Kolɔsainima 3

1 # Yila 110.1 Dinzuɣu yi mini Masia ni laɣim neei kum ni la zuɣu, bomiyala binshɛŋa din be alizanda ni Masia ni ʒi Naawuni nudirigu polo luɣ’ shɛl’ la. 2Chɛliya ka yi suhuri kul yɛla binshɛŋa din be nimaani zuɣu, ka pa ni binshɛŋa din be dunia ŋɔ ni zuɣu. 3Dama yi kpimi ka yi nyɛviya pahi Masia zuɣu n-sɔɣi Naawuni ni. 4Masia ŋun nyɛ ti nyɛvili la yi ti yi palo, yi gba ni yi palo m-pah’ o zuɣu nya jilima.

Nyɛvil’ kurili mini nyɛvil’ palli

5Dinzuɣu di niŋ kamaata ni yi ku dunia ŋɔ ni kɔr’ biɛri din be yi ni la. Dina n-nyɛ: Zina niŋbu mini daɣiri tuma ni niŋgbuŋ kɔre ni tɛhi’ biɛri ni binyara ni kɔre kpɛbu la. Binyara ni kɔre kpɛbu ŋmanila buɣijɛmbo. 6Dimbɔŋɔnim’ zuɣu ka Naawuni suhuyiɣisili kul paari ninvuɣ’ shɛb’ bɛn bi deeri ŋun’ Naawuni noli. 7Ka yi gba daa tumdila lala yi ni daa siɣi ʒe di puuni saha shɛl’ la.

8Amaa pumpɔŋɔ yihimiya dimbɔŋɔnim’ zaa yi tɛr’ ni bahi. Dina n-nyɛ: Sujee mini suhuyiɣisili ni biɛr’ biɛɣu. Ka di chɛliya ka turi mini yɛtɔɣ’ yoya yiri yi noya ni na. 9#Ɛfɛs 4.22 Yi mi di ŋmariya tab’ ʒiri, dama yi pun yihi biɛr’ kurili la mini di miligu yɛla bahi, 10#Pil 1.26; Ɛfɛs 4.24 ka yipa zaŋla biɛr’ palli kpɛhi yi ni, Dina n-nyɛ: Biɛr’ pal’ shɛli Naawuni ŋun nyɛ di namda la ni zaŋd’ omaŋmaŋ’ ŋmahinli n-kul lɛbigiri li zaɣ’ palli ni di chɛ ka yi baŋ ŋun’ Naawuni la. 11Dimbɔŋɔ puuni di ku tooi nani ni Yɛhudianim’ be bɛ ko ka chɛ bɛn pa Yɛhudianima bee ka bɛn doli gunibu kali soli be bɛ ko ka chɛ bɛn bi doli gunibu kali soli bee ka ninvuɣ’ yoya mini ninvuɣ’ yarisi ni daba mi be bɛ ko ka chɛ bilichinnima, amaa Masia n-nyɛ ŋun gari bɛ zaa ka be bɛ zaa ni.

12 # Ɛfɛs 4.2 Yi nyɛla Naawuni ninvuɣ’ gahindi’ shɛb’ o ni yu ka pii leeg’ omaŋmaŋ’ niriba. Dinzuɣu di niŋ kamaata ni yi zaŋ nambɔzɔbo mini nirilim niŋbu ni maŋsiɣisibutali ni tarimtali ni suɣilɔdibo kpɛhi yi tɛr’ ni, 13#Ɛfɛs 4.32 ka sɔŋmiya taba. Yi ni so yi mali yɛli shɛli ni o kpee, yin’ chɛliya tab’ taali paŋ taba; di niŋ kamaata ni yi chɛri yi tab’ taali paŋdi ba kaman ti Duuma ni daa chɛ m-paŋ yi gba shɛm la. 14Ka din gari shɛlikam zaa nyɛla, zaŋmiya yurilim din lɔri binshɛɣukam laɣindi taba ka di leeri zaɣ’ yin’ la pahi dimbɔŋɔnim’ zaa zuɣu. 15Chɛliya ka Masia ni zaŋ suhudo’ shɛli tin ya la su yi suhuri, dama suhudoo maa zuɣu ka Naawuni daa boli ya n-laɣim ya niŋgbun yin’ la ni. Ka paɣimiya Naawuni. 16#Ɛfɛs 5.19-20 Chɛliya ka Masia yɛligu ba jila yi suhuri ni pam. Wuhimiya taba ka kpammiya tab’ jaande yɛm zaa puuni, ka zaŋmiya adiini yila mini Naawuni paɣibu yila ni Yila litaafi ni yila n-yiini paɣiri Naawuni yi suhuri ni. 17Dinzuɣu yi ni niŋdi shɛlikam zaa puuni, di yi nyɛ yɛtɔɣa ni bee tuma ni, yin’ niŋmiya di zaa ti Duuma Yisa yuli ni, ka paɣimiya ti Ba Naawuni o zuɣu.

Yɛdaniŋdiba bebu ni taba bɛ biɛr’ palli zuɣu

18 # Ɛfɛs 5.22; 1 Pita 3.1 Yidaampaɣiba, zaŋmiya yimaŋ’ ti yi yidaannima kaman di ni simdi shɛm ti Duuma sani.

19 # Ɛfɛs 5.25; 1 Pita 3.7 Yidaannima, yumiya yi paɣiba, ka di yihiriya ba hal’ biɛɣu.

20 # Ɛfɛs 6.1 Bihi, deemiya yi banim’ mini yi manim’ noya binshɛɣukam zaa ni, dama dina n-tiɣiri ti Duuma nini.

21 # Ɛfɛs 6.4 Ka yinim’ bihi banim’ mi di yihiriya yi bihi hal’ biɛɣu hal ka bɛ ti yihi tahima.

22 # Ɛfɛs 6.5-8 Daba, deemiya yi dunia ŋɔ ni duumanim’ noya binshɛɣukam zaa puuni, ka di niŋdiya shɛli bɛ nini yi beni zuɣu ni bɛ nini tiɣi ya, amaa niŋmiya lala ni suhu yini Naawuni zɔbu zuɣu. 23Ka yi ni tumdi binshɛɣukam zaa tiri ba puuni, tummiya li ni yi suhuri zaa kaman ti Duuma ka yi tumdi li tiri la, ka pa ni ninsalinim’ ka yi tumdi li tira. 24Ka minya ni yi ni ti deei di laara ti Duuma sani, dama yi Duuma ŋun nyɛ Masia la zuɣu ka yi tumdi lala maa. 25#Zal 10.17; Ɛfɛs 6.9 Ŋun tumdi din bi tuhi ni ti deela o ni tum din bi tuhi shɛli maa laara; dama Naawuni bi yaai so yuri ka chɛ so.

Currently Selected:

Kolɔsainima 3: DBwDB

Highlight

Copy