Rut 3
3
Rut kul’ doo
1Dahin shɛli ka Rut yidan’ ma Naomi daa ti yɛl’ o, “Di simdi ni m bo soli n-sɔŋ a ka a nya doo kuli, ka di chɛ ka a gba mal’ a dintoli biɛhigu shee. 2Teemi ni a ni daa doli Bɔaz so paɣisara yihiri kayiha la nyɛla ti dɔɣira. Wumma, yuŋ ŋɔ o ni be kabɔɣili ni m-buri chi. 3Dinzuɣu sum’ kom n-niŋ tulaale niŋ a ni, ka zaŋ a situr’ suma so n-chaŋ o ni be luɣ’ shɛli yeeni o chi maa. Amaa di chɛ ka o baŋ ni a be nimaani hal ka o ti di ka nyu n-naai. 4O yi ti dɔni, nyin’ kpahimmi baŋ o ni dɔni luɣ’ shɛli maa, ka o ti ʒeei gom bahi ka a chaŋ o naba polo ti viig’ o chinchini baalim ka dɔni o naba tiŋli. O ni ti wuh’ a a ni yɛn niŋ shɛm.”
5Ka Rut yɛli, “N ni niŋ a ni yɛl’ shɛlikam maa zaa.”
6Ka Rut daa chaŋ kabɔɣili maa ni nti shiri niŋ kaman o yidan’ ma maa ni daa wuh’ o ni o niŋ shɛm maa. 7Ka Bɔaz daa ti di ka nyu n-naai, ka o suhu dɔni luɣ’ yini, ka o chaŋ kaʒee gbini ti dɔni ni o gbihi. Ka di daa tooi biɛla ha, ka Rut ti puɣisi chaŋ o naba polo ti viig’ o chinchini baalim ka dɔni o naba tiŋli. 8Ka Bɔaz daa ti neei kaman yuntisuɣu saha n-lɛbig’ omaŋ’ tuug’ o ka di gar’ o, o ni nya ka paɣ’ do o naba tiŋli maa zuɣu. 9Ka o bɔhi, “Ŋuni n-lee bala?”
Ka o garigi yɛli, “N dana, man’ Rut m-bala. Kpuɣim’ ma leeg’ a paɣa, dama a nyɛla n dɔɣira ŋun ni tooi gbib’ ma.”
10Ka Bɔaz yɛl’ o, “Yawɛ niŋm’ alibarika niŋ a ni. Hal a ni niŋ nirilim shɛli pumpɔŋɔ ŋɔ gar’ a ni pun niŋ a yidan’ ma nirilim shɛl’ la. A naan tooi chaŋ ti bo nachimbil’ so ŋun nyɛ bundana bee faralana, amaa a bi niŋ lala. 11M bia, di chɛ ka a suhu zɔhira. N ni niŋ a ni yɛli shɛlikam maa zaa, dama ŋunkam be ya ŋɔ mi ni a nyɛla paɣ’ so ŋun mali biɛrisuŋ. 12#Rut 2.20 Di nyɛla yɛlimaŋli ni n nyɛla a dɔɣim puuni ninvuɣ’ so ŋun su a gbibbu fukumsi, amaa ninvuɣ’ so ŋun nyɛ dɔɣim maa puuni nira ka miri dɔɣim maa gari ma gba beni. 13Gbɛm’ kpe yuŋ ŋɔ, ka di sa neei ka ti nya dilan’ ni saɣi tum di tuma bee o ku saɣi. O yi saɣi ni o ni niŋ li, di viɛla, ka o yi bi saɣi, dindina m-po Yawɛ ŋun be ŋɔ ni n ni tum di tuma maa. Dinzuɣu dɔnimi ka biɛɣ’ neei.”
14Ka o daa dɔni o naba tiŋli maa, amaa ka daa ti daŋ yiɣisibu asibaasi ŋaraŋara saha shɛli so ni ku tooi nya o baŋ o, dama Bɔaz daa bi bɔri ni so baŋ ni o ka nimaani na. 15Ka Bɔaz daa yɛli Rut, “Pirigim’ a ni ye binyɛr’ shɛli pa zuɣusaa ŋɔ n-teei li sɔŋ.” Ka o daa pirigi li na, ka o tooi chi ka di ni paai kaman kilɔgiram pisi n-kpaai niŋ o di ni, ka kpuɣi li sɔŋ o ka o ʒi li kuli. 16O ni daa mali ti paai yiŋa, ka o yidan’ ma bɔh’ o, “M bia, ka di nyɛ wula zaŋ chaŋ a polo?”
Ka Rut daa yɛl’ o Bɔaz ni yɛl’ o shɛlikam zaa. 17Ka lan yɛli, “O yɛli ma ni di bi simdi ni n lab’ kuna ni nuzaŋa, ka zaŋ chi ŋɔ zaa ti ma.”
18Ka Naomi yɛli Rut, “M bia, guhimi nya yɛla maa zaa ni yɛn bahindi shɛm. Doo maa ku vuhi ka pa ni o nyala yɛla maa kpaa shee zuŋɔ.”
Red Letter Dagbani Bible © Bible Society of Ghana, 2011