Jɔn 16
16
1Yisa daa lan yɛli, “N yɛri ya la dimbɔŋɔnim’ zaa ni yi di ti birigi. 2Bɛ ni ti kari ya bɛ jɛmbu duri ni. Yɛlimaŋli, saha kanna ka ŋunkam ti kun ya ni tɛhi ni o tumla Naawuni yubu. 3Bɛ ni ti niŋ lala, dama bɛ bi mi ma balle m-mi m Ba Naawuni. 4N yɛri ya la dimbɔŋɔnim’ ni di saha ti paai ka yi teei ni n daa pun yɛli ya di yɛla.”
Naawuni Shia Kasi tuma ni nyɛ shɛm
“N daa bi pun yɛli ya dimbɔŋɔnima piligu ni, ka di nyɛla n ni daa na be yi san’ la zuɣu. 5Ka pumpɔŋɔ n labirila ŋun daa tim ma na maa sani, ka yi ni so mi bi bɔhi ma, ‘Ya ka a chana?’ 6N ni yɛli ya dimbɔŋɔnim’ maa zuɣu n-chɛ ka yi suhuri saɣim. 7Amaa yɛlimaŋli ka n yɛri ya, yi sɔŋbu zuɣu, di niŋ kamaata ni n lab’ ŋun tim ma na maa sani, dama n yi bi labi, Sɔŋda la ku ka yi sanna; amaa n yi labi, n ni tim o yi sanna. 8O yi ti kana, o ni wuhi dunianima alahichi ni nyɛ shɛli, ka wuhi ba wuntia ni nyɛ shɛli, ka lan wuhi ba saria karibu ni nyɛ shɛli. 9O ni wuhi ba alahichi ni nyɛ shɛli, bɛ ni bi niŋ ma yɛda zuɣu. 10Ka wuhi ba wuntia ni nyɛ shɛli, dama n labirila m Ba sani ka yi ku lan nya ma. 11Ka lan wuhi ba saria karibu ni nyɛ shɛli, dama Naawuni pun kari dunia ŋɔ naa saria.
12 “N na mali yɛla pam ni n yɛli ya, amaa yi na ku tooi deei li pumpɔŋɔ. 13Naawuni Shi’ so ni yɛlimaŋli ni bela yi ti kana, o ni wuhi ya yɛlimaŋli zaa soli; dama o bi ti yɛn yɛli shɛli omaŋmaŋ’ yiko ni, amaa o ni wum shɛlikam, dina ka o ti yɛn zaŋ yɛli, ka ni ti wuhi ya binshɛŋa din ti yɛn niŋ. 14O ni ti tibigi ma, dama n yɛla ka o ti yɛn zaŋ wuhi ya. 15M Ba ni su binshɛɣukam zaa nyɛla n dini; dina n-chɛ ka n yɛli ni o ni ti zaŋ n yɛla wuhi ya maa.”
Suhusaɣiŋgu mini suhupiɛlli yɛla
16Yisa daa lan yɛli yaha, “Di kpalim biɛla ka yi ku lan nya ma, ka di ti tooi biɛla ka yi lan nya ma yaha dama n labirila m Ba sani.”
17Ka o nyaandoliba maa ni shɛb’ bɔhiri taba, “Yɛtɔɣ’ bɔ ka o lee tɔɣisiri ti yɛri ni di kpalim biɛla ka ti ku lan nya o; ka di ti tooi biɛla ka ti lan nya o yaha maa; ka lan yɛri ni dama o labirila o Ba sani?” 18Ka lan bɔhi taba, “O ni yɛli ni di kpari biɛla maa gbinni lee nyɛla wula? Ti bi baŋ o ni yɛli shɛm maa gbinni.”
19Ka Yisa daa baŋ bɛ ni bɔri ni bɛ bɔh’ o shɛm ka bɔhi ba, “N ni yɛli ni di kpari biɛla ka yi ku lan nya ma, ka di ti tooi biɛla ka yi lan nya ma maa gbinni ka yi bɔhiri taba ni yi baŋ maa? 20Achiikatim, yɛlimaŋli ka n yɛri ya, yi ni ti kum ka fabili, amaa ka dunianim’ bɛn’ suhuri ti piɛla; yi suhuri ni ti saɣim, amaa yi suhusaɣiŋgu maa ni ti leei suhupiɛlli. 21Paɣ’ yi wolisiri ni o dɔɣi, o malila suhusaɣiŋgu o biɛrim nyabu saha ni paai zuɣu; amaa o yi ti dɔɣi bia maa naai, o bi lan teer’ o biɛrim maa yɛla yaha, o ni dɔɣi bia dunia ni maa zuɣu. 22Yi gba mali suhusaɣiŋgu pumpɔŋɔ, amaa n ni ti lan nyan ya yaha, ka yi suhuri pali suhupiɛlli, ka so ti ku tooi yihi yi suhupiɛlli maa yi suhuri ni.
23 “Dindali maa mi yi ti ku bɔhi binshɛli yɛla n sani. Achiikatim, yɛlimaŋli ka n yɛri ya, yi yi ti zaŋ n yuli suhi binshɛɣukam m Ba sani, o ni tin ya li. 24Amaa hal ni pɔŋɔ, yi na ʒi n-zaŋ n yuli suhi shɛli; dinzuɣu suhimiya, Naawuni ni tin ya, ka yi suhuri pali suhupiɛlli.”
Dunia nyaŋbu
25Yisa daa lan yɛli, “Ŋaha puuni ka n yɛri ya dimbɔŋɔnima; saha kanna ka n ti ku lan yɛli ya shɛli ŋaha puuni, amaa ka ni ti kahigi m Ba yɛla wuhi ya. 26Dindali maa yi ni ti zaŋ n yuli suhi Naawuni; ka m bi yɛli ni n ni ti suhi m Ba tin ya, 27dama m Ba maa maŋmaŋ’ yuri ya, yi ni yuri ma ka niŋ yɛda ni n yila m Ba maa sanna zuɣu. 28N yila m Ba sani n-ka dunia ŋɔ ni na; ka lan yɛn yi dunia ŋɔ ni labi m Ba maa sani.”
29Ka o nyaandoliba maa yɛl’ o, “N-hii, pumpɔŋɔ a yipa kahigiri yɛri ti, ka di pa ŋaha puuni yaha! 30Ti yipa baŋya ni a mi binshɛɣukam zaa, ka di bi lan simdi ni so vih’ a; dimbɔŋɔ chɛ ka ti baŋ ni a shiri yila Naawuni sanna.”
31Ka Yisa bɔhi ba, “Yi yipa niŋ yɛda pumpɔŋɔ? 32Saha kanna, hal di paaya gba, ka yi ni ti wurim zo n-kuli yi yinsi ka chɛ ma n ko, amaa m pala n ko, dama m Ba maa be n sani. 33N yɛli ya la dimbɔŋɔnima ni yi nya suhudoo n zuɣu. Yi ni nya nahiŋgu dunia ŋɔ ni, amaa chɛliya ka yi suhuri kpɛma! M pun nyaŋ dunia!”
Currently Selected:
Jɔn 16: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.