2 Tɛsalɔnaikanima 1
1
1 #
Tuma 17.1
Man’ Pool mini Silvanus ni Timoti n-sabiri gbaŋ ŋɔ tiri Tɛsalɔnaika cheechi niriba bɛn nyɛ ti Ba Naawuni mini ti Duuma Yisa Masia ni su shɛb’ la. 2Naawuni ŋun nyɛ ti Ba mini ti Duuma Yisa Masia niŋm’ alibarika niŋ yi ni, ka tin ya suhudoo!
Masia labbuna saha saria karibu yɛla
3Ti mabihi, di kpala talahi ni ti kul paɣiri Naawuni yi zuɣu sahakam. Di tuhiya ni ti niŋ lala, dama yi yɛda kul zoorimi, ka yi yurilim zaŋ chaŋ yi tab’ sani gba kul zoori pahira. 4Dinzuɣu ka timaŋmaŋ’ kul nyuri bara yi zuɣu Naawuni cheechinim’ ni. Ti niŋdila lala yi ni mali ʒiɛyimtali mini yɛda niŋbu yi daalaka nyabu mini yi wahala dibu puuni la zuɣu. 5Dimbɔŋɔnim’ nyɛla Naawuni sariakaribo din tuhi shihira, ka di wuhiri ni Naawuni chɛ ka yi leei bɛn simdi ŋun’ Naawuni nam shɛli zuɣu yi ni diri wahala ŋɔ ni kpɛbu. 6Naawuni ni niŋ din tuhi. O ni ti chɛ ka bɛn niŋdi ya wahala la gba di wahala. 7Ka o ni ti ti yinim’ bɛn diri wahala ŋɔ zaŋ tabili ti gba vuhim. O ni ti niŋla lala saha shɛli ti Duuma Yisa min’ o malaikanim’ yi ti yi palo zuɣusaa siɣirina o yiko mini buɣim din diri puuni 8ni o ti darigi bɛn bi mi Naawuni mini ninvuɣ’ shɛb’ bɛn zaɣisi ti Duuma Yisa lahibal’ suŋ wumbu la tibili. 9#Aiz 2.10 Bɛ ni ti nya tibidarigibo bahi yoli din ka bahigu puuni; ka bɛ mini ti Duuma ni o yiko din mali jilima la ni ti woligi taba. 10O yi ti labina o dabisili la dali ni o ti nya tibiginsim o ninvuɣ’ gahinda sani, ka nya jilima bɛn zaa niŋ o yɛda la sani, yinim’ gba ni ti be bɛ ni, yi ni daa niŋ ti ni zaŋ shɛhira shɛli yɛla na nti yɛli ya la yɛda la zuɣu.
11Di zuɣu ka ti kul suhiri Naawuni tiri ya. Ti suhiri Naawuni ni o chɛ ka yi leei bɛn simdi biɛhigu shɛli o ni boli ya ni yi ti mali la. Naawuni sɔŋmi ya n-chɛ ka yi nya yi ni bɔri zaɣ’ suŋ shɛlikam ka naai yi yɛda tuma la tin ya o yiko ni. 12Dimbɔŋɔ puuni ka ti Duuma Yisa yuli ni nya tibigibu yi sani, ka yi gba nya tibigibu o sani ti Naawuni mini ti Duuma Yisa Masia daalibarika zuɣu.
Currently Selected:
2 Tɛsalɔnaikanima 1: DBwDB
Highlight
Share
Copy
Want to have your highlights saved across all your devices? Sign up or sign in
Dagbani Bible with Deuterocanonical Books © Bible Society of Ghana, 2011.