Ŋaha 11
11
1Yɔhiŋ sania zaŋ zahim binyɛra nyɛla din chihiri Yawɛ sani, amaa binyɛra zahimbu sania zuɣu din tuhi nyɛla din paligir’ o suhu.
2Karimbaani niŋbu nyaaŋa nyɛla vi dibu, amaa bɛn siɣisiri bɛmaŋa nyɛla bɛn mali yɛm.
3Ninvuɣ’ suma nimmaŋtali n-wuhiri ba soli, amaa bilikɔɣinim’ bilikɔnsi bahiri ba la yoli.
4Buni ku tooi tiligi nir’ Naawuni suhuyiɣisili dali, amaa wuntitali tiligiri nir’ kum ni.
5Wuntizɔriba bɛn ka galimi chɛmi ka bɛ soya tuhi, amaa ninvuɣ’ biɛri maŋmaŋ’ ninvuɣ’ biɛtali n-nyɛ din luhiri ba.
6Wuntizɔriba wuntitali n-tiligiri ba, amaa bilikɔɣinim’ nia biɛri nyɛla din gbahiri ba.
7Ninvuɣ’ biɛri yi kpi, bɛ tahima naaya; ka bɛn baɣa ka Naawuni ni ku nya bɛ ni bɔri shɛli.
8Wuntizɔriba yiri muɣisigu ni, ka ninvuɣ’ biɛri bɛn’ lee kpɛri di ni.
9Bɛn baɣa ka Naawuni ni zaŋdi bɛ noya saɣindi bɛ ʒiʒiinitaba, amaa baŋsim chɛ ka wuntizɔriba nyari faako.
10Wuntizɔra yi di nasara, tiŋ’ zaa malila suhupiɛlli, ka ninvuɣ’ biɛɣu yi kpi, niriba warila waa.
11Wuntizɔriba alibarika duhirila tiŋa, amaa ninvuɣ’ biɛri noli ni yɛtɔɣa wurindila tiŋa.
12Ŋunkam maani o kpee ansarisi nyɛla ŋun ka yɛm, amaa yɛndana ŋun kul shinila o noli.
13Tikuba kul chani moonila ashili yɛtɔɣa, amaa niriba ni dihi so tabili ŋun gbibila ashili.
14Tiŋgbɔŋ yi be ka soli wuhibu ka di ni, di lurimi, amaa saawarimaaniba ni galisi luɣ’ shɛli, nimaani ka niriba be ni alaafee.
15Nir’ yi zani sana nyaaŋa ka o di samli, di tahirila yɛla na, amaa o yi zaɣisi lala niŋbu, o ni yi yɛla ni.
16Paɣ’ so ŋun niŋdi nirilim nyari jilima, amaa do’ so ŋun vari gindi ni leei bundana.
17Ninvuɣ’ shɛb’ bɛn niŋdi nirilim mali laara, amaa ninvuɣ’ shɛb’ bɛn mali putɔɣu tumdila bɛmaŋ’ barina.
18Ninvuɣ’ biɛri bi nyari nyɔri zaɣ’ maŋli, amaa ninvuɣ’ shɛb’ bɛn biri wuntitali nyari laara maŋli.
19Ŋunkam doli wuntitali soli ni be, amaa ŋunkam tumdi tuumbiɛri ni kpi.
20Ninvuɣ’ shɛb’ bɛn suhuri bi viɛla, lala biɛhigu nyɛla din chihiri Yawɛ sani, amaa o suhu piɛli ninvuɣ’ shɛb’ bɛn ka galimi zuɣu.
21Baŋmiya ni ninvuɣ’ biɛri ku yi tibidarigibo ni, amaa wuntizɔriba bɛn’ ni yi.
22Kaman salima baŋa ni be kuruchu nyee ni shɛm, lala n-nyɛ paɣ’ viɛlli ŋun ka yɛm.
23Wuntizɔriba ni bɔri shɛli bahigu nyɛla din viɛla kɔŋko, amaa ninvuɣ’ biɛri bɛn’ ni bɔri shɛli bahigu nyɛla suhuyiɣisili.
24Ninvuɣ’ shɛb’ tiri pini, amaa ka bɛ buni kul nabirimi pahira, ka shɛb’ mi vili bɛ ni su shɛli gbibi ka kɔŋda.
25Ninvuɣ’ so ŋun tiri pini nyarimi pahira, ka ŋun tiri kom gba nyari kom.
26Niriba turi ninvuɣ’ shɛb’ bɛn zaŋdi bindira sɔɣira, amaa ninvuɣ’ shɛb’ bɛn kɔhir’ li mali alibarika.
27Ŋunkam bɔri din viɛla ni nimmoo ni nya jilima, amaa zaɣ’ biɛɣu chanila ŋun bɔri li sani.
28Bɛnkam niŋ bɛ buni naani ni lu, amaa wuntizɔriba ni zoori kaman vamaha la.
29Ninvuɣ’ shɛb’ bɛn muɣisiri bɛ yinsinim’ ti ku lan mali binshɛli yaha, ka jɛra ni ti tumdi tuma tiri yɛnnima.
30Wuntizɔriba nyɔri nyɛla nyɛvili tia, amaa duŋtaabo dirila nyɛvili.
31 #
1 Pita 4.18
Wuntizɔriba yi deeri din simdi ba dunia ŋɔ ni, wula ka ninvuɣ’ biɛri mini alahichinim’ bɛn’ ku deeri din simdi ba?
Red Letter Dagbani Bible © Bible Society of Ghana, 2011