Lɛvinima 1
1
Sara maligu buɣim nyɔbu
1Ka Yawɛ daa boli Musa Yawɛ chirigibu shee suɣili la ni n-yɛl’ o: 2Yɛlim’ Izraɛlnima ni bɛ so yi zaŋ biŋkɔbigu na ni o ti ti Yawɛ, di simdi ka di nyɛla dilan’ naɣikpahi ni nahu bee o biŋkɔbbaligu ni piɛɣu bee bua. 3Di yi nyɛla dilan’ zaŋla nahu na ni o ti mali bɛ ni zaŋdi sara shɛli nyɔri buɣim la, ŋun zaŋmi naɣilaa ŋun ka daŋa m-mali Yawɛ chirigibu shee suɣili maa dunol’ ni din ni chɛ ka Yawɛ deeg’ o. 4O ti zaŋm’ o nuu pa sara maligu biŋkɔbigu maa zuɣu ni din ni chɛ ka Naawuni deei li ka di leeg’ o daalahichi sanyoo sara maligu. 5Di nyaaŋa ka o kɔrigi nahu maa, ka Aduna bidibisi bɛn nyɛ maligumaaniba la zaŋ binʒim maa ti ti Yawɛ, ka zaŋ li mihi gili Yawɛ chirigibu shee suɣili maa dunol’ ni. 6Ka o shi sara maligu biŋkɔbigu maa ŋ-ŋmahiŋmah’ o, 7ka Aduna bihi bɛn nyɛ maligumaaniba maa mali buɣim, ka malimali dari viɛnyɛla niŋ buɣim maa ni. 8Ka Aduna bidibisi bɛn nyɛ maligumaaniba la zaŋ o ni ŋmahiŋmahi nim’ shɛŋa maa mini binzuɣu ni biŋkpam nti pa da’ shɛŋa din be buɣim maa ni la zuɣu sariasaria sara maligu bimbini maa zuɣu. 9Amaa di simdi ka o ti zaŋ kom paɣi namanama mini bimbiɛhi dina. Ka maligumaana zaŋ di zaa nyo buɣim sara maligu bimbini maa zuɣu, ka di leei bɛ ni zaŋdi sara shɛli nyɔri buɣim ka di nyom viɛl’ Yawɛ sani.
10Ka o sara maligu maa yi nyɛla piɛɣu bee bua, di simdi ka di nyɛla piɛlaa bee bulaa ŋun ka daŋa, 11ka o ti kɔrig’ o sara maligu bimbini la nuzaa polo Yawɛ tooni, ka Aduna bidibisi bɛn nyɛ maligumaaniba maa ti zaŋ ʒim kpaai vie sara maligu bimbini maa luɣilikam. 12Ka o ti ŋmahiŋmahi biŋkɔbigu maa n-tabil’ o zuɣu min’ o biŋkpam, ka maligumaana zaŋ li pa da’ shɛŋa din be buɣim maa ni la zuɣu sariasaria sara maligu bimbini maa zuɣu. 13Amaa di simdi ka o ti zaŋ kom paɣi namanama mini bimbiɛhi dina, ka chɛ ka maligumaana zaŋ di zaa nyo buɣim sara maligu bimbini maa zuɣu n-ti Yawɛ, ka di leei bɛ ni zaŋdi sara shɛli nyɔri buɣim ka di nyom viɛl’ Yawɛ sani la.
14Ka so yi yɛn zaŋ noombihi nyo buɣim mali sara ti Yawɛ, ŋun’ zaŋmila ŋmanʒiɛhi bee yiŋ’ ŋmambihi. 15Chɛ ka maligumaana zaŋ o ka sara maligu bimbini gbinna nti ŋmɛli ŋmaag’ o zuɣu, ka tɔɣi o ʒim bahi sara maligu bimbini luɣili zuɣu, ka zaŋ o nyo buɣim sara maligu bimbini maa zuɣu. 16Ka o ti yih’ o fiɛɣu min’ o kɔbiri bahi sara maligu bimbini maa wulimpuhili polo luɣ’ shɛli bɛ ni kpaari tampiligim bahiri la. 17O ti gbaam’ o kpiŋkpama n-darigi toog’ o, amaa o di darigi pirig’ o buyi zuɣu. Ka chɛ ka maligumaana zaŋ di zaa pa da’ shɛŋa din be buɣim ni la zuɣu sara maligu bimbini maa zuɣu n-nyo li buɣim, ka di leei bɛ ni zaŋdi sara shɛli nyɔri buɣim, ka di nyom viɛl’ Yawɛ sani la.
Currently Selected:
Lɛvinima 1: RLDB
Highlight
Copy
Compare
Share
Want to have your highlights saved across all your devices? Sign up or sign in
Red Letter Dagbani Bible © Bible Society of Ghana, 2011
