Kalinlinima 21
21
Izraɛlnim’ nyaŋ Keenannima
1 #
Kal 33.40
Keenan nir’ ŋun daa nyɛ Arad naa m-be Nɛgɛb ni daa wum ni Izraɛlnim’ dolila Atarim polo kanna, ka o daa chaŋ ti ŋme ba tɔbu, ka gbahi bɛ shɛba ti leei daba. 2Di saha ka Izraɛlnim’ daa po pɔri Yawɛ sani yɛli, “Yɛlimaŋli, a yi ni zaŋ niriba ŋɔ niŋ ti nuu ni, ti ni saɣim bɛ fɔntinsi zaa.” 3Ka Yawɛ daa wum Izraɛlnim’ ni yɛli shɛm maa, ka shiri zaŋ Keenannim’ maa niŋ bɛ nuu ni; ka bɛ daa ku ba ka saɣim bɛ fɔntinsi maa zaa. Dinzuɣu ka bɛ daa boli nimaani yuli Hɔrima#21.3 HƆRIMA: Hiburuli ni yuli ŋɔ gbinni nyɛla ‘Saɣimbu’.
Bɛ zaŋ daanya mali wahu
4 #
Zal 2.1
Ka bɛ daa yiɣisi Hɔr Zoli maa gbini n-zaŋ doli Teeku Ʒiɛɣu polo ni bɛ lɔɣi Ɛdom tiŋgbɔŋ maa gari. Ka niriba maa suhuri daa ti yiɣisi pam soli maa ni. 5Ka niriba maa daa yɛri Naawuni mini Musa finafina, “Bɔzuɣu ka yi yihi ti Ijipti na ni ti ti kpi mɔɣu ŋɔ ni? Dama bindirigu mini kom ka kpe, ka ti nyee nyɔni bindir’ chɔɣima ŋɔ.” 6#1 Kɔr 10.9 Ka Yawɛ daa chɛ ka wɔɣ’ shɛb’ bɛn mal’ lɔɣu pam yina ti dimdi Izraɛlnima ka bɛ pam daa kpi. 7Ka niriba maa daa ka Musa sanna ti yɛl’ o, “Ti tum alahichi, dama ti yɛl’ a mini Yawɛ finafina; suhim’ Yawɛ ti ti ka o vuui tinvura maa ka chɛ ti.” Ka Musa daa suhi Naawuni ti niriba maa. 8Ka Yawɛ daa yɛli Musa, “Malimi wahu ŋun mali lɔɣu n-zaŋ tabili da’ wɔɣinli; ka wahu yi dim sokam ka o lihi li, o ni tiligi.” 9#2 Nan 18.4; Jɔn 3.14 Ka Musa daa zaŋ daanya mali wahu maa n-zaŋ li tabili da’ wɔɣinli zuɣusaa; ka wahu daa yi dim so, ka o lihi li, o tiligirimi.
Bɛ yi Hɔr Zoli gbini chaŋ Mɔabnim’ vinvamli ni
10Ka Izraɛlnim’ daa yiɣisi chaŋ ti dɔni Obɔt. 11Ka bɛ daa ti yiɣisi Obɔt maa n-chaŋ ti dɔni Abarim yɔɣu din daa miri Mɔabnim’ tintariga zaŋ lab’ wulimpuhili polo la ni. 12Ka bɛ daa ti lan yiɣisi nimaani chaŋ ti dɔni Zɛrɛd vinvamli ni. 13Ka bɛ daa ti lan yiɣisi nimaani chaŋ ti dɔni Arinɔn Mɔɣili yaɣili yɔ’ shɛli din zaŋ hal ni Amɔrinim’ tintariga la ni; dama Arinɔn Mɔɣili n-nyɛ Mɔabnim’ tintariga m-be Mɔabnim’ mini Amɔrinim’ sunsuuni. 14Dinzuɣu ka di yɛli Yawɛ tɔbu tuhibu Litaafi ni, “Wahɛb fɔntiŋ’ din be Sufa bɔbili mini vinvama ni Arinɔn Mɔɣili 15ni naɣilima ni vinvama din zaŋ hal ni Ar zaŋ lab’ Mɔabnim’ tintariga polo la.”
16Ka bɛ daa lan yiɣisi nimaani chaŋ ti paai kɔbili’ shɛŋa bɛ ni booni Bɛr la. Nimaani ka Yawɛ daa yɛli Musa, “Laɣimmi niriba maa na ka n ti ti ba kom.” 17Di saha ka Izraɛlnim’ daa yili yilli ŋɔ:
“Yilimiya yila yɛli di yɛla;
Kɔbiliga, chɛ ka kom yi a ni na;
18Kɔbil’ shɛli nabihi ni daa gbi.
Kolibil’ shɛli niriba toondaannim’ ni daa gbi.
Nam jaaŋgbɛhi ka bɛ daa zaŋ gbi li.
Bɛ jaaŋgbɛhi ka bɛ daa zaŋ gbi li.”
Ka bɛ daa yiɣisi yɔɣu maa ni chaŋ Matana, 19ka daa ti yi Matana maa chaŋ Nahaliɛl n-daa ti lan yiɣisi Nahaliɛl maa chaŋ Bamɔt, 20ka daa ti lan yi Bamɔt mi chaŋ vinvamli shɛli din daa do Mɔab tintariga Pisiga zolɔŋni zaŋ lab’ tiŋgban’ nɛli polo la.
Bɛ nyaŋ Naa Sihɔn mini Naa Ogi
(Zaligu 2.26—3.11)
21Di saha ka Izraɛlnim’ daa tim tuumba Amɔrinim’ Naa Sihɔn sani nti yɛl’ o, 22“Chɛli ka ti kpe a tiŋgbɔŋ ŋɔ ni gari. Ti ku birigi kpe mɔɣu ni bee n-tim yi wain tihi puri ni; ti mi ku nyu yi kɔbilisi kom. Ti kul yɛn dolila solɔɣu hal ti gari yi tintariga.” 23Amaa ka Sihɔn daa zaɣisi ni Izraɛlnim’ di kpe o tiŋgbɔŋ maa ni gari. O daa laɣimla o tɔbbihi zaa n-chaŋ Jahaz din daa be yɔɣu maa ni la nti tuhi Izraɛlnima. 24Ka Izraɛlnim’ daa zaŋ takɔbi ku o, ka deeg’ o tiŋgbɔŋ maa Arinɔn zaŋ ti paai Jabok n-lan zaŋ hal ni Ammɔnnim’ tintariga, dama Ammɔnnim’ daa gula bɛ tintariga viɛnyɛliŋga. 25Ka Izraɛlnim’ daa fa Amɔrinim’ maa fɔntinsi zaa n-ʒini Hɛshibɔn zaŋ tabili di tiŋkpansi zaa. 26Dama Hɛshibɔn daa nyɛla Amɔrinim’ Naa Sihɔn tiŋa. Ŋuna n-daa tuhi Mɔab na’ kuro ka fa o tiŋgbɔŋ zaa zaŋ hal ni Arinɔn. 27Dinzuɣu ka baansi yiini yila yɛra,
“Kamiya Hɛshibɔn na, mɛmiya li.
Chɛliya ka Sihɔn tiŋ’ maa zani.
28Dama buɣim daa yi Hɛshibɔn na,
ka buɣim niɛm daa yi
Sihɔn fɔŋ ni na.
Di daa di Ar din be Mɔab la,
ka di Arinɔn zoya zuɣu.
29 #
Jɛr 48.45-46
Mɔabnima, mbusim be yi zuɣu!
Yinim’ Chɛmɔshinima, Chɛmɔshi
niriba ŋɔ ni bahi yoli zaa.
O chɛ ka o bidibisi leei
bɛn zo n-kpe yɔɣu,
ka o bipuɣinsi mi leei
Amɔrinim’ Naa Sihɔn daba.
30Dinzuɣu bɛ zuliya bahila yoli
zaŋ Hɛshibɔn hal ni Dibɔn,
ka ti ŋmani saɣiri doya
hal ka buɣim ti di m-paai Mɛdɛba.”
31Dina n-daa chɛ ka Izraɛlnim’ ʒini Amɔrinim’ tiŋgbɔŋ ni. 32Ka Musa daa tim ni bɛ ti puɣisi nya Jaza. Ka bɛ daa tuhi fa di tiŋkpansi, ka kari Amɔrinim’ bɛn daa be nimaani maa.
33Di nyaaŋa ka bɛ daa ŋmaligi doli Bashan polo; ka Bashan Naa Ogi min’ o tɔbbihi zaa daa kana ti lu bɛ zuɣu Ɛdirɛi n-tuhi ba. 34Amaa ka Yawɛ daa yɛli Musa, “Di zɔr’ o; dama n zaŋ o min’ o niriba ni o tiŋgbɔŋ zaa niŋ a nuu ni, niŋm’ o kaman a ni daa niŋ Amɔrinim’ Naa Sihɔn ŋun daa be Hɛshibɔn la shɛm la.” 35Ka bɛ daa ku o min’ o bihi ni o niriba zaa hal ka o ninvuɣ’ yino gba bi tiligi; ka daa deeg’ o tiŋgbɔŋ maa su.
Red Letter Dagbani Bible © Bible Society of Ghana, 2011