Yibu 6

1Di saha ka Yawɛ daa yɛli Musa, “Pumpɔŋɔ a ni nya n ni yɛn niŋ Firawuna shɛm: N yi niŋ o firimiinsi o ni chɛ ka bɛ yi, yɛlimaŋli, n ni niŋ o firimiinsi, ka o kari ba yih’ o tiŋgbɔŋ maa ni.”

Naawuni pii Musa

2 # Pil 17.1; 28.3; 35.11; Yibu 3.13-15 Ka Naawuni daa yɛli Musa yaha, “Mani n-nyɛ Yawɛ. 3N daa yi Ibrahimma zuɣu, ka yi Yisahaku zuɣu, ka lan yi Yaakubu gba zuɣu n-wuhi ba ni mani n-nyɛ Naawuni ŋun nyɛ Kpiɔŋlan’ Naa, amaa n daa bi kahigi n yuli Yawɛ wuhi ba. 4N daa lan lo ba alikauli ni n ni zaŋ Keenan tiŋgbɔŋ ti ba, bɛ ni daa nyɛ saamba be tiŋgbɔn shɛl’ ni la. 5Dinzuɣu n wum Izraɛlnim’ maa fabila zaŋ chaŋ Ijiptinim’ ni zaŋ ba leei daba maa polo, ka teei n ni daa lo alikauli shɛli maa yɛla. 6Dinzuɣu yɛlim’ Izraɛlnim’ maa ni mani n-nyɛ Yawɛ, ka n ni yihi ya Ijiptinim’ dabitim maa ni. N ni teei n nuu tum tuun’ kara n-darigi bɛ tibili ka tiligi ya. 7N ni zaŋ ya leei n niriba, ka leei yi Naawuni, ka yi ti baŋ ni man’ Yawɛ ŋun nyɛ yi Naawuni ŋɔ n-yihi ya Ijiptinim’ ʒi’ tibisa ʒibu ni. 8N ni ti zaŋ ya tahi n ni daa po pɔri ni n zaŋ tiŋgbɔn shɛli ti Ibrahimma mini Yisahaku ni Yaakubu la ni. N ni ti zaŋ li tin ya ka di leei yi ni su shɛli. Dama mani n-nyɛ Yawɛ.” 9Ka Musa daa chaŋ ti yɛli Izraɛlnim’ maa lala. Amaa ka bɛ daa zaɣisi li wumbu, bɛ suhugarigu mini bɛ ni daa be putɔɣu dabitim bandi shɛli ni maa zuɣu.

10Di saha ka Yawɛ daa yɛli Musa, 11“Cham’ ti yɛli Firawuna ŋun nyɛ Ijipti naa maa ni o chɛ ka Izraɛlnim’ maa yi o tiŋgbɔŋ maa ni.”

12Amaa ka Musa daa garigi yɛli, “Izraɛlnim’ maa zaɣisiya ni bɛ ku wum n yɛligu, ka wula ka Firawuna ŋun’ lee ni wum mani ŋun bi tooi tɔɣisiri yɛtɔɣa ŋɔ yɛligu?”

13Ka Yawɛ daa lan tɔɣisi Musa mini Aduna yɛtɔɣa ka zali ba zaligu zaŋ chaŋ Izraɛlnim’ mini Firawuna ŋun nyɛ Ijipti naa maa polo n-yɛli ba ni bɛ yihim’ Izraɛlnim’ Ijipti tiŋgbɔŋ maa ni.

Musa mini Aduna zuliya ni niriba

14Bɛ dɔɣirikpamba yuya m-bɔŋɔ: Izraɛl bituuli ŋun yuli daa booni Rubin la daa dɔɣi bidibis’ anahi; Hanok mini Pallu ni Hɛzirɔn ni Karimi, bɛna n-daa nyɛ Rubin zuliya ni kpamba. 15Simiɔn bidibisi n-daa nyɛ: Jɛmuɛl mini Jamin ni Ohad ni Jachin ni Zɔhar ni Shaul ŋun daa nyɛ Keenan paɣ’ bia la. Bɛmbɔŋɔnima n-daa nyɛ Simiɔn zuliya ni kpamba. 16#Kal 3.17-20; 26.57-58; 1 Yɛl 6.16-19 Lɛvi bidibisi yuya m-bɔŋɔ kaman bɛ dɔɣirikpamba ni nyɛ shɛm: Gɛrishɔn mini Kɔhat ni Mɛrari. Lɛvi daa niŋla yuun’ kɔbiga ni pihitanaayopɔin dunia yili. 17Gɛrishɔn bidibisi n-daa nyɛ: Libini mini Shimɛi ni bɛ malibu. 18Kɔhat bidibisi n-daa nyɛ: Amiram mini Izar ni Hiburɔn ni Uziɛl. Kɔhat daa niŋla yuun’ kɔbiga ni pihitanaata dunia yili. 19Mɛrari bidibisi n-daa nyɛ Mahili mini Mushi. Bɛmbɔŋɔnima n-daa nyɛ Lɛvi zuliya ni niriba kaman bɛ dɔɣirikpamba ni daa nyɛ shɛm.

20Ka Amiram daa kpuɣ’ o piriba Jokɛbɛd n-zaŋ o dɔɣi Aduna mini Musa. Amiram daa niŋla yuun’ kɔbiga ni pihitanaayopɔin dunia yili. 21Izar bidibisi n-daa nyɛ Kɔra mini Nɛfɛg ni Zikiri. 22Ka Uziɛl bidibisi mi nyɛ Mishɛl mini Ɛlizafan ni Sitiri.

23Ka Aduna daa kpuɣi Aminadab bipuɣiŋga ŋun daa nyɛ Nashɔn tizɔpaɣa ka o yuli booni Ɛlishɛba la, ka o daa dɔɣi Nadab mini Abihu ni Ɛliɛza ni Itama. 24Kɔra bidibisi n-daa nyɛ: Asir mini Ɛlikana ni Abiasaf. Bɛmbɔŋɔnima n-daa nyɛ Kɔra daŋ niriba. 25Ka Aduna bidibiga Ɛliɛza daa kpuɣi Putiɛl bipuɣinsi ni yino n-daa zaŋ o dɔɣi Finɛhas. Bɛmbɔŋɔnima n-daa nyɛ Lɛvi zuliya maa ni kpamba kaman bɛ yaannim’ dunoya ni daa nyɛ shɛm.

26Aduna ŋɔ mini Musa ŋɔ ka Yawɛ daa yɛli, “Yihimiya Izraɛlnim’ ŋɔ zaa Ijipti tiŋgbɔŋ ni gbilligbilli la.” 27Musa mini Aduna maa n-daa nyɛ bɛn yɛli Firawuna ŋun nyɛ Ijipti naa la ni o chɛ ka Izraɛlnim’ yi Ijipti tiŋgbɔŋ ni la.

Naawuni zali Musa mini Aduna zaligu

28Dahin’ shɛli Yawɛ ni daa tɔɣisi Musa yɛtɔɣa Ijipti tiŋgbɔŋ ni la, 29Yawɛ daa yɛl’ o mi, “Mani n-nyɛ Yawɛ. Yɛlim’ Firawuna ŋun nyɛ Ijipti naa maa n ni yɛl’ a shɛlikam zaa.”

30Ka Musa daa garigi yɛli Yawɛ, “M bi tooi tɔɣisiri yɛtɔɣa, Firawuna ku bɔri ni o wum n yɛtɔɣa.”

Currently Selected:

Yibu 6: DBwDB

Highlight

Copy