Kalinlinima 33
33
Izraɛlnim’ ni daa yi Ijipti chaŋ ti paai Mɔab tiŋgbɔŋ ni shɛm
1Musa mini Aduna ni daa gari tooni zaŋ Izraɛlnima ka bɛ yi Ijipti tiŋgbɔŋ ni chani kaman tɔbbihi la shɛm m-bɔŋɔ. 2Musa daa sabi bɛ ni daa piligiri chandi luɣ’ shɛŋa maa yiniyini yuya sɔŋ kaman Yawɛ ni daa zal’ o shɛm. Bɛ ni daa piligiri chandi luɣ’ shɛŋa maa yiniyini ni daa nyɛ shɛm m-bɔŋɔ: 3Gol’ so ŋun daŋ tooni biɛɣ’ pinaanu dali din daa nyɛ Yaɣigari chuɣu puhi kaai biɛɣu dal’ la, ka Izraɛlnim’ daa yi Ramɛsis n-chani nasara dibu chandi Ijiptinim’ zaa ninni. 4Di saha Ijiptinim’ daa sɔɣirila bɛ bikpamba shɛb’ zaa Yawɛ ni daa ku la. Yawɛ daa bi chɛ bɛ buɣa gba.
5Ka Izraɛlnim’ daa ti yi Ramɛsis maa n-chaŋ ti dɔni Sukɔt. 6Ka bɛ daa ti yi Sukɔt maa n-chaŋ ti dɔni Itam din miri tiŋgban’ nɛl’ la. 7Ka bɛ daa ti yi Itam maa ŋ-ŋmaligi labi Pihahirɔt din be Baalizɛfɔn wulimpuhili polo la nti dɔni miri Migidol. 8Ka bɛ daa ti yi Pihahirɔt n-chaŋ ti tim teeku sunsuuni gari kpe tiŋgban’ nɛl’ la ni n-daa chaŋ daba ata chandi Itam tiŋgban’ nɛli ni n-chaŋ ti dɔni Mara.
9Ka bɛ daa ti yi Mara n-chaŋ Ɛlim. Kɔbilisi pinaayi mini abie tihi pisopɔin n-daa be Ɛlim maa, ka bɛ daa dɔni nimaani.
10Ka bɛ daa ti yi Ɛlim maa n-chaŋ ti dɔni miri Teeku Ʒiɛɣu. 11Bɛ ni daa ti yi Teeku Ʒiɛɣu maa shee, bɛ daa chaŋ ti dɔnila Sin tiŋgban’ nɛl’ ni. 12Ka bɛ daa ti yi Sin tiŋgban’ nɛli maa ni n-chaŋ ti dɔni Dofika. 13Ka bɛ daa ti yi Dofika maa n-chaŋ ti dɔni Alushi. 14Ka bɛ daa ti yi Alushi maa n-chaŋ ti dɔni Rɛfidim, ka kom daa ka nimaani ka niriba maa ni nyu.
15Bɛ ni daa ti yi Rɛfidim maa, bɛ daa chaŋ ti dɔnila Sinai tiŋgban’ nɛl’ ni. 16Ka bɛ daa ti yi Sinai tiŋgban’ nɛl’ maa ni n-chaŋ ti dɔni Kiburɔtihataava. 17Bɛ ni daa ti yi Kiburɔtihataava maa, bɛ daa chaŋ ti dɔnila Hazɛrɔt. 18Ka bɛ daa ti yi Hazɛrɔt maa chaŋ ti dɔni Ritima. 19Bɛ ni daa ti yi Ritima maa, bɛ daa chaŋ ti dɔnila Rimɔnpɛrɛz. 20Ka bɛ daa ti yi Rimɔnpɛrɛz maa n-chaŋ ti dɔni Libina. 21Bɛ ni daa ti yi Libina maa, bɛ daa chaŋ ti dɔnila Risa. 22Bɛ ni daa ti yi Risa maa, bɛ daa chaŋ ti dɔnila Kɛhɛlata. 23Bɛ ni daa ti yi Kɛhɛlata maa, bɛ daa chaŋ ti dɔnila Shɛfa Zoli gbini. 24Bɛ ni daa ti yi Shɛfa Zoli maa gbini, bɛ daa chaŋ ti dɔnila Harada. 25Bɛ ni daa ti yi Harada maa, bɛ daa chaŋ ti dɔnila Makihilɔt. 26Bɛ ni daa ti yi Makihilɔt maa bɛ daa chaŋ ti dɔnila Tahat. 27Bɛ ni daa ti yi Tahat maa, bɛ daa chaŋ ti dɔnila Tɛra. 28Bɛ ni daa ti yi Tɛra maa, bɛ daa chaŋ ti dɔnila Mitika. 29Bɛ ni daa ti yi Mitika maa, bɛ daa chaŋ ti dɔnila Hashimɔna. 30Bɛ ni daa ti yi Hashimɔna maa, bɛ daa chaŋ ti dɔnila Mɔsɛrɔt. 31Bɛ ni daa ti yi Mɔsɛrɔt maa, bɛ daa chaŋ ti dɔnila Bɛnijaakan. 32Bɛ ni daa ti yi Bɛnijaakan maa, bɛ daa chaŋ ti dɔnila Hɔrihagidigad. 33Bɛ ni daa ti yi Hɔrihagidigad maa, bɛ daa chaŋ ti dɔnila Jɔtibata. 34Bɛ ni daa ti yi Jotibata maa, bɛ daa chaŋ ti dɔnila Abirɔna. 35Bɛ ni daa ti yi Abirɔna maa, bɛ daa chaŋ ti dɔnila Ɛziɔngɛba. 36Bɛ ni daa ti yi Ɛziɔngɛba maa, bɛ daa chaŋ ti dɔnila Zin mɔɣu ni (Kadɛshi m-bala). 37Bɛ ni daa ti yi Kadɛshi maa, bɛ daa chaŋ ti dɔnila Hɔr Zoli gbini din miri Ɛdom tiŋgbɔŋ tintariga la shee.
38 #
Kal 20.22-28; Zal 10.6; 32.50 Ka maligumaana Aduna daa du Hɔr Zoli maa zuɣu nti kpi nimaani kaman Yawɛ ni daa zal’ o shɛm. Izraɛlnim’ ni daa yi Ijipti na nyaaŋa zaŋ chaŋ yuun’ pihinahi puuni gol’ so ŋun pahir’ anu dahin yini dali n-daa bala. 39Aduna yuma daa nyɛla yuun’ kɔbiga ni pisinaata saha shɛl’ o ni daa kpi Hɔr Zoli zuɣu maa.
40 #
Kal 21.1
Ka Keenannim’ Naa Arad ŋun daa be Nɛgɛb din be Keenan tiŋgbɔŋ ni la daa wum Izraɛlnim’ kandina damli.
41Ka bɛ daa ti yi Hɔr Zoli maa zuɣu n-chaŋ ti dɔni Zalimɔna. 42Bɛ ni daa ti yi Zalimɔna maa, bɛ daa chaŋ ti dɔnila Punɔn. 43Ka bɛ daa ti yi Punɔn maa n-chaŋ ti dɔni Obɔt. 44Bɛ ni daa ti yi Obɔt maa, bɛ daa chaŋ ti dɔnila Abarim din daa be Mɔab tintariga la. 45Ka bɛ daa ti yi Iyim n-chaŋ ti dɔni Dibɔngaad. 46Bɛ ni daa ti yi Dibɔngaad maa, bɛ daa chaŋ ti dɔnila Alimɔndibilataim. 47Ka bɛ daa ti yi Alimɔndibilataim maa n-chaŋ ti dɔni Abarim zoya ni miri Nɛbo. 48Bɛ ni daa ti yi Abarim zoya maa ni, bɛ daa chaŋ ti dɔnila Mɔab bɔpiɛligu ni miri Jɔɔdɛn Mɔɣili Jɛriko polo la. 49Bɛ daa dɔni mirila Jɔɔdɛn Mɔɣili, Bɛtijɛshimɔt zaŋ hal ni Ɛbɛlishitim din be Mɔab bɔpiɛligu ni la.
Naawuni ni daa yɛli Izraɛlnim’ shɛm pɔi ka bɛ naanyi du Jɔɔdɛn Mɔɣili
50Ka Yawɛ daa yɛli Musa Mɔab bɔpiɛligu din daa miri Jɔɔdɛn Mɔɣili Jɛriko maa: 51Yɛlim’ Izraɛlnima, “Yi yi gbaai Jɔɔdɛn Mɔɣili ŋɔ du m-paai Keenan tiŋgbɔŋ maa ni, 52yin’ karimiya ninvuɣ’ shɛb’ bɛn be tiŋgbɔŋ maa ni zaa, ka saɣim bɛ ni zaŋ kuɣa mini kuriti mali wun’ shɛŋa zaa, ka wurim bɛ ni jɛmdi buɣa luɣ’ shɛŋa zaa. 53Deemiya tiŋgbɔŋ maa n-ʒin’ di ni, dama mani n-zaŋ li tin ya ni yi su li. 54#Kal 26.54-56 Pihimiya kuɣa sɔŋ lihi nya, ka piri tiŋgbɔŋ maa ti taba kaman yi daŋ kam ni nyɛ shɛm. Timiya daŋ shɛli din niriba zooi tiŋgbani din galisi, ka ti daŋ shɛli bɛn bi zooi mi tiŋgbani din bi galisi. So kuɣili yi gbaai tiŋgban’ shɛli, o tarili n-yɛn bala. Pirimiya li ti taba kaman yi yaannim’ daŋ kam ni nyɛ shɛm. 55Amaa yi yi bi kari ninvuɣ’ shɛb’ bɛn be tiŋgbɔŋ maa ni zaa, bɛ ni shɛb’ bɛn yɛn kpalim beni ni bemi kaman dachɔhira la yi nina ni, ka be kaman gɔhi n-kuhiri yi luɣa ni, ka ni muɣisi ya pam yi ni yɛn be tiŋgbɔn shɛli ni maa. 56Ka n ni niŋ ya kaman n ni lo ni n niŋ ba shɛm.”
Red Letter Dagbani Bible © Bible Society of Ghana, 2011