Ŋaha 21
21
1Naa suhu nyɛla kɔzɔrim m-be Yawɛ nuu ni, ka o ŋmaligiri li kpari o ni bɔri luɣ’ shɛlikam polo.
2Tuuni kam nyɛla din tuhi ŋun tum li sani, amaa Yawɛ n-nyɛ ŋun zahindi suhu.
3Wuntia tuma mini din tuhi tumbu nyɛla Yawɛ ni deeri shɛli gari sara maligu.
4Duhimaŋtali lihigu mini karimbaani suhu nyɛla ninvuɣ’ biɛri firila, ka nyɛ alahichi.
5Tuunkpɛmalana ni lo nia shɛŋa nyɛla din tahiri nyamma pam na, amaa ŋunkam bɔri yomyom ni nyari shɛlikam poor’ o mi.
6Nir’ yi doli ʒiri soli bo n-nya buni, di nyɛla kaman gulisigu mini kum zana.
7Ninvuɣ’ biɛri duŋtaabo ni ʒi ba chaŋ, bɛ ni zaɣisi ni bɛ ku tum din tuhi zuɣu.
8Bɛn mali taali soli nyɛla so’ golima, amaa bɛn ka taali biɛhigu nyɛla din tuhi.
9Nir’ yi be mɔpilli zuɣu yaɣ’ shɛli, di so ni o min’ o paɣa so ŋun bɔri zabili pam laɣim be yili ni.
10Ninvuɣ’ biɛri suhuri kul bɔrila zaɣ’ biɛɣu tumbu, bɛ bi zɔri bɛ ʒiʒiinitab’ nambɔɣu.
11Bɛ yi darigi ansarisimaana tibili, bɛn bi mi leerila yɛnnima, bɛ yi wuhi yɛnnim’ shɛli, bɛ baŋsim pahirimi.
12Ŋun be tibi n-lihiri nyari din be ninvuɣ’ biɛri yinsi; ŋuna n-chɛ ka ninvuɣ’ biɛri lura m-bahiri yoli.
13Nandaamba yi kuhira ka a baɣa kani, a gba ni ti kuhira ka so ku wum.
14Ashili pini nyɛla din maari suhuyiɣisili, ka ashilɔni birapu tibu gba nyɛ din maari suhuyiɣisili pam.
15Nir’ yi tum din tuhi, di niŋdila wuntizɔriba suhupiɛlli, amaa ka lee tiri tuumbiɛtumdiba suhugarigu.
16Ninvuɣ’ so ŋun birigi ka chɛ yɛm soli ni chaŋ ti pahi kpiimba zuɣu.
17Ŋunkam yuri din nyaɣisa ni leei faralana, ka ŋunkam yuri wain mini kpam ku leei bundana.
18Ninvuɣ’ biɛri nyɛla bɛ ni zaŋ shɛba yo wuntizɔriba talima samli, ka zaŋ bɛn ka yɛda yo bɛn biɛhigu tuhi samli.
19Nir’ yi be tiŋgban’ nɛl’ ni, di so ni o mali paɣ’ so ŋun mali suhuyiɣisili ka bɔri zabili.
20Bin’ viɛla kul palila yɛndan’ yiŋa, amaa jɛrigu ŋun’ dirila di zaa.
21Ŋunkam bɔri wuntitali mini nirilim niŋbu ni nya nyɛvili mini jilima.
22Yɛndaan’ yino chaŋ ti liri tɔbutuhiriba tiŋa n-wurim bɛ kpiɔŋ ni be luɣ’ shɛli ka bɛ niŋ li naani la.
23A yi gbib’ a noli min’ a zilinli, a ni yi yɛla ni.
24Karimbaandan’ ŋun nyɛ nyarimaŋlana yuli m-booni “Ansarisimaana.” O kul tumdila karimbaani duhimaŋtali tuma.
25Vinnyaɣilan’ kɔre ni be shɛli ni pam nyɛla din kur’ o. Dama vinnyaɣilana nuhi je tuma.
26Ninvuɣ’ biɛɣu kul jiɣindimi biɛɣu kam ni o nya pam pahi, ka wuntizɔra mi kul tiri pini ka bi vil’ o ni su shɛli gbini.
27Ninvuɣ’ biɛri sara maligu nyɛla din chihira, di ti ku be ka bɛ zaŋ li na ni nia biɛɣu.
28Ʒiri shɛhiralana ni kpi, amaa ŋun gbilisi tibili wum viɛnyɛliŋga ni di shɛhira viɛlli.
29Ninvuɣ’ biɛri kul mihirila bɛ nina ni, amaa wuntizɔriba bɛn’ kul tɛhirila bɛ soya yɛla.
30Yɛm shɛli kani, tɛhi’ zilima shɛli kani, saawara shɛli mi kani din ni tooi nyaŋ Yawɛ.
31Bɛ ni tooi pa wɔhu gali n-gu tɔbu tuhibu dali, amaa nasara dibu bela Yawɛ sani.
Red Letter Dagbani Bible © Bible Society of Ghana, 2011