Lɛvinima 26
26
Alibarika din be noli deebu ni
(Zaligu 7.12-24; 28.1-14)
1 #
Yibu 20.4; Lɛv 19.4; Zal 5.8; 16.21-22; 27.1 Miriya ka yi mali binnana bee n-zaŋ dari kpe biŋŋmahima bee n-sa daantalisi bee n-zaŋ kuɣa biŋŋmahima sa yi tiŋgbɔŋ ŋɔ ni n-jɛmdi li, dama man’ Yawɛ n-nyɛ yi Naawuni. 2Gbibiya n vuhim dabisa la, ka timiya m biɛhigu shee jilima. Mani n-nyɛ Yawɛ.
3Yi yi doli n noli, ka gbibi n zaligunima ka tumdi di tuma, 4dindina n ni tin ya sakom saa mibu saha, ka chɛ ka tiŋgbani maa bindira niŋ pam, ka yi puri ni tihi wali wala. 5#Zal 11.13-15; 28.1-14 Ka yi ti bu chi hal ni wain tihi wala pɔhibu saha, ka pɔhi wain tihi wala hal ni biribu saha. Yi ni ti di n-tiɣi, ka be tiŋgbɔŋ maa ni ka yɛl’ shɛli kani. 6Ka n tin ya suhudoo yi tiŋgbɔŋ maa ni, ka yi ti dɔni tiŋa, ka so ku varisi ya. N ni ti yihi biŋkɔb’ biɛri tiŋgbɔŋ maa ni, ka so ti ku lo tɔbu n-kpe yi tiŋgbɔŋ ni. 7Ka yi ti kari doli yi dimnima n-zaŋ takɔbi ku ba. 8Yi niriba anu ni ti kar’ doli niriba kɔbiga, ka yi niriba kɔbiga ni ti kar’ doli niriba tuhi’ pia n-zaŋ takɔbi ku yi dimnim’ maa. 9N ni ti niŋ alibarika niŋ yi ni, ka chɛ ka yi dɔɣi bihi n-nabi pahi, ka n kul gbibi n ni daa lɔn ya alikauli shɛl’ la. 10Ka yi ti di bindir’ kura hal ni saha shɛli, ka yi ni ti kɔrigila bindir’ kura ka su zaɣ’ pala. 11Ka n ni ti be yi sani, ka ku lan zaɣisi ya. 12#2 Kɔr 6.16 N kul ni be yi sani chana, ka nyɛ yi Naawuni, ka yi nyɛ n niriba. 13Man’ Yawɛ n-nyɛ yi Naawuni ŋun daa yihi ya Ijipti tiŋgbɔŋ ni na ni di chɛ ka yi ku lan nyɛ bɛ daba, n kabi yi nyiŋgoya ni dapuhi la, ka chɛ ka yi tooi chana ka yi zuɣuri ʒe tibi.
Nol’ zaɣisibu tibidarigibo
(Zaligu 28.15-68)
14Amaa yi yi ku wum n yɛligu, ka ku tum zaligunim’ ŋɔ zaa tuma, 15ka ʒiɛm n zaligunim’ ka zaɣisi li yi suhu ni, ka bi niŋ n zaligunim’ maa zaa ni yɛli ni yi niŋ shɛm, amaa ka saɣim n daalikauli, 16dimbɔŋɔ ka n yɛn niŋ ya, n ni chɛ ka dabiɛm gbahi ya, ka chɛ ka dɔr’ shɛli din bahiri nir’ yoli lu yi zuɣu, dɔr’ shɛli din saɣindi nina ka nyɛ din diri nyɛvili. Ka yi ti biri yi bimbira yoli, dama yi dimnima n-ni ti di li. 17N suhu ni ti yiɣisi bahi yi zuɣu, ka yi dimnim’ ti nyaŋ ya, ka sun ya. Ka yi ti guura ka so bi kariti ya. 18Ka dimbɔŋɔnim’ yi ti niŋ ka yi bi deei n noli, di saha n ni darigi yi tibili ʒiibuyopɔin yi daalahichi zuɣu. 19N ni ti saɣim yi ni mali karimbaan’ shɛli nyuri bara maa, ka chɛ ka yi sagbana mi be kaman kurigu la, 20ka yi tiŋgbani mi ti be kaman tahiʒiɛɣu. Yi ni ti yihi yi yaa tum tuma yoli, ka yi tiŋgbani ku niŋ bindirigu, ka di tihi gba ti ku wali wala.
21Di saha yi yi ti na kul zaɣisi n noli ka ku doli ma, n ni chɛ ka alɔbo lu yi zuɣu ʒiibuyopɔin kaman yi daalahichi ni galisi shɛm tariga. 22N ni ti chɛ ka mɔɣu ni biŋkɔbiri lu yi zuɣu, ka bɛ be yi sani n-gbahi yi bihi mini yi niɣi n-chɛ ka yi kalinli filim, ka yi soya bili mɔri.
23N yi darigi yi tibili ŋ-ŋɔ ka yi bi labi n sanna ka na kul kpɛrila yɔɣu, 24dindina n gba ni chɛn ya, ka mmaŋmaŋ’ ni ti ŋmɛn’ ya buyopɔin yi daalahichi zuɣu. 25N ni ti zaŋ takɔbi lu yi zuɣu n-kun ya bɔhi biɛri alikauli la zuɣu. Ka yi yi ti zo n-kuli yi fɔntinsi ni, n ni chɛ ka alɔbo lu yi zuɣu, ka zaŋ ya niŋ yi dimnim’ nuu ni. 26N ni ti filim yi bɔrɔbɔro zaɣa, ka paɣiba pia ni ti mali yi bɔrɔbɔro dubil’ yini puuni, ka ti filim yi bɔrɔbɔro maa tibisim, ka yi ti ŋub’ li ka bi tiɣi.
27Amaa dimbɔŋɔ yi niŋ, ka yi na kul zaɣisi ni yi ku wum n yɛligu, ka kul kpɛri yɔɣu ka chɛri ma, 28dindina n ni zo ni suhuyiɣisili ka chɛn ya, ka mmaŋmaŋ’ darigi yi tibili buyopɔin yi daalahichinim’ maa zuɣu. 29Yi ni ti ŋubi yi bidibisi mini yi bipuɣinsi. 30Ka n ni ti saɣim yi jɛmbu shɛhi zaa, ka wurim yi tulaale zim sara maligu bimbina, ka ti zaŋ ya zaɣ’ kpima pa yi buɣ’ kpima zuɣu, ka zaɣisi ya ni n suhu zaa. 31Ka n ti bahi yi fɔntinsi yoli, ka chɛ ka yi jɛmbu shɛhi leei dabari, ka m baɣa ku lan be yi binyɛra din nyom viɛl’ ni. 32N ni saɣim tiŋgbɔŋ maa, ka di ti gari yi dimnim’ bɛn ti yɛn kana ti be di ni. 33#Zal 28.15-68 N ni ti ŋooi takɔb’ lu yi zuɣu wurim ya kpɛhi zuliya shɛb’ ni, ka yi tiŋgbɔŋ leei dabari, ka chɛ ka yi fɔntinsi ti bahi yoli. 34Di saha ka tiŋgbɔŋ maa ni ti di di vuhim dabisa nyaɣisim, saha shɛli zaa yi ni ti yɛn be yi dimnim’ tiŋgbɔŋ ni ka di leei dabari maa, di saha maa di ni vuhi, ka di di vuhim dabisa nyaɣisim. 35Di ni ti yɛn kpalim dabari saha shɛli maa ni zaa di ni ti vuhi vuhim shɛli yi ni daa be nimaani ka di bi nyari yi vuhim dabisa dal’ la.
36Ka yi ninvuɣ’ shɛb’ bɛn ti kpalim, n ni zaŋ dabiɛm pam niŋ bɛ suhuri ni bɛ dimnim’ tiŋgbɔŋ maa ni; ka pɔhim yi ti ʒiɛri vaɣu ka bɛ wum di damli bɛ ni guui, bɛ ni ti guui kaman nir’ ni guui ni o tiligi takɔbi kum ni shɛm la. Bɛ ni ti lu ka so bi kari doli ba. 37Bɛ ni ti tuuri taba kaman bɛ yɛn zomi yi takɔbi kum ni la, ka so bi kari doli ba, ka yi ti ku mali yiko din ni tuhi yi dimnima. 38Ka yi ti kpi tinzunnim’ maa sunsuuni, ka yi dimnim’ maa tiŋgbani ti vali ya. 39Ka yi ni bɛn ti kpalim ni ti bahi yoli yi dimnim’ tiŋgbɔna ni bɛ mini bɛ yaannim’ daalahichi zuɣu, bɛ ni ti bahi yoli kaman bɛ yaannim’ maa.
40Amaa bɛ yi ti tiligi saɣi bɛ daalahichi shɛŋa bɛ ni daa tum ma bɛ yɔhiŋ puuni la mini bɛ ni zaɣisi ma dolibu, 41ka di zuɣu chɛ ka n gba zaɣisi ba ka zaŋ ba tahi bɛ dimnim’ tiŋgbɔŋ ni la, di saha bɛ yi ti siɣisi bɛmaŋ’ bɛ suhuri din mali daɣiri maa ni ka niŋ tuuba bɛ daalahichi maa zuɣu, 42#Pil 17.7-8; 26.3-4; 28.13-14 dindina n ni teei n ni daa lo Yaakubu mini Yisahaku ni Ibrahimma alikauli shɛŋa la yɛla, ka lan teei tiŋgbɔŋ ŋɔ yɛla. 43Amaa tiŋgbɔŋ maa ni ti chɛ ba ka leei dabari dɔni n-di vuhim dabisa nyaɣisim saha shɛli bɛ ni ti lan ka di ni maa, dama bɛ ʒiɛm n zaligunima ka zaɣisi n zaligunim’ maa bɛ suhuri ni. 44Amaa dimbɔŋɔnim’ zaa yoli, bɛ yi ti be bɛ dimnim’ tiŋgbɔŋ maa ni, n ti ku ʒiɛm ba bee n zaɣisi ba din ni chɛ ka n ku bɛ zaa ka saɣim n ni daa lo ba alikauli shɛl’ la, dama man’ Yawɛ n-nyɛ bɛ Naawuni. 45Amaa bɛ zuɣu n ni teei n ni daa lo bɛ yaannim’ alikauli shɛl’ la yɛla, n ni daa yihi shɛb’ Ijipti tiŋgbɔŋ ni na zuliya pam ninni nti nyɛ bɛ Naawuni la. Mani n-nyɛ Yawɛ.
46Yawɛ ni daa zaŋ zaligu shɛŋa mini kaya shɛŋa ti Musa Sinai Zoli zuɣu ni o zaŋ ti Izraɛlnima m-bala.
Red Letter Dagbani Bible © Bible Society of Ghana, 2011