Ŋaha 14
14
1Yɛm mɛrila o yili, amaa jɛrilim ŋun’ wurindila o yili.
2Ninvuɣ’ shɛb’ bɛn doli soli din tuhi nyɛla bɛn zɔri Yawɛ, amaa ninvuɣ’ shɛb’ bɛn mali biɛriyoli ʒiɛmd’ o mi.
3Jɛra yɛtɔɣa nyɛla fiɛbiga n-fiɛbiri bɛ yaansi zuɣu, amaa yɛnnim’ yɛtɔɣa n-gbibi ba.
4Naɣikɔra yi ka luɣ’ shɛli, bindirigu gba kani, naɣikɔra yaa puuni ka bindirigu pam yirina.
5Shɛhiralan’ ŋun ʒe yim bi ŋmari ʒiri, amaa ʒiri shɛhiralan’ ŋun’ kul tuhirila ʒiri bahira.
6Ansarisimaana bɔrila yɛm kɔŋda, amaa baŋsim yɛla bi to ŋun mali tɛhi’ zilima sani.
7Zom’ jɛrigu sani, dama a ku nya baŋsim yɛtɔɣa nimaani.
8Yɛnnim’ yɛm n-chɛ ka bɛ mi bɛ ni chani luɣ’ shɛli, amaa jɛra bɛn’ jɛrilim kpɛhiri ba la yɔɣu.
9Jɛra maanila alahichi sanyoo sara maligu ansarisi, amaa Naawuni niŋdi wuntizɔriba nirilim.
10Suhu m-mi biɛrim shɛli din be di ni, ka di mini zino ku tooi laɣim mali di suhupiɛlli.
11Ninvuɣ’ biɛɣu yili ni wurim, amaa ninvuɣ’ suŋ ŋun’ suɣili kul ni ʒiɛya.
12 #
Ŋaha 16.25
So’ shɛli beni ŋ-ŋmani din tuhi nir’ sani, amaa ka di bahigu ti nyɛla kum.
13Hal lari puuni suhugarigu beni, ka suhupiɛlli bahigu mi nyɛ suhusaɣiŋgu.
14Ninvuɣ’ shɛb’ bɛn bi ʒe yim ni nya bɛ laara kaman bɛ tuma ni simdi shɛm, ka ninvuɣ’ suma nya bɛ laara kaman bɛ tuma ni simdi shɛm.
15Bɛn tɛha bi zilima bɛn’ kul niŋdila binshɛɣukam yɛda, amaa yɛnnim’ bɛn’ kpahindila yɛla ni chani shɛm.
16Yɛnnim’ gbaarila bɛmaŋa n-yiri zaɣ’ biɛɣu ni, amaa jɛra bɛn’ baɣa kani, ka bi gbaari bɛmaŋa.
17Suhuyiɣisililana tumdila jɛrilim, ka yɛndan’ mi nyɛ ŋun be baalim.
18Bɛ zaŋdila jɛrilim n-dihi bɛn tɛha bi zilima nachiinsi, amaa baŋsim n-nyɛ yɛnnim’ zuɣupila.
19Tuumbiɛtumdiba ni ti gbani ninvuɣ’ suma tooni, ka ninvuɣ’ biɛri ti baɣi wuntizɔriba dunɔdaya.
20Hal nandaamba ʒiʒiinitab’ je ba, amaa bundaannim’ bɛn’ mali zɔnim’ pam.
21Bɛn lihi ʒiɛm bɛ ʒiʒiinitaba nyɛla alahichinima, amaa ninvuɣ’ so ŋun niŋ nandana nirilim mali alibarika.
22Ninvuɣ’ shɛb’ bɛn lɔri nia biɛɣu birigiya, amaa ninvuɣ’ shɛb’ bɛn nia viɛla nyari jilima mini ʒiɛyimtali niriba sani.
23Tuuni kam tumbu mali nyɔri, amaa yɛtɔɣa tɔɣisibu kɔŋko nyɛla din tahiri fara na.
24Yɛnnim’ yɛm n-nyɛ bɛ zuɣupila, amaa jɛrilim n-nyɛ jɛra dolibi.
25Yɛlimaŋli shɛhiralana nyɛla ŋun tiligiri nyɛviya, amaa ŋun ŋmari ʒiri ŋun’ nyɛla nyaanyira.
26Yawɛ zɔbu puuni ka nir’ niŋdi naani din mali kpiɔŋ, ka o bihi nyari sɔɣisili shee.
27Yawɛ zɔbu nyɛla nyɛvili kɔbilinini din ni chɛ ka nir’ yi kum zana ni.
28Niriba pam n-nyɛ naa jilima, amaa niriba yi kani, naa pala shɛli.
29Ninvuɣ’ so ŋun suhu bi yiɣisiri yomyom nyɛla tɛhi’ zilimalana, amaa ninvuɣ’ so ŋun suhu yiɣisiri yomyom kpaŋsirila jɛrilim.
30Suhudoo tirila ninsal’ niŋgbuŋ nyɛvili, amaa kɔr’ yoya chɔɣisirila nir’ kɔba ni.
31Ninvuɣ’ shɛb’ bɛn niŋdi nandaamba alaka nyɛla bɛn turi ŋun nam ba, amaa ninvuɣ’ shɛb’ bɛn niŋdi nandaamba nirilim tir’ o la jilima.
32Ninvuɣ’ biɛri tuumbiɛri n-luhiri ba, amaa wuntizɔriba nyari kpɛhili shee bɛ biɛrisuntali zuɣu.
33Yɛm mali biɛhigu shee ninvuɣ’ shɛb’ bɛn mali tɛhi’ zilima tɛha ni, amaa di ka jɛra bɛn’ suhuri ni.
34Wuntitali nyɛla din tibigiri zuliya, amaa alahichi nyɛla din dihiri niriba vi.
35Kpambal’ so ŋun mali yɛm, ŋuna ka naa yura, amaa kpambal’ so ŋun tumdi vi tuma, o suhu yiɣisirimi bahir’ o zuɣu.
Red Letter Dagbani Bible © Bible Society of Ghana, 2011