛhigu shee suɣili mini sara maligu bimbin’ la ni di mihi zaŋ tabili di tuuni kam fukumsi.
27Kɔhat daŋ niriba n-daa nyɛ Amiram yiŋnima mini Izar yiŋnima ni Hiburɔn yiŋnima ni Uziɛl yiŋnima; Kɔhat daŋ niriba n-daa bala. 28Bɛ dɔbba bɛn daa nyɛ gol’ yini zaŋ chani kalinli daa yiɣisila tusaanii ni kɔbisiyɔbu, ka bɛ daa tumdi tuma Yawɛ biɛhigu shee suɣili ni. 29Kɔhat daŋ niriba maa daa ti bɛ suɣa zalila Yawɛ chirigibu shee suɣili maa nudirigu polo, 30ka Uziɛl bia Ɛlizafan daa nyɛ Kɔhat daŋ niriba maa dɔɣirikpɛma. 31Bɛna n-daa su Alikauli Adaka la mini teebuli ni firilatamdigu ni sara maligu bimbina ni la’ shɛŋa maligumaaniba ni daa zaŋdi tumdi tuma la zaŋ tabili Pateesa la ni di tuuni kam fukumsi.
32Aduna ŋun daa nyɛ maligumaana la bia Ɛliɛza n-daa nyɛ Lɛvinim’ kpamba maa zuɣulana; ŋuna n-daa lihiri ninvuɣ’ shɛb’ bɛn su luɣ’ kasi shee la.
33Mɛrari zuliya n-daa nyɛ Mahilinim’ daŋ mini Mushinim’ daŋ. Bɛna n-daa nyɛ Mɛrari zuliya. 34Bɛ dɔbba bɛn daa nyɛ gol’ yini zaŋ chani kalinli daa yiɣisila tusaayɔbu ni kɔbisiyi. 35Mɛrari zuliya maa dɔɣirikpɛma n-daa nyɛ Abiheel bia Zuriɛl. Bɛ daa ti bɛ suɣa zalila laɣiŋgu suɣili maa nuzaa polo. 36Mɛrari zuliya maa n-daa su Yawɛ chirigibu shee suɣili maa pundi dari mini kur’ wɔɣila ni dasara ni daantalisi ni di binzahi ni di neen’ kparisi zaa zaŋ tabili di tuuni kam fukumsi. 37Bɛna n-daa lan su daantal’ shɛŋa din daa gili di dundɔŋ la zaa mini di binzahi ni di kpahi din kpara ni di mihi fukumsi.
38Bɛn mi daa yɛn ti bɛ suɣa zali Naawuni jɛmbu shee tooni wulimpuhili polo zaŋ labi laɣiŋgu suɣili maa tooni wulimpuhili polo n-daa nyɛ Musa mini Aduna ni o bidibisi. Bɛna n-daa su tuun’ shɛŋa zaa bɛ ni tumdi Naawuni jɛmbu duu tiri Izraɛlnim’ la fukumsi; ka ninvuɣ’ zino daa yi miri nimaani na, bɛ kur’ o mi. 39Bɛ ni daa kali Lɛvinim’ shɛb’ zaa bɛn nyɛ Yawɛ ni daa zali Musa mini Aduna ni bɛ kali ba kaman sokam ni o daŋ ni nyɛ shɛm la, bɛ dɔbba zaa bɛn daa nyɛ gol’ yini zaŋ chani kalinli daa yiɣisila tuhi’ pisinaayi.
Lɛvinim’ zani bidibikpamba zaani
40Di saha ka Yawɛ daa yɛli Musa, “Sabimi Izraɛlnim’ bidibikpamba zaa bɛn nyɛ gol’ yini zaŋ chani yuya, ka kali ba. 41Mani n-nyɛ Yawɛ, Zaŋmi Lɛvinim’ zaa ti ma ka chɛ Izraɛlnim’ bidibikpamba zaa, ka zaŋ Lɛvinim’ niɣi ti ma ka chɛ Izraɛlnim’ niɣi ni tuui dɔɣi naɣibihi shɛb’ zaa.” 42Dinzuɣu ka Musa daa kali Izraɛlnim’ bidibikpamba zaa kaman Yawɛ ni daa zal’ o shɛm. 43Ka bɛ daa sabi bidibikpamba bɛn nyɛ gol’ yini zaŋ chani yuya, ka bɛ kalinli daa yiɣisi tuhi’ pisinaayi ni kɔbisiyi ni pisopɔinnaata.
44Ka Yawɛ daa yɛli Musa, 45“Mani n-nyɛ Yawɛ. Zaŋm’ Lɛvinim’ zali Izraɛlnim’ bidibikpamba zaa zaani, ka zaŋ Lɛvinim’ niɣi zali Izraɛlnim’ niɣi zaani, ka Lɛvinim’ maa nyɛ n ni su shɛba. 46Izraɛlnim’ bidibikpamba kalinli ni zooi gari Lɛvinim’ kalinli kaman ninvuɣ’ kɔbisiyi ni pisopɔinnaata la zuɣu, 47di simdi ni yi bo anzinfa laɣibaligu diba anu din nyɛ Naawuni jɛmbu duu zaligu ni wuhi anzinfa laɣibaligu shɛm tariga 48n-yo bidibikpamba bɛn kalinli pani maa zuɣu Aduna min’ o bidibisi sani.” 49Ka Musa daa deei tiliginsim liɣiri maa ninvuɣ’ shɛb’ bɛn kalinli daa pani, ka nyɛ Lɛvinim’ ni yɛn tiligi shɛb’ maa sani. 50O daa deei liɣiri maa Izraɛlnim’ bidibikpamba sani anzinfa laɣibaligu tuhili ni kɔbisita ni pihiyɔbunaanu, ka di nyɛ Naawuni jɛmbu duu zaligu ni wuhi anzinfa laɣibaligu shɛm tariga la. 51Ka Musa daa zaŋ tiliginsim liɣiri maa ti Aduna min’ o bidibisi kaman Yawɛ ni daa yɛl’ o ka zal’ o shɛm.
Currently Selected:
Kalinlinima 3: DBwDB
Highlight
Copy
Compare
Share
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.