Ŋaha 28
28
1Ninvuɣ’ biɛri kul zɔrimi hal so yi bi kariti doli ba, amaa wuntizɔriba bɛn’ kul malila suhukpeeni kaman gbuɣinli la.
2Tiŋgbɔn shɛli din niriba taari duŋ, di malila zuɣulaan’ bɔbigu, amaa zuɣulaan’ so ŋun mali yɛm yi dira, binshɛlikam niŋdila viɛnyɛliŋga yuui.
3Tarim’ so ŋun nahind’ o tarim’ taba ŋmanila sa’ so ŋun mi n-ʒi bindira zaa chaŋ.
4Ninvuɣ’ shɛb’ bɛn bi doli zaligu paɣirila ninvuɣ’ biɛri, amaa ninvuɣ’ shɛb’ bɛn doli zaligu mini ba bi tuhira.
5Ninvuɣ’ biɛri bi mi din niŋ kamaata, amaa ninvuɣ’ shɛb’ bɛn jɛmdi Yawɛ bɛn’ mi li viɛnyɛliŋga.
6Nir’ yi nyɛ faralana ka o biɛhigu be tibi, di so ni o nyɛ bundana ka nyɛ bilikɔɣino o tuma ni.
7Bi’ shɛb’ bɛn doli zaligu nyɛla bɛn mali yɛm. Amaa bi’ shɛb’ bɛn zaŋ bɛmaŋ’ pahi pulaannim’ zuɣu nyɛla bɛn dihiri bɛ banim’ mini bɛ manim’ vi.
8Ninvuɣ’ so ŋun niŋ o kɔhimma nyɔri ti yaɣi ni o nya buni pam, o bɔri li zaanila ninvuɣ’ so ŋun niŋdi nandaamba nirilim.
9Nir’ yi zaɣisi zaligu dolibu, hal dilan’ wunsuhigu nyɛla din chihira.
10Ninvuɣ’ shɛb’ bɛn yɔhim wuntizɔriba kpɛhi zaɣ’ biɛɣu ni ni ti lu bɛmaŋmaŋ’ ni gbi bɔɣ’ shɛŋa ni. Amaa ninvuɣ’ shɛb’ bɛn ka galimi ni ti nya laara din viɛla.
11Bundana tɛhiya ni o mali yɛm omaŋ’ duhibu ni, amaa faralan’ ŋun mali fahim ni nya li o biɛhigu ni.
12Wuntizɔriba yi di nasara, niriba malila suhupiɛlli pam, amaa ninvuɣ’ biɛri yi di nasara, niriba sɔɣirimi. 13Ŋunkam sɔɣi zaɣ’ biɛɣu ku tɔŋ, amaa ŋunkam yihi li palɔni, ka zaɣisi li ni nya nambɔzɔbo.
14Ninvuɣ’ so ŋun zɔri Yawɛ sahakam mali alibarika, amaa ninvuɣ’ so ŋun suhu kpɛma ni nya mbusim.
15Na’ so ŋun nyɛ putɔɣulana yi su tarimba, o ŋmanila gbuɣinli ŋun ŋumda bee jɛŋgbini ŋun yiɣina ni o gbaai so.
16Na’ so ŋun ka tɛhi’ zilima nyɛla putɔɣulana ŋun niŋdi niriba fitiina, amaa ninvuɣ’ so ŋun je zalinsi bini ni mali nyɛvili wɔɣinli.
17Ninvuɣ’ so yi ku o kpee, yin’ chɛ ka ŋun ku o kpee maa kul dari ginda hal ti kpi; ka di chɛliya ka so sɔŋ o.
18Ŋun doli yɛlimaŋli soli ni tiligi, amaa ŋun doli bilikɔnsi soli ni ti lu bɔɣili ni.
19Ŋun kɔra, o ni mali bindirigu pam, amaa ŋun doli binshɛŋa din ka buchi, fara ni gbaag’ o pam.
20Ninvuɣ’ shɛb’ bɛn ʒe yim ni nya alibarika pam, amaa ninvuɣ’ so ŋun bɔri ni o nya buni yomyom ku yi tibidarigibo ni.
21Niriba gaŋbu bi viɛla, amaa bindirigu biɛla zuɣu ni tooi chɛ ka nir’ tum gala.
22Shimilan’ bɔri ni o nyala buni yomyom, ka bi mi ni ashaara nyɛla din yɛn kana ka biɛhiŋ kani.
23Ŋunkam kpahi nir’ zuɣu ni, di nyaaŋa o ni nya yurilim dilan’ sani n-gari ninvuɣ’ so ŋun zaŋ naŋgbammalisim yɛtɔɣa tɔɣis’ o.
24Ŋunkam zu o ba bee o ma binshɛli ka yɛli ni di pala zaɣ’ biɛɣu, dilan’ nyɛla ŋun pahi ninvuɣ’ kuriba ni.
25Diribarilimlan’ nyɛla ŋun bɔri zabili, amaa ŋunkam niŋ Yawɛ naani ni tɔŋ.
26Ninvuɣ’ shɛb’ bɛn nini tiɣi bɛmaŋmaŋ’ yɛm nyɛla jɛra, amaa ninvuɣ’ shɛb’ bɛn doli yɛm soli ni yi barina ni.
27Ŋunkam tiri nandaamba pini, shɛli ku poog’ o, amaa ŋunkam lab’ o nini kpaŋa, noli ni di o.
28Ninvuɣ’ biɛri yi di nasara, niriba zɔrimi sɔɣira, amaa bɛ yi ti lan kani, wuntizɔriba zoorimi pahi.
Red Letter Dagbani Bible © Bible Society of Ghana, 2011