Maika 1
1
1 #
2 Nan 15.32—16.20; 18.1—20.21; 2 Yɛl 27.1-7; 28.1—32.33 Yawɛ ni daa zaŋ yɛtɔɣ’ shɛli ti Maika ŋun daa nyɛ Mɔrɛshɛt nir’ la m-bɔŋɔ. Di daa nyɛla Jɔtam mini Ahaz ni Hɛzɛkia bɛn daa nyɛ Juda nanim’ la ʒiɛman’ ni. O ni daa nya binshɛŋa maa daa nyɛla Samaria mini Jɛrusalɛm yɛla.
Samaria mini Jɛrusalɛm zuɣu fabila
2Zuliya kam, yi zaa wummiya!
Dunia ŋɔ mini binshɛɣukam zaa din be di ni, wummiya!
Chɛ ka Yawɛ ŋun nyɛ ti Duuma
ka be o jɛmbu duu din be kasi ŋɔ ni di shɛhira jɛndi ya.
3Dama nyamiya, Yawɛ yɛn yila o biɛhigu shee na.
O ni ti siɣina ti tam dunia ni daboya zuɣu chana.
4Ka zoya ti nyɛligi do o naba ni
ka vinvama tahi bɔɣi
kaman shigbaŋ m-miri buɣim la,
bee kaman kom din kpaai bahi luɣ’ shɛli din nyɛ sirigili la.
5Ka dimbɔŋɔ zaa ni ti nyɛla Yaakubu zuliya
bɛn nyɛ Izraɛlnim’ biriginsim mini bɛ daalahichi zuɣu.
Ka Yaakubu zuliya biriginsim maa lee nyɛ dini?
Pa Samaria?
Ka Judanim’ buɣijɛmbo shee lee nyɛ dini?
Pa Jɛrusalɛm?
6Dinzuɣu n ni chɛ ka Samaria wurim n-leei mɔɣu ni,
ka nyɛ luɣ’ shɛli bɛ ni yɛn sari wain tihi.
Ka n ni ti va di kuɣa zaa ti bahi vinvamli ni,
ka chɛ ka di tanzahi la yi n-do palo ni.
7N ni ti ŋme n-wurim o buɣa la zaa,
ka nyo bɛ ni zaŋ laɣ’ shɛŋa zaa yo o samli buɣim,
dama buɣa jɛmbu shee pagɔrisigu tuma puuni ka o daa nya li,
ka o dimnim’ ni ti kana ti ŋme n-di di zaa chaŋ ti lan zaŋ li tumdi pagɔrisigu tuma.
8Dimbɔŋɔ zuɣu n ni kum ka fabili.
N ni chaŋ napɔnzaŋa ni n zaɣim.
N ni fabili kaman yɔbahi la,
ka kum kaman taatahi la.
9Dama o daŋ’ maa pala din ni tibi kpaŋ.
Di looi Judanima.
Di paai n niriba dunɔdal’ ni Jɛrusalɛm.
Dim’ maa paai Jɛrusalɛm
10Di yɛliya di yɛla Gaat fɔŋ ni,
di kul chɛliya ka nintam yi yi nina ni na.
Bilimmiya taŋkpaɣu ni
Bɛtiliafra tiŋ’ puuni.#1.10 GAAT zaŋ chaŋ BƐTILIAFRA: Suurili ŋɔ kalinli 10-14 wuhiya ni tinsi ŋɔ nyɛla luɣ’ shɛŋa din daa gili Jɛrusalɛm. Dima so yi daa yɛn liri Jɛrusalɛm, tinsi ŋɔ ka o yɛn daŋ paabu
11Yinim’ Shafirinima,
zaŋmiya yi zaɣim mini yi vi gari chaŋ.
Zaanannima,
di yin ya na.
Bɛtɛzɛlnim’ kuhirimi,
ka ku lan sɔŋ ya.
12Marɔtinim’ kul guhirimi,
ka bɛ suhuri ye zaɣ’ viɛlli zuɣu,
amaa ka zaɣ’ biɛɣu pun yi Yawɛ sani
siɣi Jɛrusalɛm dunɔdal’ ni na.
13Yinim’ Lakishinima,
zaŋmiya chɛchɛbunsi ga yuri,
di daa nyɛla alahichi piligu
Ziɔn bipuɣiŋga sani,
dama a ni ka bɛ daa nya
Izraɛlnim’ biriginsim.
14Dinzuɣu yi ni ti ti Mɔrɛshɛtigatinim’
chɛbisibu pina,
ka Akizibnim’ ni ti nyɛla bɛn yɔhindi
Izraɛl nanima.
15Yinim’ Marɛshanima,
n ni lan piɛli yi dim’ ŋun ni nyaŋ ya bahi yi zuɣu.
Ka Izraɛl ninvuɣ’ zuɣuri bɛn mali jilima
ni ti zo na ti sɔɣi Adulam.
16Pinimiya zuɣukpina,
yi ni yuri yi bi’ shɛb’ la zuɣu.
Pinimiya zuɣukpina ka di be kaman juɣu zuɣu la,
dama bɛ gbahi ba kuli tinduya ni.
Currently Selected:
Maika 1: RLDB
Highlight
Share
Copy
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
