Taitus 3
3
Yisa nyaandoliba biɛhigu ni nyɛ shɛm
1Teem’ niriba maa ni bɛ doli zuɣulaannim’ mini bɛn su fukumsi yɛligu ka deeri bɛ noli, ka mali shili n-tum tuun’ suŋ kam zaa. 2Bɛ mi di yɛli zaɣ’ biɛɣu n-dalim so, ka di ŋmɛri naŋgbankpeeni, amaa ka lee be baalim, ka mali sizuura lubu biɛhigu zaŋ chaŋ sokam zaa sani. 3Dama saha shɛli ha timaŋmaŋ’ gba daa nyɛla bɛn tumdi jɛrilim ka nyɛ tipawumlinima, ka nyɛ bɛn birigi yɔhiŋgu puuni, ka nyɛ kɔr’ biɛri balibu kam mini niŋgbuŋ kɔre nyaɣisim daba. Ti daa malila biɛr’ biɛɣu mini nyuli zabbu biɛhigu, ka ti tab’ daa je ti, ka ti gba je ba. 4Amaa Naawuni ŋun nyɛ ti Tiligira ŋɔ nirilim min’ o yurilim ni daa ti yi palo ninsalinim’ san’ la 5ka o tiligi ti, ka di daa pala ti ni tum wuntia tuun’ shɛŋa zuɣu, amaa o nambɔzɔbo zuɣu ka o paɣ’ ti ka ti yi, ka ti ti nyɛvil’ palli Naawuni Shia Kasi ni daa chɛ ka ti nya biɛr’ palli saha shɛl’ la. 6Shia Kasi maa n-nyɛ Shi’ so o ni daa zaŋ niŋ ti ni pam Yisa Masia ŋun nyɛ ti Tiligira la zuɣu 7ni di chɛ ka ti yi taali ni o daanfaani zuɣu, ka leeg’ o falidiriba zaŋ chaŋ nyɛvili din ka bahigu tahima niŋbu la polo. 8Yɛtɔɣa ŋɔ nyɛla yɛlimaŋli.
M bɔri ni a kpaŋsi yɛla ŋɔ, ka di chɛ ka bɛn niŋ Naawuni yɛda tooi zaŋ bɛ dahima tum tuun’ suma. Dimbɔŋɔnim’ viɛla, ka mali buchi ninsalinim’ sani. 9Amaa zom’ yɛtɔɣ gbalin chɔɣima tɔɣisibu mini dɔɣirikpamba yuya yɛla ni naŋgbankpeeni ŋmɛbu ni zabili zaŋ chaŋ Naawuni zaligu yɛla polo, dama di nyɛla yoli ni din ka buchi. 10A yi kpahi ninvuɣ’ so ŋun tahiri woligibu na zuɣu ni yim nti lan pahi buyi ka o bi taɣi, nyin’ di lan kal’ o pahi yi kalinli ni, 11ka baŋ ni dilana nyɛla tɛhitilimalana ni alahichilana ŋun maŋmaŋ’ tuma kar’ o saria. Wuhibu shɛŋa din bahindi nyaaŋa. 12#Tuma 20.4; Ɛfɛs 6.21-22; Kol 4.7-8; 2 Tim 4.12 N yi ti tim Aritimas bee Tikikus a sanna, nyin’ kpaŋm’ amaŋ’ ka n sanna Nikɔpolis, dama n loya ni m be nimaani kikaa saha. 13#Tuma 18.24; 1 Kɔr 16.12 Kpaŋm’ amaŋ’ chɛ ka Ziinas ŋun nyɛ zaligubaŋda la mini Apolɔs niŋ yomyom gbaai soli chaŋ, ka zaŋ di ni simdi ni bɛ mali shɛli ti ba. 14Di niŋ kamaata ni a chɛ ka ti niriba maa baŋ ni di simdi ni bɛ zaŋ bɛ dahima tum tuun’ suma n-sɔŋ bɛn simdi sɔŋbu, ka pa ni bɛ mali biɛhigu shɛli din ka nyɔri. 15Bɛn zaa be n san’ la puhir’ a. Puhimi ninvuɣ’ shɛb’ bɛn yuri ti daadiini soli zaŋ chaŋ yɛda niŋbu ni la ti ma. Naawuni daalibarika kpalimmi be yi zaa ha ni!
Red Letter Dagbani Bible © Bible Society of Ghana, 2011