Yila 78
78
Naawuni min’ o niriba#Di nyɛla Asaf yilli din wuhiri niriba.
1N niriba, wummiya n wuhibu;
wummiya n noli ni yɛtɔɣa.
2 #
Mat 13.35
N yɛn ŋahila ŋaha.
N yɛn tɔɣisila kurimbuni ha ashili yɛtɔɣa.
3Di nyɛla ti ni pun wum binshɛŋa yɛla ka mi li.
Di nyɛla ti yaannim’ ni daa pun yɛli ti shɛli yɛla.
4Ti ku zaŋ li sɔɣi ti bihi,
ti ni zaŋ Yawɛ jilima tuma min’ o tuun’
kara ni o daalahiziba tuun’ shɛŋa
o ni tum la yɛla yɛli
ʒiɛmana din kanna niriba.
5O daa zali Yaakubu zuliya zaligu,
ka zali zaligu Izraɛl tiŋgbɔŋ ni.
Di nyɛla o ni daa zali ti yaannim’
zaligu shɛli ni bɛ zaŋ wuhi bɛ bihi,
6ka lala zuɣu chɛ ka ʒiɛmana din kanna niriba ti mi li,
ka bɛ ni na bi dɔɣi bi’ shɛb’
gba ti yiɣisina n-zaŋ li
wuhi bɛ bihi.
7Ka lala zuɣu chɛ ka bɛ zaŋ bɛ
tahima niŋ Naawuni ni,
ka ku tam Naawuni tuma yɛla,
ka kul dol’ o zaligunima.
8Ka di chɛ ka bɛ ku be
kaman bɛ yaannim’ bɛn daa nyɛ tipawumlinim’
mini duŋtaariba ʒiɛmani niriba la.
Bɛ daa nyɛla ʒiɛman’ shɛli niriba bɛn bi
ʒe yim bɛ suhuri ni.
Bɛ daa lan nyɛla ninvuɣ’ shɛb’ bɛn bi
ʒe Naawuni yim.
9Ifriim zuliya bɛn daa gbibi tɔbiri daa
ŋmaligi guui tɔbu tuhibu dali.
10Bɛ daa bi gbibi Naawuni ni lo ba alikauli shɛl’ la,
ka daa zaɣis’ o zaligu dolibu.
11Bɛ daa tam o ni pun tum shɛm
min’ o ni daa tum alahiziba tuun’
shɛŋa wuhi ba la yɛla.
12 #
Yibu 7.8—12.32
Bɛ yaannim’ ninni ka o daa
tum alahiziba tuma
Zɔan bɔpiɛligu ni
Ijipti tiŋgbɔŋ ni.
13 #
Yibu 14.21-22
O daa chɛ ka teeku pirigi ka chɛ
ka bɛ siɣi di ni gari,
o daa chɛ ka kom laɣim ti dɔni
kaman kunkuni la.
14 #
Yibu 13.21-22
O daa chɛ ka sagbani n-wuhiri
ba soli wuntaŋ’ ni,
ka chɛ ka buɣim neesim mi wuhiri
ba soli yuŋ hal ka biɛɣu ti neei.
15O daa chɛ ka tampima
bɔɣi yɔɣu sunsuuni,
ka o daa ti ba kom pam din be
kaman teeku kɔbulli ni kom la,
ka bɛ nyu.
16 #
Yibu 17.1-7; Kal 20.2-13 O daa chɛ ka kɔzɔrim yi tampiŋ ni na
n-zɔri kaman mɔɣa kom la.
17Amaa ka bɛ daa na kul tumd’ alahichi
zaŋ chaŋ o sani,
ka kul taari duŋ niŋdi
Zallakudura Naa mɔɣu maa ni.
18Bɛ daa buɣisi Naawuni bɛ suhuri ni ni bɛ nya,
bɛ suhuri ni daa ye bindir’ shɛli zuɣu la ni.
19Bɛ daa tɔɣisi yɛtɔɣa jɛndi Naawuni ka bɔhi,
“Naawuni ni tooi ti ti bindirigu
tiŋgban’ nɛli ŋɔ ni?
20Hal o ni daa ŋme tampiŋ
ka kom tɔhi yi di ni na zɔri maa,
o ni tooi ti bindira gba
bee n-ti o niriba nimdi?”
21Dinzuɣu Yawɛ ni daa wum yɛlli ŋɔ,
o suhu daa yiɣisiya pam,
ka o daa zaŋ buɣim lu Yaakubu zuliya zuɣu;
ka o suhu daa yiɣisi pam bahi Izraɛlnim’ zuɣu.
22Bɛ ni daa bi niŋ Naawuni yɛda,
ka bi lan niŋ o tiliginsim yiko naani la zuɣu.
23Amaa ka o daa zali sagbana
din be zuɣusaa ŋɔ zaligu
ka zuɣusaa dunoya daa yooi;
24 #
Jɔn 6.31
ka o chɛ ka manna
lu bɛ sanna ni bɛ di,
ka o daa ti ba zuɣusaa bindirigu.
25Ninsalinim’ daa di malaikanim’ bindirigu.
O daa ti ba li pam.
26O daa chɛ ka wulimpuhili polo
pɔhim ʒiɛri zuɣusaa.
O yiko puuni ka o daa chɛ
ka nudirigu polo pɔhim ʒɛna;
27ka o chɛ ka noonsi yiɣina
ti lu bɛ sani.
Bɛ daa galisiya pam ŋ-ŋmanila
teeku noli bihigu;
28ka o daa chɛ ka bɛ yiɣina ti lu bɛ sansani maa ni
n-gili bɛ biɛhigu maa shee zaa.
29Ka niriba maa daa ŋubi ba tiɣi;
dama o daa ti ba bɛ suhuri ni ye shɛli zuɣu.
30Amaa bɛ daa na bi di bɛ
suhuri ni ye shɛli zuɣu maa tiɣi;
bindirigu maa ni daa na kul be bɛ noya ni saha shɛli maa,
31 #
Yibu 16.2-15; Kal 11.4-23, 31-35 ka Naawuni suhu daa yiɣisi
bahi bɛ zuɣu, ka o ku bɛ ni bɛn mali kpiɔŋ.
O daa booi Izraɛl nachimbihi gahinda kalinli.
32Amaa dimbɔŋɔnim’ zaa yoli,
ka bɛ daa na kul tumd’ alahichi;
o daalahiziba tuma la zaa yoli,
bɛ daa bi niŋ o yɛda.
33Dinzuɣu ka o daa chɛ ka
bɛ nyɛviya zan’ tariga kaman nir’ ni yi
vuhi pɔhim bahi la;
ka chɛ ka dabiɛm mali ba bɛ ni
be yuun’ shɛŋa ni.
34O daa yi ti chɛ ka bɛ kpira,
bɛ ŋmaligirimi lab’ o sani
ti niŋ tuuba, ka jɛmd’ o ni nimmoo.
35Bɛ daa teeri ni Naawuni n-nyɛ
bɛ Tampiŋ Kpiɔŋ ŋun tiligiri ba,
ka lan teeri ni Zallakudura Naa
n-nyɛ ŋun fari ba bahira.
36Amaa naŋgbammalisim ka bɛ daa kul niŋd’ o,
bɛ daa ŋmar’ o la ʒiri.
37 #
Tuma 8.21
Bɛ suhuri daa bi ʒe yim
zaŋ chaŋ o sani;
ka bɛ mi daa bi dol’ o
ni lo ba alikauli shɛl’ la soli.
38Amaa Naawuni daa zo o niriba
maa nambɔɣu,
ka chɛ bɛ daalahichi maa,
ka bi chɛ ka bɛ bahi yoli.
O gbaar’ omaŋa o sujee puuni waawaayili,
ka bi chɛ ka o
suhuyiɣisili dii chani tooni.
39O teeya ni bɛ kul nyɛla ninsalinima,
ka ŋmani pɔhim din ʒe n-gari
ka ku lan tooi labina.
40Siɣimsiɣim bushɛm ka bɛ daa taai duŋ niŋ o
tiŋgban’ nɛl’ la ni,
ka daa saɣim’ o suhu pam!
41Bɛ daa buɣisi Naawuni siɣimsiɣim bushɛm ni bɛ nya,
ka daa chɛ ka Izraɛl
Naawuni ŋun be
kasi ŋɔ suhu yiɣisi.
42Bɛ daa tam o yiko yɛla,
ka tam o ni daa tiligi ba
bɛ dimnim’ nuu ni
dahin shɛl’ la yɛla;
43ka tam o ni daa wuhi
shihir’ shɛŋa Ijipti la
mini alahiziba tuun’ shɛŋa o ni daa tum
Zɔan mɔɣu ni la gba yɛla.
44 #
Yibu 7.17-21
O daa chɛ ka bɛ mɔɣa kom leei ʒim,
ka bɛ ku tooi lan nyu bɛ kulibɔna kom.
45 #
Yibu 8.1-6, 20-24 O daa chɛ ka zɔhi waɣi
pam muɣisi ba,
ka chɛ ka poloya gba
waɣi n-saɣim bɛ tiŋgbɔŋ.
46 #
Yibu 10.12-15
O daa chɛ ka zunzuya kana ti ŋub’ bɛ bindira,
ka chɛ ka toli kana ti saɣim bɛ puri atam.
47O daa chɛ ka sakuɣa luna ku bɛ wain tihi,
ka chɛ ka maligim din leeri sakuɣa luna
saɣim bɛ fiig tihi wala zaa.
48 #
Yibu 9.22-25
O daa chɛ ka sakuɣa luna ku bɛ niɣi,
ka chɛ ka saa tahi ku bɛ biŋkɔbbaligu.
49O daa chɛ ka o suli min’ o sujee ni o
suhuyiɣisili ni nandahima paai ba,
ka di ŋmanila malaika bɔbili bɛn kuri niriba.
50O daa bi gbaag’ omaŋa o sujee ni,
o mi daa bi tiligi bɛ nyɛviya,
amaa ka daa chɛ ka alɔbo di ba.
51 #
Yibu 12.29
O daa ku Ijiptinim’ bidib’ kpamba zaa
bɛn daa nyɛ bɛ ni tuui dɔɣi bi’ shɛba Ham suɣa ni la.
52 #
Yibu 13.17-22
Di nyaaŋa ka o daa zaŋ
o niriba maa kaman
piɛri la chaŋ, ka wuhi
ba soli mɔɣu ni
kaman biŋkɔbbaligu n-nyɛ ba la.
53 #
Yibu 14.26-28
O daa zaŋ ba chaŋ ni alaafee,
ka dabiɛm bi mali ba,
ka teeku daa zaŋ bɛ dimnim’ la vali.
54 #
Yibu 15.17; Jɔsh 3.14-17 O daa zaŋ ba tah’ o
tiŋgbɔn kasi ni
zoya tiŋgbɔn’ shɛŋa o ni
daa zaŋ o nudirigu tuhi fa la ni.
55 #
Jɔsh 11.16-23
O daa kari zuliya shɛba,
ka piri bɛ tiŋgbɔŋ
ti Izraɛl zuliya,
ka deei bɛ yinsi
ti ba ka bɛ kpe m-beni.
56 #
Zuɣ 2.11-15
Amaa ka bɛ daa buɣisi Naawuni
ŋun nyɛ Zallakudura Naa ŋɔ ni bɛ nya,
ka daa taai duŋ niŋ o,
ka bi dol’ o zaligunima,
amaa ka bɛ daa ti ŋmaligi n-leei bɛn bi ʒe yim,
57kaman bɛ yaannim’ la,
bɛ daa bemi kaman tɔb’
shɛli din naɣilimnaɣilim.
58Dama bɛ daa ku o suli
bɛ buɣa jɛmbu ni,
ka daa chɛ ka nyuli
gbaag’ o bɛ binnana jɛmbu zuɣu.
59Naawuni ni daa wum li,
ka o suhu yiɣisi pam,
ka o daa zaɣisi Izraɛlnim’ zaa di zuɣu.
60 #
Jɔsh 18.1; Jɛr 12—14; 26.6 O daa zaɣis’ o biɛhigu shee
din be Shilo#78.60 SHILO: Kpe n-daa nyɛ Izraɛlnim’ ni jɛmdi Naawuni luɣ’ shɛli pɔi ka Naa Dauda ʒiɛmani daa naanyi ti kana.
ka nyɛ tanti du’ shɛl’ ni
o ni daa be ninsalinim’
sunsuuni la,
61 #
1 Sam 4.4-22
ka zaŋ o yiko niŋ dabitim ni,
ka chɛ o jilima ti ti dimnima.
62Ka o suhu daa yiɣisi bah’ o
niriba maa zuɣu,
ka chɛ ka bɛ dimnim’
zaŋ takɔbiri ku ba.
63Buɣim daa di n-ku bɛ nachimbihi,
ka paɣisara daa kɔŋ amiliya lɔbu yila.
64Bɛ daa zaŋ takɔbiri ku bɛ maligumaaniba,
ka bɛ pakoya daa bi
tooi kum bɛ zuɣu.
65Di saha ka ti Duuma daa
vaai yiɣisi kaman o
neela gom ni la
bee m-be kaman tɔbutuhira ni yi nyu
wain buɣi n-tahiri shɛm la.
66Ka o daa kar’ o dimnim’ maa bahi;
ka chɛ ka bɛ di vi
din ku naai.
67O daa zaɣisi Yisifu zuliya,
o daa bi pii Ifriim zuliya.
68Amaa ka daa naɣ’ piila
Juda zuliya mini
Ziɔn Zoli din nyɛ
o ni yuri shɛl’ la.
69O daa me o jɛmbu duu
ka di be kaman alizanda la,
ka be kaman o ni daa nam dunia ŋɔ
ka di kul beni sahakam shɛm la.
70O daa piila o dabili Dauda,
o daa yih’ o la piɛgulibo ni
71 #
1 Sam 16.11-12; 2 Sam 7.8; 1 Yɛl 17.7 luɣ’ shɛli o ni daa be
n-lihir’ o piɛ’ shɛb’
bɛn mali bihi la
ni o ti leei ŋun su Yaakubu zuliya bɛn nyɛ
ŋun’ Naawuni niriba Izraɛlnim’ la.
72Ka o daa zaŋ suhuyini
n-gbib’ ba,
ka daa doli yɛm
soli wuhi ba din tuhi.
Red Letter Dagbani Bible © Bible Society of Ghana, 2011