Lɛvinima 20
20
Noli zaɣisibu tibidarigibo
1Ka Yawɛ daa yɛli Musa: 2Yɛlim’ Izraɛlnima: Izraɛl do’ so bee saamba bɛn be Izraɛl do’ so yi ti zaŋ o bia ti Molɛk, bɛn’ kum’ o; tiŋ’ maa nim’ bɛn’ labim’ o kuɣa. 3Man’ maŋmaŋ’ ni ti pa nina lihiri dilana, ka yih’ o n niriba ni, o ni zaŋ o bia ti Molɛk n-ta m biɛhigu shee daɣiri, ka dihi n yuli din be kasi ŋɔ vi zuɣu. 4Ka so yi zaŋ o bia ti Molɛk, ka tiŋ’ maa nim’ nya ka sɔɣ’ li ka bi ku o, 5dindina n ni pa n nina lihiri doo maa min’ o yiŋnima, ka ku o mini ninvuɣ’ shɛb’ bɛn zaa dol’ o jɛmdi Molɛk maa.
6Ninvuɣ’ so yi ŋmaligi chaŋ jinwariba sani bee bukpahinim’ sani nti doli ba, n ni pa nina lihiri dilana, ka yih’ o n niriba ni. 7Dinzuɣu malimiya yimaŋa m-be kasi, dama man’ Yawɛ n-nyɛ yi Naawuni. 8Gbibiya n zaligunima ka tummiya di tuma; Mani n-nyɛ Yawɛ ŋun maani ya ka yi be kasi.
9 #
Yibu 21.17; Mat 15.4; Maak 7.10 Ŋunkam tu o ba bee o ma, bɛn’ kum’ o, o ni tu o ba bee o ma maa zuɣu, o ʒim yihibu maa taali ʒila o zuɣu.
10 #
Yibu 20.14; Lɛv 18.20; Zal 5.18 Doo yi tum zina ni o kpee paɣa, bɛn’ kum’ o mini paɣ’ maa zaa. 11#Lɛv 18.8; Zal 22.30; 27.20 Doo yi zaŋ o ba paɣ’ dɔni, dilan’ nyɛla ŋun nya o ba zaɣim, ka di simdi ka bɛ ku bɛ niriba ayi maa, ka bɛ ʒim yihibu taali ʒi bɛ zuɣu. 12#Lɛv 18.15 Doo yi zaŋ o bia paɣ’ dɔni, bɛn’ kum bɛ niriba ayi maa, bɛ tumla taali bɛ ni nyɛ dɔɣiri yini zuɣu, bɛ ʒim yihibu taali ʒila bɛ zuɣu. 13#Lɛv 18.22 Doo yi dɔni o do’ kpee kaman paɣ’ la, bɛ niriba ayi maa tum din chihira, ka di simdi ka bɛ ku bɛ niriba ayi maa, ka bɛ ʒim yihibu taali ʒi bɛ zuɣu. 14Doo yi kpuɣi paɣ’ min’ o bia leeg’ o paɣiba di nyɛla ninvuɣ’ biɛtali, ka di simdi ka bɛ nyo doo maa min’ o paɣiba maa buɣim din ni chɛ ka ninvuɣ’ biɛtali maa ku lan be bɛ sunsuuni. 15Doo yi goli biŋkɔbigu, bɛn’ kum’ o, ka ku biŋkɔbigu maa gba. 16#Yibu 22.19; Lɛv 18.23; Zal 27.21 Paɣ’ yi zaŋ omaŋ’ ti biŋkɔbigu kam ka o gol’ o, bɛn’ kum’ paɣa maa mini biŋkɔbigu maa, kumiya ba, ka bɛ ʒim yihibu taali ʒi bɛ zuɣu.
17 #
Lɛv 18.9; Zal 27.22 Doo yi zaŋ o tizɔpaɣa ŋun nyɛ o ba bipuɣiŋga bee o ma bipuɣiŋga dɔni n-nya o zaɣim, ka paɣa maa gba nya o zaɣim, di nyɛla vi tuuni, ka di simdi ka bɛ yihi ba bɛ niriba ni. O ni zaŋ o tizɔpaɣ’ dɔni maa zuɣu, di simdi ni bɛ darig’ o tibili. 18#Lɛv 18.19 Doo yi zaŋ paɣ’ so ŋun sɔrilim na bi naai dɔni m-pirig’ o zaɣim, o yihila paɣ’ maa ʒi’ soya zahira, ka paɣ’ maa gba yih’ omaŋmaŋ’ ʒi’ soya zahira, di simdi ka bɛ yihi bɛ niriba ayi maa zaa bɛ daŋ ni. 19Miri ka a bo a piriba bee a mapira, dama nir’ yi niŋ lala o dɔɣira ka o bo maa, di simdi ni bɛ darigi bɛ tibili. 20#Lɛv 18.12-14 Doo yi zaŋ o ŋahiba paɣ’ dɔni, o ŋahiba maa zaɣim ka o nya maa, di simdi ni bɛ darigi bɛ tibili; bɛ ku dɔɣi bia hal ti kpi. 21#Lɛv 18.16 Doo yi kpuɣ’ o mabia paɣa, o tum zaɣ’ biɛɣu, ka nya o mabia zaɣim, bɛ ku dɔɣi bia.
22Dinzuɣu gbibiya n ni zali ya zaligu shɛŋa zaa, ka tummiya di tuma, dina n-ni chɛ ka n ni zaŋdi ya kuni tiŋgbɔn shɛli ni maa ti ku gbuɣi ya bahi. 23Ka miriya ka yi ti doli n ni kariti zuliya shɛb’ ka chɛri ya ŋɔ kaya, dama bɛ daa tumdila dimbɔŋɔnim’ zaa, dinzuɣu ka n zaɣisi ba.
24Amaa n yɛlila yinima: N ni zaŋ bɛ tiŋgbɔn maa tin ya, ka yi di li fali n-su li. Di nyɛla tiŋgban’ shɛli din mali bihim mini shiri pam.#20.24 TIŊGBAN’ SHƐLI DIN MALI BIHIM MINI SHIRI PAM: Di gbinni nyɛla, “Tiŋgban’ shɛli din mali anfaani mini atam”. Man’ Yawɛ n-nyɛ yi Naawuni ŋun woligi ya ka chɛ zuliya shɛba. 25Dinzuɣu di simdi ka yi woligi biŋkɔb’ shɛb’ bɛn pa daɣiri ka chɛ bɛn nyɛ daɣiri ni noombihi shɛb’ bɛn pa daɣiri ka chɛ bɛn nyɛ daɣiri. Miriya ka yi ti zaŋ biŋkɔbigu bee noombil’ bee binshɛli n ni wuhi ni di nyɛla daɣiri la kpɛhi yimaŋ’ daɣiri ni. 26Di simdi ka yi be kasi n sani; dama man’ Yawɛ nyɛla ŋun be kasi, ka woligi ya zuliyanim’ ni ni yi nyɛ n dahalali.
27Paɣ’ bee doo yi leei jinwara bee bukpaha bɛn’ kum’ o. Bɛn’ labimi ba kuɣa. Bɛ ʒim yihibu taali ni ʒi bɛmaŋmaŋ’ zuɣu.
Red Letter Dagbani Bible © Bible Society of Ghana, 2011