Ŋaha 27
27
1 #
Jeem 4.13-16
Miri ka a nyuri bara biɛɣuni zuɣu, dama a bi mi dabisili maa ni yɛn tahi yɛl’ shɛli na.
2Chɛ ka so m-paɣ’ a ka pa ni nyin’ yaag’ a noli paɣ’ amaŋa; chɛ ka sana m-paɣ’ a ka pa ni nyin’ paɣ’ amaŋa.
3Kuɣili tibisa, ka bihigu tibisa, amaa jɛrigu ni tahiri suhuyiɣisili shɛl’ na tibisi gari di zaa.
4Sujee nyɛla putɔɣu, ka suhuyiɣisili kɔŋ tim, amaa nyuli zabbu m-bie n-gari di zaa.
5A yi yi zahira kpahi nir’ zuɣu ni, di so ashilɔni yurilim.
6A zo yi ti a dansi di mali daliri, amaa a dim’ ŋun’ kul yɛn mɔɣisirila a kpariŋ bushɛm.
7Nir’ yi di n-tiɣi, o baɣa ka shiri ni, amaa kum yi mali nira, hal binshɛli din to gba nyaɣisimi.
8Nir’ yi kpe yɔɣu ka chɛ o yiŋa, di ŋmanila noombila n-kpe yɔɣu ka chɛ o tiɛɣu.
9Tulaale mini tulaalɛzim nyɛla din paligiri suhu, amaa yɛlimuɣisirili nyɛla din kabiri suhu.
10Miri ka a zaŋ a zo bee a ba zo bahi, ka miri ka a ti chaŋ a dɔɣira yiŋa a muɣisigu saha. A ʒiʒiinikpee ŋun be yoma so a mabihi bɛn be katiŋa.
11M bia, mali yɛm, ka chɛ ka n suhu piɛla, ka n ni tooi garigi ŋunkam galindi ma yɛtɔɣa.
12Bɛn mali yɛm yi nya ka barina kanna bɛ sɔɣirimi, amaa bɛn ka yɛm bɛn’ ni chaŋ ti kpe di ni n-di wahala.
13Ŋunkam zani sana nyaaŋa ka o paŋ binshɛli, yin’ deem’ dilan’ binyɛrigu, ŋunkam zaŋ binshɛli pa talima ka deei binshɛli ti tinzunnima, yin’ deemiy’ o ni zaŋ binshɛli pa talima maa.
14Ŋunkam daŋdi yiɣisibu asiba n-duhi o yee puhi o ʒiʒiinikpee, bɛ ni yɛli ni noli ka o yɛr’ maa.
15Paɣ’ so ŋun bɔri zabili pam ŋmanila saa ŋun kul yɔrita ka bi baara.
16A yi yɛn goog’ o, di ŋmanila pɔhim ka a yɛn gooi bee kpa’ kom ka a yɛn zaŋ kpib’ a nudirigu ni.
17Kurigu n-sahiri di kpee, ka ninsalinim’ gba nyari baŋsim tab’ sani.
18Ŋunkam maani fiig tia viɛnyɛliŋga ni di di wala; ka ŋunkam lihir’ o dana viɛnyɛla ni nya jilima.
19Kaman kom ni chɛ ka nir’ nyar’ o ninni shɛm la, lala ka ninsal’ suhu nyari di kpee.
20Kum mini kpiimba biɛhigu shee ni na ʒi n-tiɣi shɛm la, lala ka ninsal’ nina gba na ʒi n-tiɣi.
21Bɛ ni zaŋdi duɣu n-doori anzinfa, ka zaŋdi buɣim titali n-doori salima shɛm, lala ka bɛ buɣisiri ninsal’ gba o paɣibu ni.
22Bɛ yi zaŋ jɛrigu niŋ tol’ ni pahi bɛ ni yɛn to shɛli zuɣu n-zaŋ tiliga to o, di zaa yoli, bɛ ku tooi to jɛrilim yih’ o ni.
23Di simdi ni a baŋ a biŋkɔbbaligu daalaafee ni nyɛ shɛm, ka lihi a niɣi viɛnyɛliŋga; 24dama buni bi beni sahakam, ka nam zuɣupiligu mi kul ku beni ʒiɛmani kam ni. 25Mɔri yi ti naai, ka mɔ’ pala bili, di saha ka bɛ chɛri zoya ni mɔri sɔŋda. 26Piɛri ni ti a situra, ka a buhi mi yo a palo samli. 27A buhi bihim ni saɣ’ a min’ a yiŋnim’ bindirigu, ka dih’ a daba bɛn nyɛ paɣiba.
Red Letter Dagbani Bible © Bible Society of Ghana, 2011