Matiu 14

Jɔn Baptaizira kubu yɛla

(Maak 6.14-29; Luk 9.7-9)

1Di saha maa ka Naa Hɛrɔd daa wum Yisa yuli dubu yɛla 2ka yɛl’ o kpambaliba, “Jɔn Baptaizira la n-ni bala; ŋuna n-lan neei kum ni na maa, dinzuɣu ka o mali yiko n-tumdi tuun’ kara ŋɔ.”

3 # Luk 3.19-20 Naa Hɛrɔd n-daa gbaai Jɔn Baptaizira n-lo o mihi kpɛhi duu ŋun’ Hɛrɔd tizo Filip paɣa Hɛrɔdias zuɣu, 4#Lɛv 18.16; 20.21 dama Jɔn daa yɛlila Naa Hɛrɔd ni di chihiri ni o fa o niŋ o paɣa. 5Ka Naa Hɛrɔd daa bɔri ni o ku Jɔn, amaa ka zɔri niriba, dama sokam daa saɣiya ni o nyɛla anabi.

6Ka di daa ti lu Naa Hɛrɔd dɔɣim dabisili dali, ka Hɛrɔdias bipuɣiŋga yi salo ni na nti wa waa ka di niŋ Naa Hɔrɔd nyaɣisim pam, 7ka o daa po pɔri n-lo alikauli ni bipuɣiŋga maa yi suh’ o shɛlikam zaa, o ni ti o li.

8Ka o ma daa wuh’ o o ni yɛn suhi shɛli; ka bipuɣiŋga maa daa yɛli Naa Hɛrɔd, “Ŋmam’ Jɔn Baptaizira zuɣu n-niŋ pɔŋ ni na ti ti ma.”

9Ka di daa niŋ naa maa yoli nti yaɣi, amaa ka o pɔri la mini saamba la zuɣu chɛ ka o bahi noli ni bɛ niŋmi lala, 10ka daa tim ni bɛ cham’ sarika ni nti ŋma Jɔn zuɣu na. 11Ka bɛ daa chaŋ ti ŋma li n-zaŋ niŋ pɔŋ ni na ti ti bipuɣiŋga maa, ka o daa zaŋ li nti ti o ma. 12Ka Jɔn nyaandoliba daa chaŋ ti zaŋ Jɔn ti sɔɣi, ka chaŋ ti yɛli Yisa.

Niriba tusaanu dihibu

(Maak 6.30-44; Luk 9.10-17; Jɔn 6.1-14)

13Yisa ni daa wum yɛlli ŋɔ bahi, o daa yiɣisila nimaani n-kpe ŋariŋ yi kpaŋa. Ka salo daa wum o chandi maa damli, ka yi tinsi ni n-chaŋ bɛ naba zuɣu kar’ o naba. 14O ni daa ti yi ŋariŋ maa ni na n-nya salo maa ka bɛ yɛla daa niŋ o nambɔɣu pam, ka o daa chɛ ka barinim’ bɛn be bɛ ni kpaŋ.

15Ka di daa ti niŋ zaawun’ yuŋ ka o nyaandoliba chaŋ o sani nti yɛl’ o, “Kpe nyɛla mɔɣu ni, ka wuntaŋ’ mi yɛn lu, dinzuɣu bahim’ niriba maa ka bɛ chaŋ tiŋkpansi nti da bindira di.”

16Ka Yisa yɛla ba, “Di bi simdi ni bɛ chaŋ. Timiya ba bindirigu ka bɛ di.”

17Ka bɛ yɛl’ o, “Bɔrɔbɔro kpila anu mini zahim ayi kɔŋko n-kul be ti sani kpe.”

18Ka Yisa yɛli ba, “Zaŋmiya li ti ma na.” 19Ka o daa yɛli salo maa zaa ni bɛ laɣimmi ʒini momaha zuɣu. Ka o daa zaŋ bɔrɔbɔro kpila anu mini zahim ayi maa, ka kpuɣ’ o zuɣu n-lihi zuɣusaa ka niŋ alibarika niŋ di ni, ka ŋmahiŋmahi li ti o nyaandoliba, ka bɛ zaŋ li tari salo maa. 20Ka bɛ zaa ha daa di li tiɣi. Ka Yisa nyaandoliba maa daa laɣisi zaɣ’ chɛhi din guui m-pali piɛri pinaayi. 21Ka bɛn daa di li maa kalinli daa nyɛla kaman dɔb’ tusaanu laasabu m-pahi paɣiba ni bihi.

Yisa tam kom zuɣu chana

(Maak 6.45-52; Jɔn 6.15-21)

22Dimbɔŋɔ nyaaŋa ka Yisa daa chɛ ka o nyaandoliba kpe ŋariŋ daŋ o tooni baari duri teeku duli, ka ŋun’ kpalim ni o chɛbisi salo maa. 23O ni daa chɛbisi salo maa naai ka o kɔŋko chaŋ ti du zoli zuɣu ni o suhi Naawuni. Ka di daa ti niŋ zaawun’ yuŋ ka o kɔŋko na kul be nimaani, 24amaa ka bɛ ŋariŋ maa pun chaŋ katiŋ’ ha ka chɛ duli, ka kɔgbana ŋmɛri li, dama bɛ daa tuhila pɔhim. 25Ka di daa ti niŋ nolɔɣu kukol’ saha ka Yisa tam kom zuɣu chani bɛ sani. 26O nyaandoliba maa ni daa nya o ka o tam kom zuɣu chani maa, ka dabiɛm gbahi ba pam, ka bɛ yɛri ni alizini m-bala, ka kuhi dabiɛm kuhigu.

27Ka Yisa daa dii yɛli ba, “Di zɔriya dabiɛm! Chɛliya ka yi suhuri kpɛma. Mani m-bala.”

28Ka Pita yɛl’ o, “N Duuma, di yi nyɛla nyini m-bala, nyin’ chɛ ka n tam kom ŋɔ zuɣu ka a sanna.”

29Ka Yisa yɛl’ o, “Kamina!” Ka Pita daa yi ŋariŋ maa ni n-tam kom zuɣu chani Yisa sani; 30ka nya ka pɔhim ʒɛra, ka dabiɛm gbaag’ o, ka o piligi shimdi ka kuhi yɛli, “N Duuma, tiligim’ ma!”

31Ka Yisa daa dii teeg’ o nuu na n-gbaag’ o ka bɔh’ o, “Nyin’ ŋun yɛda pɔri ŋɔ, bɔ n-niŋ ka a biɛhinda?”

32Ka bɛ daa chaŋ ti kpe ŋariŋ maa ni, ka pɔhim maa dii chɛ ʒɛbu. 33Ka bɛn be ŋariŋ maa ni daa jɛm o ka yɛli, Yɛlimaŋli, Naawuni Bia n-shiri nyɛ a.

Gɛnɛsarɛt barinim’ tibbu

(Maak 6.53-56)

34Ka Yisa min’ o nyaandoliba daa mali ti du Gɛnɛsarɛt tiŋgbɔŋ ni teeku duli. 35Ka nimaaninim’ daa nya o m-baŋ o, ka tim bɛ tiŋgbɔŋ maa ni tiŋkpan’ shɛŋa din baɣibaɣi nimaani zaa ni nti zaŋ barinim’ zaa tahi o sanna 36nti suhir’ o ni o kul chɛ ka bɛ shih’ o binyɛrigu naŋgbambili. Ka bɛnkam daa shihi li shiri kpaŋ zaa.

Currently Selected:

Matiu 14: DBwDB

Highlight

Copy