Jɔn 14
14
Yisa ŋun nyɛ soli
1Yisa daa yɛl’ o nyaandoliba, “Di chɛliya ka yi suhuri zɔhira. Niŋmiya Naawuni yɛda, ka niŋ man’ gba yɛda. 2Duri pam be m Ba yiŋa. N chanimi ni n ti mali biɛhigu shee zali ya. Di yi di pa lala n naan ku yɛli ya di yɛla. 3Ka n yi chaŋ ti mali biɛhigu shee maa zali ya, n ni labina nti zaŋ ya tahi mmaŋmaŋ’ biɛhigu shee, ka n ni ti yɛn be luɣ’ shɛli, nimaani ka yi gba ni ti be. 4Yi mi n ni chani luɣ’ shɛli maa, ka mi di soli.”
5Ka Tomas bɔh’ o, “N Duuma, ti bi mi a ni chani luɣ’ shɛli, ka wula ka ti ni tooi baŋ di soli?”
6Ka Yisa garigi yɛl’ o, “Mani n-nyɛ soli maa, mani n-nyɛ yɛlimaŋli, mani n-lan nyɛ nyɛvili; ka so ku tooi chaŋ m Ba sani, ka pa ni o paala mani. 7Yi yi di mi ma, yi naan mi m Ba maa gba; amaa zuŋɔ zaŋ chana yi baŋ o, dama yi pun nya o.”
8Ka Filip yɛl’ o, “Ti Duuma, wuhim’ ti a Ba maa ni nyɛ so! Dina ka ti kul bɔra.”
9Ka Yisa bɔh’ o, “Filip, m min’ a ni be ka di yuui ŋ-ŋɔ ka a na bi mi ma? Ŋun nya ma, o nya m Ba; ka bɔ n-niŋ ka a yɛli ni n wuhimi ya m Ba maa?” 10Ka lan bɔh’ o, “Filip, a bi niŋ yɛda ni m be m Ba maa ni ka m Ba maa gba be n ni? Yɛtɔɣ’ shɛŋa n ni tɔɣisiri ya maa, m bi tɔɣisiri li la mmaŋmaŋ’ yiko ni; amaa m Ba ŋun be n ni maa n tumdi o tuma maa. 11Niŋmiya ma yɛda ni m be m Ba maa ni ka m Ba gba be n ni; ka di yi pa lala, yin’ niŋmiya ma yɛda n tuma zuɣu. 12Achiikatim, yɛlimaŋli ka n yɛri ya, ŋunkam niŋ ma yɛda, o gba ni ti tum tuun’ shɛŋa n ni tumdi ŋɔ, hal ka ni ti tum tuun’ shɛŋa din gari dimbɔŋɔnima, dama n chanila m Ba maa sani. 13Ka yi yi ti zaŋ n yuli suhi binshɛɣukam, n ni niŋ li ka m Ba nya jilima n zuɣu. 14Yi yi ti zaŋ n yuli suhi binshɛɣukam zaa, n ni niŋ li tin ya.”
Naawuni Shia Kasi kandina alikauli lɔbu
15Yisa daa lan yɛl’ o nyaandoliba maa, “Yi yi yuri ma, yi ni doli n zaligunima. 16N ni suhi m Ba ka o tin ya Sɔŋda so na ka o ti be yi sani hal ni saha din ka bahigu. 17O nyɛla Naawuni Shi’ so ni yɛlimaŋli ni be, ka dunianim’ ku tooi deeg’ o, dama bɛ bi nyar’ o, bɛ mi bi mi o; amaa yinim’ mi o, dama o be yi sani ka ni ti be yi ni.
18 “N ku chɛ ka yi kɔŋ sɔŋda; n ni lab’ yi sanna. 19Di kpari biɛla ka dunianim’ ku lan nya ma yaha; amaa yinim’ ni nyari ma. N ni mali nyɛvili be zuɣu, yi gba ni mali nyɛvili m-be. 20Dindali maa ka yi ni ti baŋ ni n shiri be m Ba ni, ka yi mi be n ni, ka n gba be yi ni.
21 “Ŋunkam deei n zaligu ka dol’ li, dilana n-nyɛ ŋun yuri ma; ka m Ba ni yuri ŋun yuri ma maa, ka n gba ni yuri dilana ka kahigiri mmaŋ’ wuhir’ o.”
22Ka Judas (Pa Judas Isikariɔt la) daa bɔh’ o, “N Duuma, di chaŋ wula ka a ni kahig’ amaŋ’ wuhi ti, ka ku kahig’ amaŋ’ wuhi dunianim’ bɛna?”
23Ka Yisa garigi yɛl’ o, “Nir’ yi yuri ma, o ni doli n yɛligu, ka m Ba ni yur’ o, ka ti ni ka dilan’ sanna ka ti min’ o ti laɣim be. 24Ŋunkam bi yuri ma je ni o doli n yɛligu. Yɛl’ shɛŋa yi ni wumdi ŋɔ pala n dini, amaa di nyɛla m Ba ŋun tim ma na maa dini.
25 “N ni na be yi sani ŋɔ ka n yɛri ya dimbɔŋɔnima. 26Amaa m Ba ni yɛn tim Sɔŋda so ŋun nyɛ o Shia Kasi, ka o zaŋ n yuli kana la ni ti wuhi ya binshɛɣukam zaa; ka n ni daa wuhi ya shɛlikam zaa la, o ni ti teei ya li.”
27Yisa daa lan yɛl’ o nyaandoliba maa, “Suhudoo ka n zaŋ tin ya; mmaŋmaŋ’ suhudoo mi ka n zaŋ tin ya maa. Di pala dunianim’ ni tiri suhudoo shɛm la ka n tin ya maa. Di zɔriya dabiɛm bee n-chɛ ka yi suhuri zɔhira. 28Yi pun wum ka n yɛli ya ni n ni chaŋ ka ti lan lab’ yi sanna yaha. Yi yi di yuri ma, yi naan mali suhupiɛlli n ni chani m Ba sani maa zuɣu, dama m Ba maa gari ma. 29To, n yɛri ya la dimbɔŋɔ ka di na bi niŋ, amaa ni di ti niŋ pali ka yi niŋ ma yɛda. 30N ku lan tɔɣisi ya yɛtɔɣa pam, dama dunia ŋɔ naa kanna, amaa o ka n yiko. 31N tumdila m Ba ni zali ma shɛm ni dunianim’ baŋ ni n yuri m Ba maa.”
Ka ŋmaligi yɛli ba, “Yiɣisimiya ka ti chaŋ kpe ha.”
Currently Selected:
Jɔn 14: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.