Zakaria 10
10
Naawuni lo alikauli ni o ni tilig’ o niriba
1Suhimiya Yawɛ saa
salan’ saa mibu saha.
Yawɛ n-chɛ ka saa sagbana zaani mira,
ka di chɛ ka sokam puri bindira niŋda.
2Buɣa mini laasabuniŋdiba ni yɛri shɛm
ka wuhiri niriba shɛm nyɛla ʒiri.
Ka ninvuɣ’ shɛb’ mi yɛri
ni bɛ kahigirila zahima gbinni wuhiri niriba,
amaa lala maa gba kul nyɛla yɔhiŋgu;
ka bɛ niriba suhukpaŋsibo ka buchi.
Dinzuɣu ka niriba maa dari gindi
kaman piɛri bɛn bɔrigi la.
Bɛ kul bela wahala ni
bɛ ni ka gul’ maa zuɣu.
3N suhu yiɣisiya pam bahi tinzunnim’
bɛn yi su n niriba maa zuɣu.
N ni darigi bɛ tibili.
Judanim’ nyɛla n niriba,
ka man’ Yawɛ ŋun nyɛ Tɔbbihi Naa ŋɔ ni gbib’ ba.
Bɛna n-yɛn nyɛ n tɔbutuhiri’ yuri
bɛn mali yiko pam.
4Bɛ puuni ka kuɣ’ tuuli ti yɛn yina.
Bɛ puuni ka suɣili kpaa ti yɛn yina.
Bɛ puuni ka tɔbutuhiri’ tɔbu ti yɛn yina.
Bɛ puuni ka zuɣulan’ kam ti yɛn yina.
5Judanim’ ni ŋmanila tɔbbi’ shɛb’ bɛn di nasara
ka no bɛ dimnim’ firi soli zuɣu baɣiri ni;
dama Yawɛ be bɛ sani.
Bɛ ni tuhi nyaŋ bɛ dimnim’
bɛn nyɛ tɔbutuhiri’ wɔribariba la.
6N ni chɛ ka Judanim’ mali kpiɔŋ;
ka fa Izraɛlnim’ mi bahi.
N ni zo ba nambɔɣu,
ka zaŋ ba labisi yiŋ’ na.
Bɛ ni be kaman n na ʒi
n-zaɣisi ba.
Mani n-nyɛ Yawɛ ŋun nyɛ bɛ
Naawuni; ka ni wum bɛ suhigu.
7Izraɛlnim’ ni mali kpiɔŋ
kaman tɔbbihi la,
ka mali suhupiɛlli
kaman wain nyuriba la.
Bɛ bihi ni ti teei bɛ nasara
dibu maa yɛla,
ka mali suhupiɛlli Yawɛ
ni tum shɛm maa zuɣu.
8N ni boli n niriba
n-laɣim ba.
N ni fa ba bahi,
ka chɛ ka bɛ kalinli zooi
kaman bɛ ni daa pun be shɛm.
9Hal n ni kul wurim ba kpɛhi
tinzun tinsi ni la zaa yoli,
bɛ ni be katinsi maa ha ka
teeri n yɛla.
Bɛ mini bɛ bihi ni tiligi,
ka ni ti laɣim tab’ labina.
10N ni yihi ba Ijipti mini
Asiria labisina
ti ʒili bɛmaŋmaŋ’ tiŋgbɔŋ ni.
N ni zaŋ ba ʒili Giliad mini Lɛbanɔn,
ka tiŋgbɔŋ maa zaa ti pali
niriba hal ka palo
ti ku lan beni.
11Bɛ yi ti kpe Ijipti teeku ni
ni bɛ gari,
n ni chɛ ka di kom
pirigi buyi dɔni,
ka Nail Mɔɣili bulli
la leei tiŋ’ kuŋ.
Ka Asirianim’ bɛn nyɛ
karimbaannim’ la ti nya filiŋ,
ka Ijiptinim’ bɛn mali
kpiɔŋ la mi kɔŋ yiko.
12N ni chɛ ka bɛ nya
kpiɔŋ Yawɛ sani,
ka bɛ ni ti n yuli jilima.
Man’ Yawɛ n-yɛli lala maa.
Currently Selected:
Zakaria 10: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
