1 Jɔn 3

Bɛn nyɛ Naawuni bihi

1 # Jɔn 1.12 Nyamiya ti Ba Naawuni ni yu ti yurilim shɛli, ka di zuɣu chɛ ka o bol’ ti ŋun’ Naawuni bihi; ka lala n-shiri nyɛ ti. Dimbɔŋɔ zuɣu ka dunia ŋɔ nim’ bi mi ti, ka di nyɛla bɛ ni bi mi o la zuɣu. 2M biyurisi, ti nyɛla Naawuni bihi pumpɔŋɔ, ka di na bi kahigi wuhi ti ni ti yɛn be shɛm, amaa ti lee mi ni o yi ti yi palo, ti ni bemi kaman ŋuna, dama ti ni ti nya o kaman o ni kul be shɛm. 3Ka ŋunkam mali tahima ŋɔ kul maanila omaŋa m-be kasi kaman o ni be kasi shɛm. 4Ŋunkam tumd’ alahichi nyɛla zaliguchihira, dama alahichi tumbu nyɛla zaligu chihibu. 5#Jɔn 1.29 Yi mi ni Masia daa kana ni o ti kpihimla ninsalinim’ daalahichi, ka alahichi ka o ni. 6Ka ŋunkam be Masia ni, o bi tumd’ alahichi; ka ŋunkam kul tumd’ alahichi, dindina o na bi nya o bee m-mi o. 7M bihi, di chɛliya ka so yɔhim ya. Ŋunkam tumdi din tuhi n-nyɛ wuntizɔra kaman Masia ni nyɛ wuntizɔra shɛm. 8Ka ŋunkam kul tumd’ alahichi nyɛla Sintani nira, dama piligu ni ha ka Sintani pun tumd’ alahichi. Ka daliri din chɛ ka Naawuni Bia daa kana nyɛla ni o ti saɣim Sintani tuma. 9Ŋunkam nyɛ Naawuni bia bi tumd’ alahichi, Naawuni biɛhigu ni be o ni ka o nyɛ Naawuni bia maa zuɣu ka o ku tooi tum alahichi. 10Dimbɔŋɔ n-kahigiri wuhiri Naawuni bihi ni nyɛ shɛba, ka lan wuhiri Sintani gba bihi ni nyɛ shɛba: Ŋunkam bi tumdi din tuhi bee n-yur’ o mabia pala Naawuni bia.

Tab’ yubu

11 # Jɔn 13.34 Yi ni daa wum yɛtɔɣ’ shɛŋa piligu ni ha la nyɛla ni ti yum’ taba. 12#Pil 4.8 Di bi simdi ni ti be kaman Keen ŋun daa nyɛ Sintani nira ka ku o mabia la. Bɔzuɣu ka o daa lee ku o? Di nyɛla o tuma ni daa bi tuhi ka o mabia maa ŋun’ tuma tuhi la zuɣu. 13M mabihi, dunianim’ yi jɛn ya, yin’ di chɛliya ka di gari ya. 14#Jɔn 5.24 Ti mi ni ti pun yi kum ni n-kpe nyɛvil’ ni ti ni yuri ti mabihi la zuɣu. Ka ŋunkam bi yur’ o mabia bela kum ni. 15Ŋunkam je o mabia nyɛla ninvuɣ’ kura, ka yi mi ni ninvuɣ’ kura ka nyɛvili din ka bahigu o ni. 16Masia ni daa zaŋ o nyɛvili pa talima ti zuɣu la puuni ka ti baŋ yurilim ni nyɛ shɛli, ka di simdi ni ti gba zaŋ ti nyɛviya pa talima ti mabihi zuɣu. 17So yi mali dunia ŋɔ buni, ka nya o mabia ŋun simdi sɔŋbu ka yih’ o suhu o ni, wula ka Naawuni yurilim ni tooi be nira ŋ-ŋɔ tatabo ni? 18M bihi, di bi simdi ni ti yurilim nyɛla yɛtɔɣa bee ti ni yɛri shɛm kɔŋko, amaa di simdi ni di nyɛla yurilim maŋli di tuma puuni.

Suhukpeeni niŋbu Naawuni sani

19Dimbɔŋɔ puuni ka ti baŋ ni ti dolila yɛlimaŋli, ka di chɛ ka ti mali suhukpeeni Naawuni sani. 20Ka saha shɛlikam ti suhuri yi ti wuhi ti ni ti mali galimi, Naawuni gari ti suhuri maa, ka mi binshɛɣukam zaa. 21M biyurisi, ti suhuri yi bi wuhi ti ni ti mali galimi, ti ni mali suhukpeeni Naawuni sani, 22ka ni deei ti ni suhi shɛlikam o sani, ti ni dol’ o zaligunim’ ka tumdi din tiɣir’ o nini la zuɣu. 23#Jɔn 13.34; 15.12, 17 O ni zali ti shɛm n-nyɛ ni ti niŋ o Bia Yisa Masia yuli yɛda ka yuri taba kaman o ni zali ti shɛm. 24Ka bɛnkam zaa dol’ o zaligunim’ maa be o ni, ka o mi be bɛ ni. O ni zaŋ o Shi’ so ti ti la n-chɛ ka ti baŋ ni o be ti ni.

Currently Selected:

1 Jɔn 3: DBwDB

Highlight

Copy

Compare