2 Timoti 4

1Naawuni mini Yisa Masia ŋun ni ti kari bɛn ne mini bɛn kpi saria la sani n zal’ a, Yisa Masia labbuna min’ o nam dibu la zuɣu, niŋmi dimbɔŋɔnima: 2Yihim’ Naawuni yɛligu waazu: kul yirigim’ di zuɣu saha shɛlikam zaa; saɣisim’ niriba; kpahimi niriba zuɣu ni; kpammi niriba jaande; wuhimi niriba suɣilɔdibo pam puuni. 3Dama saha shɛli kanna ka niriba ti ku lan deeri wuhibu maŋli, amaa ka ni dolila bɛmaŋmaŋ’ kɔre soli n-kul bɔrila karimbanim’ bɛn ni wuhiri wuhibu shɛŋa din niŋdi ba nyaɣisim pahira. 4Bɛ ni zaɣisi yɛlimaŋli wumbu ka zaŋ bɛ zaɣa niŋla kurimbuni ha lahibaya din pa yɛlimaŋli ni. 5Amaa nyin’ kul gbaam’ amaŋa yɛlli kam ni; mali suɣilo wahala dibu ni; tummi lahibal’ suŋ molo molibu tuma, ka tummi Naawuni ni piig’ a ni a tum tuun’ shɛl’ la. 6Saha paaya ni n nyɛvili leei sara maligu Naawuni sani; n dunia ŋɔ ni yibu saha miriya. 7N tuhi tuhiri suŋ; n zo tizɔbo la naai; n gbib’ yɛda niŋbu la. 8Ka pumpɔŋɔ wuntitali zuɣupil’ shɛli ti Duuma ŋun mali wuntia n-kariti saria la ni ti yɛn zaŋ ti ma di dabisili la dali n-do n-guli ma, ka di pala n kɔŋko ka o ti yɛn zaŋ ti, amaa o ni ti zaŋ li ti bɛnkam zaa gba suhuri ye o labbuna zuɣu la.

Pool mini Timoti maŋmaŋ’ yɛla

9Kpaŋm’ amaŋ’ ka n sanna pumpɔŋɔ.

10 # Kol 4.14; Fai 24; 2 Kɔr 8.23; Gal 2.3; Tait 1.4 Diimas ni yuri dunia ŋɔ la zuɣu, o zoya chaŋ Tɛsalɔnaika ka chɛ ma; Krɛshɛnsi chaŋ Galɛshia, ka Taitus mi chaŋ Dalimatia. 11#Kol 4.14; Fai 24; Tuma 12.12, 25; 13.13; 15.37-39; Kol 4.10 Luk kɔŋko n-kul kpalim be n sani. Zaŋm’ Maak m-pah’ amaŋ’ zuɣu kana, dama o nyɛla ŋun tooi sɔŋdi ma viɛnyɛliŋga. 12#Tuma 20.4; Ɛfɛs 6.21-22; Kol 4.7-8 N timla Tikikus Ɛfɛsus. 13#Tuma 20.6 Ka a yi ti kanna, nyin’ zaŋmi m binyɛr’ tibisi’ shɛli n ni daa chɛ n-sɔŋ Kaapus sani Troas la m-mali ma na; ka zaŋ litaafinim’ la gba pahi na, di bahi bamdi gbandi la. 14#1 Tim 1.20; Yila 62.12; Rom 2.6 Alikizanda ŋun nyɛ daanya doora la daa tum ma zaɣ’ biɛɣu pam; ti Duuma ni bɔh’ o biɛri labisi o ni tum shɛm maa zuɣu. 15Nyin’ gba mir’ o, dama o daa chihi ti yɛligu pam. 16N ni daa tuui tɔɣisi n-zabi mmaŋ’ zuɣu saha shɛl’ la, so daa bi zani n nyaaŋa; sokam zaa daa zomi ka chɛ ma. Naawuni di zaŋ di taali ʒili ba! 17Amaa ti Duuma daa zani n nyaaŋa, ka ti ma yaa ka m mol’ lahibal’ suŋ molo zaa, ka di chɛ ka bɛn pa Yɛhudianim’ zaa wum li. Ti Duuma daa yihi ma gbuɣinli nol’ ni. 18O ni yihi ma zaɣ’ biɛɣukam ni, ka ni gbib’ ma hal nti paag’ o daalizanda nam ni. Ŋuna n-simdi tibigibu hal ni saha din ka bahigu! Ami!

Puhigu din bahindi nyaaŋa

19 # Tuma 18.2; 2 Tim 1.16-17 Puhimi Prisila mini Akuila ni Onɛsifɔrus yiŋnima. 20#Tuma 19.22; Rom 16.23; Tuma 20.4, 21-29 Ɛrastus kpalim bela Kɔrinti; ka n daa chɛ Trɔfimus mi Milɛtus o ni daa ka alaafee zuɣu. 21Kpaŋm’ amaŋ’ kana ka kikaa na bi daai. Yubulus mini Pudɛns ni Linus ni Klɔdia zaŋ tabili ti mabihi bɛn kpalim la zaa puhir’ a. 22Ti Duuma kpaŋsim’ a suhu! Naawuni daalibarika kpalimmi be yi ni!

Currently Selected:

2 Timoti 4: DBwDB

Highlight

Copy