Kalinlinima 24
24
1Balaam ni daa nya ka Yawɛ lo ni o niŋla alibarika niŋ Izraɛlnim’ ni maa zuɣu, o daa bi lan lihi o ni daa yi lihiri binshɛŋa ni baŋdi din yɛn niŋ kaman o ni daa yi pun niŋdi shɛm la, amaa ka zaŋ o zuɣu ʒila mɔɣu polo. 2Ka Balaam daa kpuɣ’ o zuɣu lihi nya Izraɛlnim’ daŋ kam niriba ni ti bɛ suɣa doya gbilligbilli. Di saha ka Naawuni Shia daa siɣ’ o zuɣu na, 3ka o tɔɣis’ o daanabitali yɛtɔɣa yɛli,
“Bɛɔr bia Balaam anabitali
yɛtɔɣa m-bɔŋɔ,
Ninvuɣ’ so ŋun nyari viɛnyɛliŋga
anabitali yɛtɔɣa m-bɔŋɔ.
4Ninvuɣ’ so ŋun wumdi
Naawuni yɛligu, o daanabitali
yɛtɔɣa m-bɔŋɔ.
Ŋun nyari Kpiɔŋlan’ Naa ʒii,
o luya, amaa ka o nina bi pɔbi.
5Yaakubu zuliya, yi suɣa viɛli pam.
Izraɛlnima, yi doo viɛli pam!
6Yi ŋmanila abie tihi
din vuɣisi waɣa.
Yi ŋmanila pu’ shɛŋa
din do m-baɣ’ mɔɣili.
Yi ŋmanila aloosi ti’ shɛŋa
Yawɛ ni sa.
Yi ŋmanila sida ti’ shɛŋa
din ʒe m-baɣi kom.
7Kom ni ti zɔri yir’ o ŋmana ni na,
ka o bimbira tiɣi kom pam.
O naa ni ti gari Agag.
O nam ni ti du pam.
8Naawuni ŋun yihi ya Ijipti na
ŋmanila yɔnaɣ’ yila yi sani.
Yi nyandi zuliya shɛb’
bɛn nyɛ yi dimnima.
Yi kabiri bɛ kɔba.
O ni to ba o piɛma.
9 #
Pil 12.3; 49.9 O kurimmi, ka dɔni
kaman gbuɣindaa la.
O ŋmanila gbuɣin’ nyaŋ.
Ka ŋuni n-lee ni tooi yiɣis’ o?
Ŋunkam niŋ alibarika niŋ
yi ni, o ni nya alibarika;
ka ŋunkam yɛli yɛtɔɣ’
biɛɣu bahi yi zuɣu,
yɛtɔɣ’ biɛɣu maa din’ dim’ o.”
10Di saha ka Balak suhu daa yiɣisi pam bahi Balaam zuɣu, ka o zaŋ o nuhi kpahi taba ka yɛli Balaam, “N zaŋ a mi na ni a ti yɛli yɛtɔɣ’ biɛri bahi n dimnim’ ŋɔ zuɣu, amaa ka a ti niŋla alibarika niŋ bɛ ni siɣimsiɣim buta ŋɔ zaa. 11Dinzuɣu kulim’ a ya pumpɔŋɔ. N daa yɛliya ni n ni ti a pin’ titali, amaa Yawɛ chɛ ka a kɔŋ pini maa.” 12Ka Balaam daa yɛli Balak, “N daa pun yɛl’ a ni daa tim a tuun’ shɛb’ n sanna la, 13‘Hal Balak yi zaŋ o yiŋ’ anzinfa mini salima zaa ti ma gba, n ku tooi niŋ Yawɛ ni zali ma ni n di niŋ shɛli; n ku tooi niŋ zaɣ’ viɛlli bee zaɣ’ biɛɣu mmaŋmaŋ’ yubu ni. Yawɛ ni yɛli shɛli, dina ka n gba yɛra.’ ”
Balaam anabitali yɛtɔɣa din bahindi nyaaŋa
14Dinzuɣu, pumpɔŋɔ n ni kuli n ya, amaa kamina ka n wuh’ a niriba ŋɔ ni ti yɛn niŋ a niriba shɛm dahin’ shɛli ha. 15Di saha ka o tɔɣis’ o daanabitali yɛtɔɣa yɛli,
“Bɛɔr bia Balaam daanabitali
yɛtɔɣa m-bɔŋɔ,
Ninvuɣ’ so ŋun nyari viɛnyɛliŋga
daanabitali yɛtɔɣa m-bɔŋɔ.
16O nyɛla ninvuɣ’ so
ŋun wumdi Naawuni yɛtɔɣa,
ka mali baŋsim shɛli din yiri
Zallakudura Naa sanna.
O nyɛla ŋun nyari
Kpiɔŋlan’ Naa ʒii.
O luya, amaa ka bi
pɔb’ o nina.
17N nya o, amaa pa pumpɔŋɔ.
N nya o, amaa ka o shee na waɣa.
Saŋmariga ni ti puhi yi
Yaakubu zuliya ni na.
Naa ni ti yi Izraɛl zuliya ni na;
O ni ti ku Mɔab zuɣulaannima,
ka ku Sɛt zuliya zaa.
18Bɛ ni ti deei Ɛdomnim’
tiŋgbɔŋ su.
Siɛrinim’ dimnim’ ni ti
deei bɛ tiŋgbɔŋ su.
19Yaakubu zuliya ninvuɣ’ so
ni ti di nam, ka ku
ninvuɣ’ shɛb’ bɛn kpalim be Iri!”
20Di saha ka Balaam daa lihi Amalɛknima, ka tɔɣis’ o daanabitali yɛtɔɣa yɛli,
“Amalɛknima n-daa be
zuliya kam tooni,
Amaa bɛ bahigu ni ti nyɛla
bahi yoli zaa.”
21Di nyaaŋa ka o daa lihi Kɛnnim’ gba, ka tɔɣis’ o daanabitali yɛli,
“Yi biɛhigu shee nyɛla
barina ni ka luɣ’ shɛli.
Yi biɛhigu shee maa ŋmanila
tiɛɣu din pa kuɣili zuɣu.
22Amaa Ashurinim’ ni ti gbahi
yinim’ Kɛnnim’ ti leei daba,
ka kun ya.”
23Ka o daa lan tɔɣis’ o daanabitali yɛtɔɣa yɛli,
“Mbaye, Naawuni yi ti
niŋ dimbɔŋɔ, ŋuni n-lee ni be?
24Saipurusinim’ ni ti kpe ŋarima
kana ti liri ya.
Bɛ ni ti nyaŋ
Ashurinim’ mini Ɛbanima.
Amaa bɛ gba ni ti bahi yoli zaa.”
25Dimbɔŋɔ nyaaŋa ka Balaam daa yiɣisi kul’ o ya, ka Balak gba ŋmaligi chaŋ o chandi.
Red Letter Dagbani Bible © Bible Society of Ghana, 2011