Lɛvinima 7
7
Taali sanyoo sara maligu
1Taali sanyoo sara maligu zaligu m-bɔŋɔ. Di nyɛla din be kasi zaa. 2Luɣ’ shɛli bɛ ni kɔriti bɛ ni zaŋdi sara maligu shɛli nyɔri buɣim biŋkɔbiri la, nimaani ka bɛ yɛn kɔriti taali sanyoo biŋkɔbiri, ka zaŋ bɛ ʒim kpaai vie sara maligu bimbini luɣilikam. 3Bɛ zaŋm’ di biŋkpam zaa mali sara, di zuli ni kpam mini kpam din pili namanama 4ni yaannina ayi mini di kpam din be binshee ni, ka yihi binsabili yaɣ’ shɛli din viɛl’ pahi binyaannin’ shɛŋa o ni yihi maa zuɣu. 5Ka maligumaana zaŋ li nyo buɣim sara maligu bimbini zuɣu m-mali sara ti Yawɛ. Di nyɛla taali sanyoo sara maligu. 6Maligumaana bidibbil’ kam ni tooi ŋub’ li. Di simdi ka bɛ ti ŋub’ li la luɣ’ kasi shee, di nyɛla din be kasi zaa.
7Taali sanyoo sara maligu maa mini alahichi sanyoo sara maligu ŋmanila taba. Di zaa zaligu nyɛla zaɣ’ yini. Maligumaana ŋun mali di sara maa n-su li. 8Ka maligumaana yi mali bɛ ni zaŋdi sara shɛli nyɔri buɣim la ti so, ŋun’ maligumaana maa n-su o ni mali sara shɛli bɛ ni zaŋdi nyɔri buɣim maa biŋkɔbigu gbaŋ. 9Ka bɛ ni zaŋ kawana bee chi zim mali binshɛli bɔrɔbɔro duu puuni mini bɛ ni chim shɛli zaa tahilaa bee mahilaa puuni, maligumaana ŋun mali di sara maa n-su li. 10Bɛ ni zaŋ kawana bee chi m-mali sara maligu shɛlikam, kpam yi be di ni bee kpam yi ka di ni, di nyɛla Aduna bidibisi la zaa dini, di ni kul nyɛ yino dini shɛm, lala ka di nyɛ ŋun’ la gba dini.
Suhudoo sara maligu
11Ka so yi yɛn mali suhudoo sara ti Yawɛ, di zaligu m-bɔŋɔ: 12O yi yɛn malila wumpaɣibo sara maligu, ŋun zaŋm’ bɛ ni zaŋ kpam gari zim ni mali mah’ shɛŋa, ka dabindi ka di ni mini karikaasi shɛli bɛ ni niŋ kpam niŋ ni bɛ ni zaŋ kpam gari zim viɛl’ shɛl’ ni mali mah’ shɛŋa m-mali wumpaɣibo sara maligu maa. 13Ka o ti zaŋ o suhudoo pina din nyɛ bɔrɔbɔro kpila din mali dabindi m-pahi o wumpaɣibo sara maligu maa zuɣu na. 14Ka o ti yihi bɔrɔbɔro kpil’ yini sara maligu kam puuni n-zaŋ li ti Yawɛ, ka di leei maligumaana ŋun zaŋ suhudoo sara maligu maa ʒim kpaai vie maa dini. 15Ka di simdi ka bɛ ti ŋubi o ni mali suhudoo sara maligu shɛli, ka di nyɛ o wumpaɣibo sara maligu maa nimdi zaa o ni mal’ li dahin’ shɛli maa. O di ti chɛ di shɛli zali hal ni biɛɣ’ asiba.
16Ka o sara maligu maa yi nyɛla alikauli palibu sara maligu bee o suhuyubu sara maligu, bɛ ni tooi ŋubi di nimdi maa o ni mali sara maa dahin’ shɛli maa, ka shɛli yi guui zani neei biɛɣu bɛ ni tooi ŋub’ li; 17amaa sara maligu maa nimdi yi zani hal ni daba ata, bɛn’ zaŋm’ li nyo buɣim. 18Ka bɛ yi ŋub’ o suhudoo sara maligu maa nimdi daba ata maa dali, dilan’ sara maligu maa ku lan gbaai, ka bɛ ku kal’ li kpɛhi sara maligu ni, di ni ti nyɛla din bi be kasi, ka ŋun ti ŋub’ li ni ti ʒi di zambu. 19Nimdi din shihi binshɛli din bi be kasi bi simdi ni bɛ ŋub’ li. Di simdi ni bɛ zaŋ li nyo buɣim.
Ninvuɣ’ shɛb’ bɛn zaa be kasi ni tooi ŋubi Yawɛ suhudoo sara maligu nimdi, 20amaa ninvuɣ’ so ŋun bi be kasi ka ŋubi Yawɛ sara maligu nimdi ni daɣiri, bɛn yihim’ dilan’ o daŋ ni. 21Ka so yi shihi binshɛli din bi be kasi, di yi nyɛla ninsal’ daɣiri bee biŋkɔb’ so ŋun bi be kasi bee binshɛli dinkam bi be kasi ka ŋubi Yawɛ suhudoo sara maligu nimdi, bɛn yihim’ dilan’ o daŋ ni.
22Ka Yawɛ daa yɛli Musa, 23“Yɛlim’ Izraɛlnima, ‘Di ŋubiya biŋkpam, nahu kpam bee piɛɣu kpam bee bua kpam. 24Yi ni tooi zaŋ biŋkɔb’ so ŋun kpi o zuɣu biŋkpam bee mɔɣu ni biŋkɔbiri ni gbaai biŋkɔb’ so biŋkpam tum tuun’ shɛli, amaa miriya ka yi ŋub’ li. 25Dama ŋunkam ŋubi bɛ ni zaŋ biŋkɔb’ so nyo buɣim mali sara ti Yawɛ biŋkpam, bɛn’ yihim’ dilan’ o daŋ ni. 26Din pahi nyɛla, miriya ka yi di binʒim kam yi ni be luɣ’ shɛli zaa, noonsi ʒim bee biŋkɔbiri ʒim. 27#Pil 9.4; Lɛv 17.10-14; 19.26; Zal 12.16, 23; 15.23 Ŋunkam ti di binʒim kam, bɛn’ yihim’ dilan’ o daŋ ni.’ ”
28Yawɛ daa yɛli Musa: 29Yɛlim’ Izraɛlnima, ŋunkam yɛn mali suhudoo sara maligu ti man’ Yawɛ, ŋun’ zaŋm’ li ka man’ Yawɛ sanna. O suhudoo sara maligu maa ni 30ka o ni yihi bɛ ni zaŋdi binshɛli nyɔri buɣim maani sara tiri Yawɛ la n-gbib’ li omaŋmaŋ’ nuu ni na. O ti zaŋm’ biŋkpam mini bimbihili na, ka bɛ ti zaŋ bimbihili maa gahigahi ka di leei gahibu sara maligu Yawɛ tooni. 31Maligumaana ni ti zaŋ biŋkpam maa nyo buɣim sara maligu bimbini zuɣu, amaa bimbihili maa din’ ni ti nyɛla Aduna min’ o bidibisi la dini. 32Ka a ti zaŋ nudirigu gbali ti maligumaana, ka di leeg’ o tarili a suhudoo sara maligu maa ni. 33Aduna bidibisi maa ni ŋun zaŋ suhudoo sara maa binʒim mini biŋkpam mali sara maa ni ti su nudirigu gbali, ka di leeg’ o tarili. 34Dama mani n-yihi bɛ ni zaŋ bimbihili shɛli gahigahi la mini bɛ ni zaŋ nudirigu gbali shɛli mali Izraɛlnim’ suhudoo sara la Izraɛlnim’ sani n-zaŋ li ti Aduna min’ o bidibisi maa, ka di leei bɛ ni su shɛli ʒiɛman kam ni. 35Dimbɔŋɔ n-nyɛ Aduna min’ o bidibisi tarili bɛ ni zaŋ binshɛli nyo buɣim mali sara ti Yawɛ maa puuni, dahin’ shɛli bɛ ni daa zaŋ ba zali ni bɛ leei man’ Yawɛ maligumaaniba la, ka n daa zaŋ li ti ba. 36Man’ Yawɛ n-daa zali ni Izraɛlnim’ zaŋm’ li tiri ba dahin’ shɛli bɛ ni daa booi kpam bahi bɛ zuɣuri ni la. Di nyɛla zaligu din kul yɛn beni bɛ ʒiɛmani kam ni.
37Bɛ ni zaŋdi binshɛŋa nyɔri buɣim maani sara mini kawana ni chi sara maligu ni alahichi sanyoo sara maligu ni taali sanyoo sara maligu ni maligumaana leebu sara maligu ni suhudoo sara maligu zaligu m-bɔŋɔ. 38Dina ka Yawɛ daa zali Musa Sinai Zoli zuɣu saha shɛl’ o ni daa zali Izraɛlnim’ ni bɛ zaŋm’ bɛ sara maligunim’ na ti ti ŋun’ Yawɛ Sinai mɔɣu ni la.
Currently Selected:
Lɛvinima 7: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
