Kalinlinima 1
1
Bɛ ni tuui kali niriba ka sabi bɛ yuya shɛm Izraɛl tiŋgbɔŋ ni
1Izraɛlnim’ ni daa yi Ijipti chana, di yuma ayi nyaaŋa gol’ so ŋun pahir’ ayi dahin yini dali ka Yawɛ daa yɛli Musa Yawɛ chirigibu shee suɣili la ni Sinai mɔɣu ni. 2“Kalim’ Izraɛlnim’ kaman sokam min’ o malibu ni o daŋ ni nyɛ shɛm. Sabimiya doo kam yuli, 3dɔbba bɛn zaa be Izraɛl tiŋgbɔŋ ŋɔ ni, ka paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. A mini Aduna sabimi bɛ yuya kaman bɛ daŋ kam ni nyɛ shɛm. 4Di simdi ka daŋ kam ni dɔɣirikpɛm’ be yi sani. 5Ninvuɣ’ shɛb’ bɛn yɛn sɔŋ ya n-nyɛ:
| Rubin zuliya ni, | Shɛdiu bia Ɛlizu n-yɛn sɔŋ ya; |
| 6Simiɔn zuliya ni, | Zurishadai bia Shɛlumiɛl n-yɛn sɔŋ ya; |
| 7Juda zuliya ni, | Aminadab bia Nashɔn n-yɛn sɔŋ ya; |
| 8Isaka zuliya ni, | Zua bia Nɛtanɛl n-yɛn sɔŋ ya; |
| 9Zɛbulɔn zuliya ni, | Hɛlɔn bia Ɛliab n-yɛn sɔŋ ya; |
| 10Yisifu bihi puuni, Ifriim zuliya ni, | Ammihud bia Ɛlishama n-yɛn sɔŋ ya; |
| ka Manaasa gba zuliya ni, | Pɛdazu bia Gamaliɛl n-yɛn sɔŋ ya; |
| 11Bɛnjamin zuliya ni, | Gidiɔni bia Abidan n-yɛn sɔŋ ya; |
| 12Dan zuliya ni, | Ammishadai bia Ahiɛza n-yɛn sɔŋ ya; |
| 13Asha zuliya ni, | Okiran bia Pagiɛl n-yɛn sɔŋ ya; |
| 14Gaad zuliya ni, | Diuɛl bia Ɛliasaf n-yɛn sɔŋ ya; |
| 15Naftali zuliya ni, | Ɛnan bia Ahira n-yɛn sɔŋ ya. |
16Bɛmbɔŋɔ n-nyɛ bɛ ni daa pii ninvuɣ’ shɛb’ niriba maa ni ka bɛ nyɛ bɛ daŋ ni toondaannima ni Izraɛl zuliya kam ni zuɣulaannima.
17Ka Musa mini Aduna daa zaŋ bɛ ni boli ninvuɣ’ shɛb’ yuya ŋɔ 18n-chɛ ka bɛ laɣim niriba maa zaa na gol’ so ŋun pahir’ ayi dahin yini dali, ka bɛ mini bɛ zuliya ti sab’ bɛ yuya yinoyino kaman bɛ yaannim’ dunoya ni nyɛ shɛm ni bɛ ninvuɣ’ shɛb’ bɛn paai yuun’ pisi bee n-gari lala 19kaman Yawɛ ni daa zali Musa shɛm. Dinzuɣu ka Musa daa sab’ bɛ yuya maa Sinai mɔɣu ni. 20Ka bɛ daa sabi Rubin ŋun daa nyɛ Yaakubu bituuli la niriba yuya yinoyino kaman bɛ zuliya ni bɛ malibu ni bɛ yaannim’ dunoya ni nyɛ shɛm ni bɛ yuya kalinli ni nyɛ shɛm ni bɛ zuɣulaannima ni doo kam ŋun paai yuun’ pisi bee n-gar’ lala, ka nyɛ ŋunkam ni tooi chaŋ tɔbu ni. 21Ka Rubin zuliya maa niriba kalinli daa yiɣisi ninvuɣ’ tuhi’ pihinahinaayɔbu ni kɔbisinu.
22Ka bɛ daa sabi Simiɔn zuliya yuya yinoyino kaman bɛ daŋ ni bɛ malibu ni bɛ yaannim’ dunoya ni nyɛ shɛm, doo kam ŋun paai yuun’ pisi bee n-gar’ lala, ka nyɛ ŋunkam ni tooi chaŋ tɔbu ni. 23Ka Simiɔn zuliya maa niriba kalinli daa yiɣisi ninvuɣ’ tuhi’ pihiyɔbuyinika ni kɔbisita.
24Ka bɛ daa sabi Gaad zuliya yuya yinoyino kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn zaa ni tooi chaŋ tɔbu ni. 25Ka Gaad zuliya maa niriba kalinli daa yiɣisi ninvuɣ’ tuhi’ pihinahinaanu ni kɔbisiyɔbu ni pihinu.
26Ka bɛ daa sabi Juda zuliya yuya yinoyino kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gari lala, ka nyɛ bɛn ni tooi chaŋ tɔbu ni. 27Ka Juda zuliya maa niriba kalinli daa yiɣisi ninvuɣ’ tuhi’ pisopɔinnaanahi ni kɔbisiyɔbu.
28Ka bɛ daa sabi Isaka zuliya yuya kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 29Ka Isaka zuliya maa niriba kalinli daa yiɣisi ninvuɣ’ tuhi’ pihinunaanahi ni kɔbisinahi.
30Ka bɛ daa sabi Zɛbulɔn zuliya yuya kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 31Ka Zɛbulɔn zuliya maa niriba kalinli daa yiɣisi ninvuɣ’ tuhi’ pihinunaayopɔin ni kɔbisinahi.
32Ka bɛ daa sabi Yisifu niriba bɛn nyɛ bɛ ni booni shɛb’ Ifriim zuliya la yuya kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 33Ka Ifriim zuliya maa niriba kalinli daa yiɣisi ninvuɣ’ tuhi’ pihinahi ni kɔbisinu.
34Ka bɛ daa sabi Manaasa zuliya yuya ni bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 35Ka Manaasa zuliya maa niriba kalinli daa yiɣisi ninvuɣ’ tuhi’ pihitanaayi ni kɔbisiyi.
36Ka bɛ daa sabi Bɛnjamin zuliya yuya ni bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 37Ka Bɛnjamin zuliya maa niriba kalinli daa yiɣisi ninvuɣ’ tuhi’ pihitanaanu ni kɔbisinahi.
38Ka bɛ daa sabi Dan zuliya yuya kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 39Ka Dan zuliya maa niriba kalinli daa yiɣisi ninvuɣ’ tuhi’ pihiyɔbunaayi ni kɔbisiyopɔin.
40Ka bɛ daa sabi Asha zuliya yuya kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 41Ka Asha zuliya maa niriba kalinli daa yiɣisi ninvuɣ’ tuhi’ pihinahi ni yini ni kɔbisinu.
42Ka bɛ daa sabi Naftali zuliya yuya kaman bɛ daŋ ni bɛ malibu ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni. 43Ka Naftali zuliya maa niriba kalinli daa yiɣisi ninvuɣ’ tuhi’ pihinunaata ni kɔbisinahi.
44Bɛmbɔŋɔ n-nyɛ Musa mini Aduna ni daa chɛ ka Izraɛl kpamba pinaayi bɛn ʒe bɛ daŋ niriba zaashee sɔŋ ba ka bɛ kali ba la. 45Dinzuɣu Izraɛlnim’ maa zaa ni bɛ yaannim’ dunoya ni nyɛ shɛm, bɛn paai yuun’ pisi bee n-gar’ lala, ka nyɛ bɛn ni tooi chaŋ tɔbu ni Izraɛl tiŋgbɔŋ ni 46#Kal 26.1-51 zaa kalinli daa yiɣisila ninvuɣ’ tuhi’ kɔbisiyɔbunaata ni kɔbisinu ni pihinu.
47Amaa bɛ daa bi kali Lɛvinim’ ni bɛ daŋ niriba pahi bɛ ni. 48Dama Yawɛ daa pun yɛli Musa, 49“Lɛvinim’ zuliya kɔŋko ka a ku kali, a mi di sab’ bɛ yuya pahi Izraɛlnim’ ni. 50Amaa chɛ ka Lɛvinim’ su n daalikauli suɣili la mini di nɛma zaa ni binshɛɣukam din be di ni fukumsi. Bɛna n-yɛn ʒiri suɣili maa mini di nɛma zaa, ka ti bɛ suɣa gil’ li. 51Yi yi ti yɛn sibigi suɣili maa chaŋ, Lɛvinim’ n-yɛn sibigi li; ka yi yi ti yɛn sa li, Lɛvinim’ maa n-yɛn zaŋ li sa. Ka ninvuɣ’ zino yi miri suɣili maa na, yin’ kum’ o. 52Chɛ ka Izraɛlnim’ bɛn kpalim ti bɛ suɣa gbilligbilli zalizali. 53Amaa Lɛvinim’ maa bɛn’ tim’ bɛ suɣa gili alikauli suɣili maa n-gul’ li, ka Naawuni suhu ti ku yiɣisi bahi Izraɛlnim’ zuɣu.” 54Lala ka Izraɛlnim’ daa niŋ. Bɛ daa niŋmi kaman Yawɛ ni daa zali Musa shɛm.
Red Letter Dagbani Bible © Bible Society of Ghana, 2011