Matiu 6
6
Nirilim niŋbu
1 #
Mat 23.25
Yisa daa yɛliya, “Miriya ka yi tumdi yi wuntia tuma ni niriba nyari ya m-paɣiri ya di zuɣu; yi yi niŋdi lala, yi ku nya laara yi Ba Naawuni ŋun be alizanda ni ŋɔ sani.
2 “Dinzuɣu a yi yɛn ti nandaamba pini, nyin’ di mooni li kaman bilikɔɣinim’ ni niŋdi shɛm Yɛhudianim’ jɛmbu duri ni mini pala zuɣu ni niriba nyari ba m-paɣiri ba la. Yɛlimaŋli ka n yɛri ya, bɛn’ pun nya bɛ laara. 3Amaa a yi yɛn ti nandaamba pini, nyin’ di chɛ ka a nuzaa mi a nudirigu ni niŋdi shɛli. 4Niŋmi li la ashilɔni, ka a Ba Naawuni ŋun nyari ashilɔni ŋɔ ti a di laara.”
Yisa wuhi Naawuni suhibu soli ni nyɛ shɛm
(Luk 11.2-4)
5 #
Luk 18.10-14
“Ka a yi yɛn suhi Naawuni, nyin’ di niŋdi kaman bilikɔɣinim’ ni niŋdi shɛm la, dama bɛ yuri ni bɛ zani bɛ jɛmbu duri ni mini sochira zuɣu n-suhiri Naawuni ni niriba nyari ba. Yɛlimaŋli ka n yɛri ya, bɛn’ pun nya bɛ laara. 6Amaa a yi yɛn suhi Naawuni, nyin’ kpɛm’ a duu nti yo a dunoli ka suh’ a Ba Naawuni ŋun be ashilɔni ŋɔ, ka a Ba Naawuni ŋun nyari ashilɔni maa ti a di laara.
7 “Ka yi yi suhiri Naawuni, yin’ di mali yɛtɔɣ’ gbaliŋ din ka gbinni kaman bɛn pa Yɛhudianim’ ni niŋdi shɛm la, dama bɛ tɛhiri ni bɛ yɛtɔɣ’ gbaliŋ zuɣu ka Naawuni ni deei bɛ suhigu. 8Amaa yinim’ miriya ka yi niŋdi lala, dama yi Ba Naawuni pun mi din simdi ya hal ka yi na bi suh’ o li gba. 9Dinzuɣu yi yi yɛn suhi Naawuni, yin’ suhimiya ŋ-ŋɔ:
‘Ti Ba Naawuni ŋun be alizanda ni,
chɛ ka a yuli du;
10 ka chɛ ka a nam kana,
ka chɛ ka a yubu niŋ dunia ŋɔ ni
ka di ni niŋdi alizanda ni shɛm la.
11 Tim’ ti zuŋɔ dabisili ŋɔ bindirigu.
12 Ka chɛ ti taali paŋ ti
kaman ti gba ni chɛri paŋdi
bɛn tumdi ti taali shɛm la.
13 Di chɛ ka ti kpe zahimbu ni,
amaa yihim’ ti zaɣ’ biɛɣu ni.
Dama nyini n-su nam mini yiko ni jilima
hal ni saha din ka bahigu. Ami.’
14 “Dama yi yi chɛri niriba taali paŋdi ba, yi Ba Naawuni ŋun be alizanda ni mi ni chɛ yi taali paŋ ya. 15#Maak 11.25-26 Amaa yi yi bi chɛri niriba taali paŋdi ba, yi Ba Naawuni gba ku chɛ yi taali paŋ ya.”
Nolɔbo yɛla
16Yisa daa lan yɛli, “Yi yi lɔri noli, yin’ di zaɣiriya yi ninani kaman bilikɔɣinim’ ni niŋdi shɛm la, dama bɛ zaɣirila bɛ ninani ni niriba nya ba m-baŋ ni bɛ lɔri noli. Yɛlimaŋli ka n yɛri ya, bɛn’ pun nya bɛ laara. 17Amaa a yi lɔri noli, nyin’ paɣim’ a ninni, ka niŋ kpam ʒe a zuɣu, 18ka so ku baŋ ni a lɔri noli naɣila a Ba Naawuni ŋun be ashilɔni ŋɔ, ka a Ba Naawuni ŋun nyari ashilɔni maa ti a di laara.”
Alizanda ni azichi
(Luk 12.33-34)
19 #
Jeem 5.2-3
“Di zaliya yi daazichi dunia ŋɔ ni, dama dunia ŋɔ ni di zahindimi, ka lɛla saɣindi li, ka tayiɣisi kabiri kpɛri zuri li, 20amaa naɣ’ zalimiyala yi daazichi alizanda ni; nimaani ka di bi zahinda, ka lɛla ku saɣim li, ka tayiɣisi mi ku kab’ kpe n-zu li, 21dama yi daazichi ni be shɛli, nimaani ka yi suhuri gba ni be.”
Niŋgbuŋ neesim
(Luk 11.34-36)
22 “Nina nyɛla niŋgbuŋ firila. Dinzuɣu a nina yi ne, a niŋgbuŋ zaa ni bela neesim ni; 23amaa a nina yi bi ne, a niŋgbuŋ zaa ni bela zibisim ni. Dama din di naan nyɛ a neesim yi niŋ liti, dindina nyin’ baŋmi ni di zibisim maa ku mali kpee!”
Naawuni jɛmbu mini dunia ŋɔ buni
(Luk 16.13)
24Yisa daa lan yɛli yaha, “Yiŋbi’ yino ku tooi jɛm duumanima ayi: O kul ni zaɣisila yino ka yuri ŋun’ la bee n-tibigi yino n-jɛm o, ka ʒiɛm ŋun’ la. Yi ku tooi jɛm Naawuni mini liɣiri.”
Naawuni naani niŋbu yɛla
(Luk 12.22-31)
25 “Dinzuɣu n yɛri ya mi, miriya ka yi jiɣindi yi nyɛviya bee yi niŋgbuna zuɣu zaŋ chaŋ yi ni yɛn di shɛli bee yi ni yɛn nyu shɛli bee yi ni yɛn ye shɛli polo. Nyɛvili bi gari bindirigu ka niŋgbuŋ mi bi gari situra? 26Kpahimmiya noonsi bɛn yiɣiri ŋɔ: Bɛ bi birita bee n-chɛra; bɛ mi ka kambɔna; amaa yi Ba Naawuni ŋun be alizanda ni ŋɔ n-dihiri ba. Ka yi bi mali bukaata pam gari ba? 27Ka yi ni ŋuni suhu n-lee ni ye o nyɛvili zuɣu, ka o tooi pahi li yuun’ yini?”
28Ka lan bɔhi ba, “Ka bɔ n-niŋ ka yi jiɣindi situra zuɣu? Yulimiya paɣiviɛligakushihikom ni zoori shɛm: Di bi tumda, di mi bi miri gumdi. 29#1 Nan 10.4-7; 2 Yɛl 9.3-6 Amaa n yɛri ya mi ni hal Sulemaana min’ o jilima zaa ha, o daa bi ye situra ka di viɛli kaman paɣiviɛligakushihikom zaɣ’ yini gba viɛlim. 30Ka Naawuni yi zaŋ viɛlim ŋɔ tatabo ti mɔri din be mɔɣu ni zuŋɔ n-kaai biɛɣu ka buɣim diri li ŋɔ, di chaŋ wula ka o ku ti yinim’ situra? Laabira, yi yɛda shiri pɔra!
31 “Dinzuɣu miriya ka yi jiɣindi m-bɔhira, ‘Bɔ ka ti yɛn di bee n-nyu bee bɔ ka ti yɛn ye?’ 32Dama dimbɔŋɔnim’ zaa zuɣu ka zuliya kam kul jiɣindi biɛɣukam, amaa yi Ba Naawuni ŋun be alizanda ni ŋɔ mi ni dimbɔŋɔnim’ zaa ha simdi ya. 33Amaa lee daŋmiya m-bola Naawuni nam dubu min’ o wuntia, ka o naanyi zaŋ dimbɔŋɔnim’ zaa ha pahi ya. 34Dinzuɣu miriya ka yi jiɣindi biɛɣu zuɣu, dama biɛɣu gba jiɣindila dimaŋ’ zuɣu. Dabisili kam wahala saɣiri li mi.”
Currently Selected:
Matiu 6: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.