Yibu 10

Toli yɛla

1Ka Yawɛ daa yɛli Musa, “Cham’ Firawuna sani, dama mani n-chɛ ka o min’ o kpambaliba zaa suhuri kpɛma ni di chɛ ka n tum alahiziba tuma ŋɔ bɛ sani, 2ka yi ti zaŋ li yɛli yi bihi mini yi yaansi n ni daa chɛ ka Ijiptinim’ maa tum jɛrilim shɛm, ka n tum alahiziba tuun’ shɛŋa ni di chɛ ka yi baŋ ni mani n-nyɛ Yawɛ.”

3Di saha ka Musa mini Aduna daa chaŋ Firawuna sani ti yɛl’ o, “Yawɛ ŋun nyɛ Hiburunim’ Naawuni la yɛliya, ‘Bɔ saha ka a yɛn saɣi siɣis’ amaŋa n tooni? Chɛ ka n niriba maa chaŋ ti jɛm ma. 4Dama a yi zaɣisi ni a ku chɛ ka n niriba maa chaŋ, biɛɣuni n sa ni tahi toli a tiŋgbɔŋ ŋɔ ni na, 5ka bɛ ti yɛrigi tiŋgbɔŋ ŋɔ ni zaa hal ka so ti ku lan nya tiŋgbani gba. Ka bɛ ti bahi ŋubi sakuɣa la ni daa chɛ bindir’ shɛŋa zali ya la mini yi tihi din be mɔɣu ni. 6Bɛ ni ti pali a min’ a niriba ni Ijiptinim’ zaa yinsi. Ka yi banim’ bee yi yaannim’ daa na ʒi n-nya lala tatabo bɛ ni daa dɔɣi ba saha shɛli zaŋ kana zuŋɔ.’ ” Di nyaaŋa ka Musa daa ŋmaligi Firawuna sani yi.

7Ka Firawuna kpamba daa yɛl’ o “Bɔ saha ka doo ŋɔ yɛn chɛ ti zana baribu? Chɛ ka niriba maa chaŋ ti jɛm Yawɛ ŋun nyɛ bɛ Naawuni maa, a na kul bi baŋ ni Ijipti bahi yoli zaa?” 8Di saha ka bɛ daa boli Musa mini Aduna labisi Firawuna sanna, ka o ti yɛli ba, “Chamiya ti jɛm Yawɛ ŋun nyɛ yi Naawuni maa; amaa ka banima n-lee yɛn chaŋ maa?”

9Ka Musa yɛli, “Ti ninkura mini ti bipola zaa ni ti bidibisi mini ti bipuɣinsi zaa zaŋ tabili ti biŋkɔbbaligu mini ti niɣi zaa. Dama ti yɛn chaŋmi ti puhi Yawɛ chuɣu.”

10Ka o daa yɛli ba, “N yi chɛ ka yi mini yi bihi zaa chaŋ, dina n-ni chɛ ka Yawɛ be yi sani? Zaɣ’ biɛɣu ka yi lo maa. 11Aai, lala ku niŋ. Yi dɔbba kɔŋko cham’ ti jɛm Yawɛ, dama yi ni bɔri shɛm m-bala.” Ka bɛ daa kari ba Firawuna tooni yihi.

12Di saha ka Yawɛ daa yɛli Musa, “Teem’ a nuu tiri Ijipti tiŋgbani ŋɔ, ka toli yina nti ŋubi bimbil’ shɛŋa zaa sakuɣa la ni daa bi saɣim tiŋgbɔŋ maa ni.” 13Ka Musa daa teeg’ o jaaŋgbee maa tiri Ijipti tiŋgbani maa ka Yawɛ daa chɛ ka pɔhim yi wulimpuhili polo na n-ʒe dindali maa wuntaŋ’ ni mini yuŋ zaa, zaŋ chaŋ biɛɣu ti yɛn neei ka pɔhim maa ʒi toli na. 14#Kah 9.2-3 Ka toli maa daa ka Ijipti tiŋgbɔŋ ni na n-yɛrigi Ijipti tiŋgbɔŋ maa ni zaa. Ka bɛ galisim maa kpee daa na ʒi n-niŋ, ka di kpee mi ku lan niŋ. 15Dama bɛ daa kul palila tiŋgbɔŋ maa ni zaa hal ka tiŋgbani ti ku n-sabigi. Ka bɛ daa ŋubi sakuɣa la ni daa bi saɣim bimbil’ shɛŋa la mini tiwala zaa, ka va’ mahali bee tihi vari bee puri ni bimbilima daa lan ka Ijipti tiŋgbɔŋ maa zaa ni.

16Di saha ka Firawuna daa boli Musa mini Aduna na yomyom ti yɛli ba, “N tum taali Yawɛ ŋun nyɛ yi Naawuni maa sani ni yi gba sani. 17Dinzuɣu pumpɔŋɔ chɛliya n taali yim ŋɔ yaha, ka suhi Yawɛ ŋun nyɛ yi Naawuni maa ti ma ka o yihi ma kum ŋɔ ni n tiŋgbɔŋ ŋɔ ni.” 18Di saha ka Musa daa yi Firawuna sani n-chaŋ ti suhi Yawɛ. 19Ka Yawɛ daa chɛ ka pɔhim kpiɔŋ yi wulinluhili polo na nti ʒe toli maa ti niŋ Teeku Ʒiɛɣu ni, ka zaɣ’ yino gba daa bi lan kpalim Ijipti tiŋgbɔŋ maa ni. 20Amaa ka Yawɛ daa lan chɛ ka Firawuna niŋ tipawumli n-zaɣisi ni o ku lan chɛ ka Izraɛlnim’ maa chaŋ.

Zibisim yɛla

21Ka Yawɛ daa yɛli Musa, “Zaŋm’ a nuu tiri zuɣusaa ka zibisim titali zibigi Ijipti tiŋgbɔŋ maa ni zaa, ka sokam ti kpalim bɔbinda.” 22#Yila 105.28; Kah 16.10 Ka Musa daa teeg’ o nuu tiri zuɣusaa, ka zibisim titali daa zibi Ijipti tiŋgbɔŋ maa zaa ni daba ata, 23ka bɛ daa bi nyari taba bee so ti yi n-chaŋ shɛli polo daba ata maa ni zaa. Amaa Izraɛlnim’ maa bɛn’ yaɣili polo zaa daa malila neesim.

24Ka Firawuna daa boli Musa ti yɛl’ o, “Yi mini yi bihi chamiya ti jɛm Yawɛ, amaa chɛliya yi biŋkɔbbaligu mini yi niɣi bɛna.”

25Ka Musa daa yɛl’ o, “Di simdi ka a ti ti sara maligu biŋkɔbiri mini ti ni yɛn zaŋ binshɛŋa ti nyo buɣim ti Yawɛ ŋun nyɛ ti Naawuni maa. 26Di simdi ni ti zaŋ ti niɣi zaa chaŋ, hal naɣ’ takarifeeni ku kpalim. Di simdi ni ti zaŋ bɛ zaa chaŋ ti jɛm Yawɛ ŋun nyɛ ti Naawuni maa, dama ti bi mi ti ni ti yɛn zaŋ shɛli mali sara ti Yawɛ naɣila ti paala nimaani.”

27Amaa ka Yawɛ daa lan chɛ ka Firawuna niŋ tipawumli ka bi chɛ ka bɛ chaŋ. 28Di saha ka Firawuna daa yɛli Musa, “Yim’ n sani, Miri ka a lan chɛ ka n nya a yaha. N nini yi ti lan nya a, n ni ku a.”

29Ka Musa daa yɛli, “A ni yɛli shɛm maa n wumya. A nini shiri ku lan nya ma.”

Currently Selected:

Yibu 10: DBwDB

Highlight

Copy