Kalinlinima 29
29
Yuun’ palli chuɣu puhibu dali sara
(Lɛvinima 23.23-25)
1Gol’ so ŋun pah’ ayopɔin dabisi’ shɛli din daŋ tooni dali, yin’ laɣimmiya jɛm Naawuni, ka di tumiya tuun’ shɛli. Dindali maa, piɛbimiya kikahi, 2ka malimiya sara shɛli yi ni zaŋdi nyɔri buɣim ka di nyom viɛl’ Yawɛ san’ la. Dina n-nyɛ: naɣilabil’ yino mini piɛla’ yino ni yuun’ yini piɛlabih’ ayopɔin bɛn ka dansi. 3Bɛ chi sara yɛn nyɛla bɛ ni zaŋ kpam ŋmiri zim viɛl’ shɛli, ka yi zaŋ di kilɔgiram ata pahi naɣilabil’ yino maa zuɣu, ka zaŋ di kilɔgiram ayi m-pahi piɛla’ yino maa zuɣu; 4ka zaŋ kilɔgiram yiniyini pahi piɛbih’ ayopɔin maa zaɣ’ yini kam zuɣu; 5ka zaŋ bula’ yino mal’ alahichi sanyoo sara, ka di kpihim yi daalahichi. 6Dimbɔŋɔnim’ nyɛla din pahi yi ni zaŋdi sara shɛli nyɔri buɣim gol’ palli ni la mini di chi sara zuɣu ni yi ni lan zaŋdi sara shɛli nyɔri buɣim sahakam la mini di chi sara ni di binnyura sara zuɣu kaman di zaligu ni nyɛ shɛm. Di nyɛla sara shɛli yi ni zaŋdi nyɔri buɣim ka di nyom viɛl’ Yawɛ sani.
Alahichi Sara maligu dali sara
(Lɛvinima 23.26-32)
7Gol’ so ŋun pah’ ayopɔin maa biɛɣu pia dali, yin’ lomiya noli ka laɣim jɛm Naawuni, ka di tumiya tuun’ shɛli. 8Malimiya sara shɛli yi ni zaŋdi nyɔri buɣim tiri Yawɛ, ka di nyom viɛla. Dina n-nyɛ: naɣilabil’ yino mini piɛla’ yino ni yuun’ yini piɛlabih’ ayopɔin bɛn ka dansi. 9Bɛ chi sara yɛn nyɛla bɛ ni zaŋ kpam ŋmiri zim viɛl’ shɛli, ka yi zaŋ di kilɔgiram ata pahi naɣilaa maa zuɣu; ka zaŋ di kilɔgiram ayi pahi piɛla’ yino maa zuɣu; 10ka zaŋ di kilɔgiram yiniyini pahi piɛlabih’ ayopɔin la zaɣ’ yino kam zuɣu. 11#Lɛv 16.29-34 Zaŋmiya bula’ yino mal’ alahichi sanyoo sara pahi sara shɛli din kpihindi alahichi la mini yi ni zaŋdi sara shɛli nyɔri buɣim sahakam la ni di chi sara ni di binnyura sara la zuɣu.
Suɣa tibu chuɣu puhibu sara
(Lɛvinima 23.33-44)
12Gol’ so ŋun pah’ ayopɔin maa biɛɣ’ pinaanu dali, yin’ laɣimmiya jɛm Naawuni, ka di tumiya tuun’ shɛli, ka zaŋya daba ayopɔin puhi Yawɛ chuɣu. 13Malimiya yi ni zaŋdi sara shɛli nyɔri buɣim ka di nyom viɛl’ Yawɛ san’ la. Dina n-nyɛ: naɣilabihi pinaata mini piɛlah’ ayi ni yuun’ yini piɛlabihi pinaanahi bɛn ka dansi. 14Bɛ chi sara yɛn nyɛla bɛ ni zaŋ kpam ŋmiri zim viɛl’ shɛli, ka yi zaŋ di kilɔgiram ata pahi naɣilahi pinaata maa zaɣ’ yino kam zuɣu, ka zaŋ di kilɔgiram ayi pahi piɛlah’ ayi maa zaɣ’ yino kam zuɣu; 15ka zaŋ di kilɔgiram yini pahi piɛlabihi pinaanahi maa zaɣ’ yino kam zuɣu. 16Zaŋmiya bula’ yino mali alahichi sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
17Dabisili din pah’ ayi dali zaŋmiya naɣilabihi pinaayi mini piɛlah’ ayi ni yuun’ yini piɛlabihi pinaanahi bɛn ka dansi mali sara; 18ka zaŋ chi sara mini wain sara pahi naɣilabihi maa mini piɛlahi ni piɛbihi pola maa zuɣu kaman bɛ kalinli ni nyɛ shɛm 19ni alahichi sanyoo sara bula’ yino m-pahi yi ni zaŋdi sara shɛli nyɔri buɣim sahakam la ni di chi sara ni di binnyura sara la zuɣu.
20Dabisili din pah’ ata dali, zaŋmiya naɣilahi piniyini mini piɛlah’ ayi ni yuun’ yini piɛlabihi pinaanahi bɛn ka dansi mali sara; 21ka zaŋ chi sara mini binnyura sara pahi naɣilahi maa mini piɛlahi maa ni piɛlabihi maa zuɣu kaman bɛ kalinli ni nyɛ shɛm. 22Ka yi lan zaŋ bula’ yino mal’ alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
23Dabisili din pah’ anahi dali, zaŋmiya naɣilahi pia mini piɛlah’ ayi ni yuun’ yini piɛlabihi pinaanahi bɛn ka dansi mali sara; 24ka zaŋ chi sara mini binnyura sara pahi naɣilahi maa mini piɛlahi maa ni piɛbihi maa zuɣu kaman bɛ kalinli ni nyɛ shɛm. 25Ka yi lan zaŋ bula’ yino mal’ alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
26Dabisili din pah’ anu dali, zaŋmiya naɣilah’ awɛi mini piɛlah’ ayi ni yuun’ yini piɛlabihi pinaanahi bɛn ka dansi mali sara; 27ka zaŋ chi sara mini binnyura sara pahi naɣilahi maa mini piɛlahi maa ni piɛbihi maa zuɣu kaman bɛ kalinli ni nyɛ shɛm. 28Ka yi lan zaŋ bula’ yino mal’ alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
29Dabisili din pah’ ayɔbu dali, zaŋmiya naɣilah’ anii mini piɛlah’ ayi ni yuun’ yini piɛlabihi pinaanahi bɛn ka dansi mali sara; 30ka zaŋ chi sara mini binnyura sara pahi naɣilahi maa mini piɛlahi maa ni piɛlabihi maa zuɣu kaman bɛ kalinli ni nyɛ shɛm. 31Ka yi lan zaŋ bula’ yino mali alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
32Dabisili din pah’ ayopɔin dali, zaŋmiya naɣilah’ ayopɔin mini piɛlah’ ayi ni yuun’ yini piɛlabihi pinaanahi bɛn ka dansi mali sara; 33ka zaŋ chi sara mini binnyura sara pahi naɣilahi maa mini piɛlahi maa ni piɛlabihi maa zuɣu kaman bɛ kalinli ni nyɛ shɛm. 34Ka yi lan zaŋ bula’ yino mali alahichi sanyoo sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
35Dabisili din pah’ anii dali, yin’ laɣimmiya jɛm Naawuni ka di tumiya tuun’ shɛli. 36Malimiya yi ni zaŋdi sara shɛli nyɔri buɣim ka di nyom viɛl’ Yawɛ san’ la. Dina n-nyɛ: naɣila’ yino mini piɛla’ yino ni yuun’ yini piɛlabih’ ayopɔin bɛn ka dansi; 37ka zaŋ chi sara mini binnyura sara pahi naɣilaa maa mini piɛlaa maa ni piɛbihi la zuɣu kaman bɛ kalinli ni nyɛ shɛm. 38#Lɛv 23.34; Zal 16.13-15 Ka yi lan zaŋ bula yino mali alahichi sara pahi yi ni zaŋdi sara shɛli nyɔri buɣim sahakam la mini di chi sara ni di binnyura sara la zuɣu.
39Zaŋmiya dimbɔŋɔnim’ maani sara tiri Yawɛ yi churi puhibu ni m-pahi yi pɔri pɔbu sara mini yi suhuyubu sara kaman yi ni zaŋdi sara shɛli nyɔri buɣim la ni yi chi sara ni yi binnyura sara ni yi biɛrisuŋ sara la zuɣu.
40Ka Musa daa yɛli Izraɛlnim’ Yawɛ ni zal’ o ni o yɛli ba shɛlikam maa zaa.
Red Letter Dagbani Bible © Bible Society of Ghana, 2011