Kalinlinima 15
15
Sara maligu zaligunima
1Yawɛ daa yɛli Musa: 2Yɛlim’ Izraɛlnima: Yi yi ti paai n ni zaŋ tiŋgbɔn shɛli tin ya ni yi be di ni maa ni, 3ka yi yɛn zaŋ nahu bee biŋkɔbbila mali sara shɛli bɛ ni zaŋdi nyɔri buɣim la bee alikauli palibu sara bee suhuyubu sara bee yi churi puhibu sara shɛŋa yi ni yɛn mali ka di ʒiɛɣu niŋ Yawɛ nyaɣisim la, 4di saha ŋun ti zaŋ sara maa na ni o ti ti Yawɛ, ŋun bom’ zim viɛlli kilɔgiram yini n-zaŋ kpam lita yini ŋmiri li. 5Din pahi nyɛla, o lan bom’ wain din nyɛ binnyura sara la lita yini pahi bɛ ni zaŋdi sara shɛli nyɔri buɣim la zuɣu bee piɛbil’ kam sara zuɣu. 6Di yi nyɛla piɛlaa sara, yin’ bom’ zim viɛlli kilɔgiram ayi n-zaŋ kpam lita yini ni pirigili ŋmir’ li; 7ka bo wain lita yini ni pirigili din nyɛ binnyura sara shɛli din ʒiɛɣu niŋdi Yawɛ nyaɣisim la mali sara. 8Saha shɛli yi yi ti zaŋ naɣilaa ni yi mali sara shɛli bɛ ni zaŋdi nyɔri buɣim la bee alikauli palibu sara bee suhudoo biɛrisuŋ sara ti Yawɛ, 9di saha yin’ bom’ zim viɛlli lita ata n-zaŋ kpam lita ayi ŋmir’ li; 10ka bo wain lita ayi din nyɛ binnyura sara la ni sara shɛli bɛ ni zaŋdi nyɔri buɣim ka di ʒiɛɣu niŋdi Yawɛ nyaɣisim la mali sara.
11Lala ka yi yɛn niŋ naɣilaa bee piɛlaa bee piɛlabil’ kam bee bubil’ kam sara maligu ni. 12Yi ni bo biŋkɔb’ shɛb’ mali sara kalinli ni nyɛ shɛm, yin’ bomiya binyɛra maa pahi biŋkɔbigu kam zuɣu. 13Di simdi ni Izraɛl tiŋbia kam ŋun yɛn mali sara shɛli bɛ ni zaŋdi nyɔri buɣim ka di ʒiɛɣu niŋdi Yawɛ nyaɣisim la niŋ dimbɔŋɔnima. 14Ka tinzun nir’ ŋun yɛn be yi sani niŋ daba ayi bee ŋun yɛn be yi sani sahakam o yi bɔri ni o mali bɛ ni zaŋdi sara shɛli nyɔri buɣim ka di ʒiɛɣu niŋdi Yawɛ nyaɣisim la, ŋun’ niŋmi kaman yi ni niŋdi shɛm. 15Yi mini tinzunnim’ bɛn be yi sani zaligu yɛn nyɛla zaɣ’ yini, di nyɛla zaligu shɛli din kul yɛn be yi ʒiɛmana zaa ni. Yi mini tinzunnim’ zaa yɛn nyɛla yim Yawɛ sani. 16#Lɛv 24.22 Yi mini tinzunnim’ bɛn be yi sani zalikpana mini zaligu shɛŋa din pahi yɛn nyɛla yim.
17Ka Yawɛ daa lan yɛli Musa: 18Yɛlim’ Izraɛlnim’ ni yi yi ti paai tiŋgbɔn shɛl’ ni n 19ni zaŋdi ya tahiri maa, ka yi ti di tiŋgbɔŋ maa ni bindirigu, yin’ zaŋmiya di shɛli ti Yawɛ. 20Yi yi ti tuui ŋɔri yi bɔrɔbɔro zim shɛli yin’ zaŋmiya di bɔrɔbɔro kpil’ yini ti pini kaman yi ni zaŋdi kabɔɣili ni chi tiri pini shɛm la. 21Di simdi ni yi zaŋdi yi ni tuui ŋɔri bɔrɔbɔro zim shɛli bɔrɔbɔro kpil’ yini tiri Yawɛ yi ʒiɛmani kam ni.
22Amaa yi yi bi yuri ka kɔŋ zaligu shɛŋa zaa Yawɛ ni daa zaŋ ti Musa la dolibu, 23din nyɛ zaligu shɛŋa zaa Yawɛ ni daa chɛ ka Musa zali ya dahin’ shɛli Yawɛ ni daa zali zaligunim’ maa zaŋ chaŋ yi ʒiɛmani kam ni polo la, 24dindina yi yi bi yu di niŋbu, ka niriba maa ʒi di yɛla, niriba zaa bɛn bom’ naɣilabil’ yino mali sara shɛli bɛ ni zaŋdi nyɔri buɣim ka di ʒiɛɣu niŋdi Yawɛ nyaɣisim la m-pahi di chi mini binnyura sara ni bula’ yino ŋun nyɛ alahichi sanyoo sara la zuɣu kaman zaligu ni wuhi shɛm mali sara. 25Bɛ ni bi yuri ka kɔŋ zaligunim’ maa dolibu maa zuɣu, bɛ bom’ bɛ ni zaŋdi sara shɛli nyɔri buɣim la mini bɛ daalahichi sanyoo sara tahi Yawɛ tooni na ka maligumaana ti zaŋ li mali sara Izraɛlnim’ zaa zuɣu, ka Yawɛ chɛ bɛ taali maa. 26Ka Izraɛlnim’ zaa mini tinzunnim’ bɛn be bɛ san’ la nya taali chɛ m-paŋ, niriba maa zaa nuu ni be chirimbu maa ni la zuɣu.
27So yi bi yuri ka tum alahichi, ŋun’ bom’ yuun’ yini bunyaŋ mali alahichi tumbu sara. 28#Lɛv 4.27-31 Ka maligumaana ni mali sara ti ninvuɣ’ so ŋun chirim maa, o yi bi yuri ka tum alahichi, o ni mali sara ti o Yawɛ sani, ka o nya taali chɛ m-paŋ. 29Ŋunkam nyɛ Izraɛl tiŋbia mini ninvuɣ’ so ŋun nyɛ tinzun nira m-be bɛ sani zaa, zaligu yini maa ka a yɛn zali bɛ ni ŋun chirim.
30Amaa ninvuɣ’ so ŋun yuri ka tum alahichi, o yi nyɛla tiŋbia bee tinzun’ nira, o mola Yawɛ maa, di simdi ni bɛ ku dilana. 31Dama o ʒiɛm Yawɛ yɛligu ka tum birig’ o zaligu, ka di simdi ni bɛ shiri ku dilana, ka o daalahichi ʒi o zuɣu.
32Izraɛlnim’ ni daa be mɔɣu ni saha shɛli maa, ka bɛ daa ti nya do’ so ka o kabiri dari Vuhim Dabisili dali. 33Ka ninvuɣ’ shɛb’ bɛn daa nya o ka o kabiri dari maa daa zaŋ o tahi Musa mini Aduna ni niriba maa zaa sani. 34Ka bɛ daa zaŋ o niŋ duu kpari, dama bɛ daa na bi mi bɛ ni yɛn niŋ o shɛm. 35Ka Yawɛ daa yɛli Musa, “Kumiya doo maa. Zaŋmiy’ o yi tiŋ’ tariga, ka niriba maa zaa ti pihi kuɣa lab’ o.” 36Ka niriba maa zaa daa zaŋ doo maa yi tiŋ’ maa tariga nti pihi kuɣa lab’ ku o kaman Yawɛ ni daa zali Musa shɛm.
Binzusa zaligunima
37Ka Yawɛ daa yɛli Musa, “Yɛlim’ Izraɛlnima, 38#Zal 22.12 ni bɛ niŋm’ binzusa niŋ bɛ binyɛra luɣa ni bɛ ʒiɛmana zaa ni, ka niŋ mi sabilitim niŋ binzusa kam din be bɛ luɣa ni maa. 39Binzusa maa yi be yi sani, yi ni lihiri li ka teeri Yawɛ zaligunim’ yɛla ka dol’ li, ka ku doli yi suhuyubu ni yi nini ni tiɣi shɛli. 40Dinzuɣu teemiya ka doli n zaligunim’ maa zaa, ka be kasi yi Naawuni sani. 41Man’ Yawɛ n-nyɛ yi Naawuni ŋun daa yihi ya Ijipti tiŋgbɔŋ ni na ni n ti nyɛ yi Naawuni. Man’ Yawɛ n-nyɛ yi Naawuni.”
Red Letter Dagbani Bible © Bible Society of Ghana, 2011