Yibu 11

Musa yɛli bikpamba kum yɛla

1Ka Yawɛ daa yɛli Musa, “Alɔbo zaɣ’ yini n-kpalim ka n yɛn chɛ ka di lu Firawuna mini Ijiptinim’ zuɣu, di nyaaŋa o ni chɛ ka yi chaŋ, o ni kari ya o tiŋgbɔŋ maa ni zaa. 2Yɛlim’ Izraɛlnim’ maa zaa ni bɛ doo kam mini paɣ’ kam suhim’ o ʒiʒiinikpee anzinfa mini salima nɛma.” 3Ka Yawɛ daa chɛ ka Ijiptinim’ maa niŋ ba nirilim. Musa daa nyɛla ninvuɣ’ titali Ijipti tiŋgbɔŋ ni ni Firawuna min’ o kpamba ni o niriba sani.

4Ka Musa daa yɛli, “Yawɛ yɛliya, ‘Zaŋ chaŋ yuntisuɣu saha, n ni kpe Ijipti tiŋ’ puuni. 5Ka Ijipti tiŋgbɔŋ ni bidib’ kpɛm’ kam ti kpi. Firawuna bikpɛm’ ŋun ti yɛn di nam o kalinsi nyaaŋa gba ni kpi hal zaŋ tabili dab’ paɣ’ ŋun gba’ nɛli zuɣu niɛmdi bikpɛm’ ni kpi ni bɛ ni tuui dɔɣi naɣilabihi shɛb’ zaa. 6Ka kuhigu pam ni ti be Ijipti tiŋgbɔŋ ni zaa, ka di kpee na ʒi n-niŋ, ka di kpee mi ku lan niŋ yaha. 7Amaa n niriba Izraɛlnim’ bɛna, baa bi yɛn ŋuhi bɛ biŋkɔbigu gba bee daadam din ni chɛ ka yi baŋ ni Yawɛ woligi Izraɛlnim’ ka chɛ Ijiptinima.’ 8Ka a kpamba ŋɔ ni ti kana ti gbani n tooni yɛli ma, ‘A min’ a niriba zaa bɛn dol’ a yimiya chaŋ. Di nyaaŋa ka n ni chaŋ.’ Ka o daa ŋmaligi Firawuna sani n-yi ni suhuyiɣisili pam. 9Ka Yawɛ daa yɛli Musa, “Firawuna ku wum a yɛligu maa, ka di chɛ ka n daalahiziba tuma maa galisi pam Ijipti tiŋgbɔŋ ŋɔ ni.”

10Musa mini Aduna daa tum alahiziba tuma ŋɔ zaa la Firawuna ninni, amaa ka Yawɛ daa chɛ ka Firawuna niŋ tipawumli n-zaɣisi ni o ku chɛ ka Izraɛlnim’ maa yi o tiŋgbɔŋ maa ni.

Currently Selected:

Yibu 11: DBwDB

Highlight

Copy