Ŋaha 31
31
Naa Saɣisibu
1Naa Lɛmuɛl yɛtɔɣa, din nyɛ o ma ni daa wuh’ o anabitali yɛtɔɣ’ shɛli. 2Aai, m bia! Aai, m pul’ ni bia! Aai, n nɔpoli bia! 3Miri ka a zaŋ a yaa ti paɣiba, a mi di zaŋ a soya ti bɛn kuri nanima. 4Lɛmuɛl, wumma, di bi simdi ni nanim’ nyuri wain bee ka nanim’ chɛ ka bɛ kɔre be dam din kpɛm’ nyubu ni. 5Di yi pa lala bɛ ni nyuli kuli, ka tam zaligu yɛla, ka mɔŋ ninvuɣ’ shɛb’ bɛn be muɣisigu ni zaa yɛlimaŋli. 6Zaŋmi dam din kpɛma n-ti ninvuɣ’ so ŋun yɛn kpi, ka zaŋ wain ti ninvuɣ’ shɛb’ bɛn be nandahima pam ni, 7ka bɛ nyu li ka tam bɛ fara yɛla, ka ku lan teei bɛ suhugarigu yɛla.
8Zanimi ninvuɣ’ shɛb’ bɛn ku tooi tɔɣisi yɛtɔɣa zaani n-tɔɣisi bɛ yɛtɔɣa ti ba. Zabimi bɛn ka yaa yɛlimaŋli zuɣu. 9Yɛlim’ din beni, karimi saria ni wuntizɔbo. Zabimi faranim’ mini nandaamba yɛlimaŋli zuɣu.
Paɣ’ so ŋun nyɛ paɣ’ maŋli
10Ŋuni n-lee ni tooi nya paɣ’ so ŋun nyɛ yidaampaɣ’ maŋli? O gari salima.
11O yidan’ niŋ o naani o suhu ni, ka shɛli ku poog’ o yidana maa.
12O niŋdila o yidana din viɛla o biɛhigu ni zaa, ka pa ni zaɣ’ biɛɣu.
13O nyɛla ŋun bɔri piɛri kɔbiri mini gumdi shee, ka zaŋ o nuhi tumdi tuma ni o suhu zaa.
14O ŋmanila kɔhigɔriba ŋarima; o ʒir’ o bindirigu yirila katiŋ’ na.
15O daŋdila yiɣisibu di ni na bi neei saha shɛli n-niŋdi bindirigu tir’ o yiŋnima, ka tir’ o tumtumdiba bɛn nyɛ bipuɣinsi tuma.
16O zahindila puu pɔi ka naanyi da li. O zaŋdila o ni tum tuma nya laɣ’ shɛli n-ko wain tihi puu.
17O nyɛla ŋun mali kpiɔŋ, ka kpaŋsir’ o bɔɣiri n-tumdi kpiɔŋ tuma.
18O mi ni o daguya mali nyɔri, o firila bi kpiri yuŋ.
19O gbibila gummua o nuu ni, ka mali o nubihi wahiri jɛni.
20O tiri nandaamba pina, ka tiri bɛn ka pina.
21Wari yi beni o suhu bi zɔhiri o yiŋnim’ zuɣu, dama o yiŋnim’ zaa yɛrila situr’ tibisa.
22O wuɣir’ omaŋmaŋ’ garo bimpara. O situra nyɛla tampiɛl’ viɛlli mini tan’ ʒiɛkpeein.
23Sokam mi o yidana tiŋ’ maa dunɔdaya gbini, ka o mini tiŋgbɔŋ maa ni kpamba laɣindi ʒiina.
24O shɛrila tan’ piɛla binyɛra kɔhira, ka maani shɛlɔriti kɔhiri kɔhigɔriba zuɣu.
25Kpiɔŋ mini jilima n-nyɛ o situra, o suhu bi zɔhiri saha shɛŋa din kanna zuɣu.
26O yaar’ o noli n-tɔɣisiri yɛm yɛtɔɣa, ka nirilim niŋbu wuhibu be o noli ni.
27O gbib’ o yiŋnim’ viɛnyɛliŋga; o pala vinnyaɣilana.
28O bihi ni yiɣisi paɣ’ o ka o yidan’ gba paɣ’ o, yɛli,
29“Paɣiba pam tum din viɛla, amaa nyini n-gari bɛ zaa.”
30Nɛma nyaɣinyaɣi nyɛla yɔhiŋ, ka viɛlim nyɛ din naara, amaa paɣ’ so ŋun zɔri Yawɛ n-nyɛ ŋun simdi paɣibu.
31Tim’ o o nuhi tuma tarili, ka chɛ ka o tuma paɣ’ o tiŋ’ maa dunɔdaya ni.
Red Letter Dagbani Bible © Bible Society of Ghana, 2011