Jɔshua 7
7
Ɛkan tum alahichi
1Amaa Izraɛlnim’ daa birigiya zaŋ chaŋ binshɛŋa bɛ ni daa woligi ti Yawɛ la polo, dama Karimi bia Ɛkan ŋun daa nyɛ Zabidi yaaŋa, ka nyɛ Zɛra yaantibichee, ka yi Juda zuliya ni na la ni daa kpuɣi binshɛŋa bɛ ni daa woligi ti Yawɛ maa; ka Yawɛ suhu daa yiɣisi pam bahi Izraɛlnim’ zuɣu.
2Ka Jɔshua daa tim tuumba ka bɛ yi Jɛriko chaŋ Ai din daa miri Bɛtavɛn, ka be Bɛtɛl wulimpuhili polo la. O daa yɛli ba mi, “Chamiya ti puɣisi kaai tiŋ’ maa.” Ka tuumba maa daa chaŋ ti kaai Ai; 3ka labina ti yɛli Jɔshua, “Ainim’ bi yaɣ’ lala. Lala zuɣu di chɛ ka tɔbbihi maa zaa chaŋ, amaa chɛ ka tɔbbihi tusaayi bee tusaata laasabu chaŋ.” 4Dinzuɣu ka o daa chɛ ka tɔbbihi tusaata laasabu n-yi bɛ ni chaŋ; ka bɛn daa chaŋ maa ti ŋmaligi guui ka chɛ Ainim’ maa. 5Ka Ainim’ daa kari ba bɛ tiŋ’ maa dunol’ ni hal ti paai Shɛbarim n-daa ku bɛ ninvuɣ’ pihitanaayɔbu laasabu sɔŋ zolɔŋni. Ka Izraɛlnim’ baɣiri ni daa cheei kom, ka dabiɛm gbahi ba.
6Ka Jɔshua mini Izraɛl kpamba daa darigi chɛhi bɛ binyɛra, ka teei dɔni n-zaŋ bɛ nina kpa tiŋa Yawɛ Daalikauli Adaka maa tooni, ka kɔri taŋkpaɣu puɣi bɛ zuɣuri n-doya ni suhugarigu hal ni zaawuni. 7Ka Jɔshua daa yɛli; “Mbaye! Yaa n Duuma NAAWUNI, bɔzuɣu ka a daa zaŋ ti du Jɔɔdɛn Mɔɣili ŋɔ na? A zaŋ ti mi na ni a ti ti Amɔrinim’ ka bɛ ku ti? Ti yi di daa chɛ ka ti nini tiɣi Jɔɔdɛn yaɣili wulimpuhili polo la ka kpalim nimaani di di so. 8Yaa n Duuma, Izraɛlnim’ yi ŋmaligi guui ka chɛ ka ti dimnim’ nya ti kpaya, wula ka n lee lan yɛn yɛli? 9Dama Keenannim’ mini bɛnkam be tiŋgbɔŋ ŋɔ ni yi wum li, bɛ ni kana ti teei gil’ ti, ka kpihim ti birili dunia ŋɔ ni; ka di yi niŋ lala, wula ka a lee yɛn niŋ a yuli din galisi ŋɔ?”
10Ka Yawɛ daa bɔhi Jɔshua, “Bɔ n-niŋ ka a teei doya zaŋ a nina kpa tiŋa? Yiɣisima! 11Izraɛlnima n-tum alahichi; bɛ zaɣisila n ni zali ba zaligu shɛl’ la dolibu; ka kpuɣi binshɛŋa bɛ ni daa woligi ti Man’ Yawɛ la. Bɛ zu n-kpuɣ’ li pahi bɛ nɛma ni, ka ŋma ʒiri. 12Dinzuɣu ka Izraɛlnim’ bi tooi zaŋ bɛ nyɔri yo bɛ dimnim’ maa. Din chɛ ka bɛ ŋmaligi guui ka chɛ bɛ dimnim’ maa nyɛla, bɛmaŋmaŋ’ ni leei bɛ ni yɛm bahi shɛb’ yol’ la zuɣu. Ka yi yi bi yihi binshɛli yi ni kpuɣi maa yi kɔbili ni n-saɣim li, n ku lan be yi sani. 13Yiɣisima m-mali niriba maa ka bɛ be kasi. Yɛlim’ ba, Malimiya yimaŋa m-be kasi gu biɛɣu ni. Dama Yawɛ ŋun nyɛ Izraɛlnim’ Naawuni ŋɔ yɛliya, ‘Izraɛlnima, yi kpuɣi binshɛŋa bɛ ni woligi ti man’ Yawɛ ŋun nyɛ Naawuni ŋɔ la ka di be yi sani. Ka yi mi ku tooi zaŋ yi nyɔri yo yi dimnima, ka pa ni yi yihila lala bina maa yi kɔbili ni.’ 14Dinzuɣu biɛɣuni asiba, sa chɛ ka daŋ kam niriba yina ti zani tooni, ka Yawɛ ni ti yɛn pii dan’ shɛli niriba maa puuni sokam ni o malibu ni yirina ti zaana, ka Yawɛ ni ti yɛn yaai yili shɛlinim’ mi puuni doo kam ni yirina yinoyino ti zaani tooni. 15Ka ninvuɣ’ so ŋun kpuɣi binshɛŋa din nyɛ man’ Yawɛ dini maa, bɛ nyom’ o min’ o ni su binshɛɣukam zaa buɣim, o ni saɣim Yawɛ zaligu min’ o ni tum tuun’ shɛli n-dihi Izraɛlnim’ vi la zuɣu.”
16Ka Jɔshua daa daŋ yiɣisibu asiba n-zaŋ Izraɛlnim’ daŋ kam niriba na ti zaani tooni, ka Yawɛ daa yaala Juda zuliya. 17Ka o daa zaŋ Juda zuliya maa daŋ kam na ti zali, ka Yawɛ daa yaala Zɛra daŋ; ka o daa zaŋ Zɛra daŋ maa ni sokam ni o malibu zali, ka Yawɛ daa yaala Zabidi yiŋnima. 18Ka o daa zaŋ o yiŋnim’ dɔbba yinoyino zali, ka Yawɛ daa yaala Karimi bia Ɛkan ŋun daa nyɛ Zabidi mini Zɛra yaaŋa ka yi Juda zuliya ni na la. 19Di saha ka Jɔshua daa yɛli Ɛkan, “M bia, paɣimi Yawɛ ŋun nyɛ Izraɛlnim’ Naawuni ŋɔ, ka ti o jilima, ka yɛli ma a ni tum tuun’ shɛli, ka di sɔɣi ma shɛli.”
20Ka Ɛkan daa yɛli Jɔshua, “Yɛlimaŋli, n tum alahichi Yawɛ ŋun nyɛ Izraɛlnim’ Naawuni ŋɔ sani; N ni tum alahichi shɛli maa m-bɔŋɔ: 21N daa nyala Shiina binyɛr’ suŋ mini anzinfa kpila, ka di tibisim nyɛ kilɔgiram pirigili ni salin’ kpilli din mi tibisim nyɛ kilɔgiram pirigili ka n kɔre kpe di ni, ka n kpuɣ’ li n-zaŋ li ti pi tiŋa n suɣili ni ka anzinfa maa be di gbinni.”
22Ka Jɔshua daa tim tuumba ka bɛ zo n-chaŋ o suɣili maa ni nti shiri nya ka di pi tiŋa ka anzinfa maa be di gbinni. 23Ka bɛ daa yihi li suɣili maa ni n-zaŋ li na ti ti Jɔshua mini Izraɛlnim’ zaa, ka bɛ daa zaŋ li sɔŋ Yawɛ tooni. 24Ka Jɔshua mini Izraɛlnim’ zaa daa zaŋ Zɛra yaaŋa Ɛkan maa mini anzinfa ni binyɛrigu maa ni salin’ kpilli maa ni o bidibisi min’ o bipuɣinsi ni o niɣi ni o bunsi ni o piɛri ni o suɣili ni o ni su binshɛɣukam zaa n-chaŋ Akɔr Vinvamli ni. 25Ka Jɔshua daa bɔhi Ɛkan, “Bɔzuɣu ka a bo wahala ti ti? Yawɛ ni ti a wahala zuŋɔ dabisili ŋɔ.” Ka Izraɛlnim’ zaa daa lab’ o kuɣa, ka lab’ o malibu gba kuɣa, ka niŋ buɣim nyo ba. 26Ka bɛ daa kahi kuɣa m-pa Akan zuɣu hal ti duhi li sɔŋ, ka di na kul do nimaani hal ni zuŋɔ. Dinzuɣu ka bɛ daa boli nimaani yuli Akɔr Vinvamli#7.26 AKƆR VINVAMLI: Hiburuli ni Akɔr gbinni nyɛla “Wahala”. Dinzuɣu Akɔr Vinvamli nyɛla, “Wahala Vinvamli”. hal ni zuŋɔ.
Ka Yawɛ suhuyiɣisili maa daa naanyi maai.
Red Letter Dagbani Bible © Bible Society of Ghana, 2011