Jɔshua 15
15
Jɔshua ni zaŋ tiŋgban’ shɛli ti Juda zuliya
1Bɛ ni daa zaŋ tiŋgban’ shɛli ti Juda zuliya piligu shee daa zaŋ kpala nudirigu polo m-mali hal ti paai Zin mɔɣu ni n-zaŋ lala hal ti paai Ɛdom tintariga. 2Nudirigu polo tintariga maa daa kpuɣila Teeku Kpiŋ la tariga mini di kulinol’ ni n-zaŋ kpa nudirigu polo. 3Di daa zaŋ kpala nudirigu polo maa hal ti paai Akirabim n-zaŋ nimaani hal ti paai Zin n-kul zaŋ kpa nudirigu polo maa hal ni Kadɛshibarinia n-zaŋ ti gari Hɛzirɔn m-mali ti paai Adda ŋ-ŋmaligi chaŋ Karika 4n-gari chaŋ hal ni Azimɔn n-zaŋ lala hal ti paai Ijipti kulibɔŋ m-mali hal ti paai di tariga teeku ni. Yi nudirigu polo tiŋgbani tariga n-yɛn bala. 5Ka wulimpuhili polo tiŋgbani tariga yɛn kpuɣila Teeku Kpiŋ shee zaŋ hal ni Jɔɔdɛn Mɔɣili noli.
Ka nuzaa polo tiŋgbani tariga mi piligi Yalim Teeku maa ni Jɔɔdɛn Mɔɣili noli shee 6n-zaŋ hal ni Bɛtihɔgila n-yi nimaani zaŋ gari hal ti paai Bɛtaraba nuzaa polo. Ka di tariga maa zaŋ lala hal ni Rubin bia Bɔhan kuɣili la gbini; 7ka di tariga maa lan yi Akɔr Vinvamli ni n-zaŋ hal ti paai Dɛbir n-zaŋ kpa nuzaa polo nti ŋmaligi kpa Giligal polo yaɣ’ shɛli polo din tuhi Adumim din daa be vinvamli maa nudirigu polo la. Ka daa lan kpuɣi nimaani n-zaŋ hal ni Ɛnshɛmɛsh kulibɔna ni m-mali hal ti paai Ɛnrɔgɛl. 8Ka yi nimaani hal ti gari Hinnom Bidibisi Vinvamli ni zaŋ lab’ Jɛbusi nudirigu polo, Jɛrusalɛm m-bala n-lan kpuɣi nimaani hal ti du zo’ shɛli din do Hinnom Vinvamli wulinluhili polo la zaŋ lab’ Rɛfaim Vinvamli tariga nuzaa polo. 9Ka tintariga maa daa lan kpuɣi zoli maa zuɣu n-zaŋ hal ti paai Nɛfitɔa kulibɔna n-yi nimaani zaŋ hal ti paai tiŋ’ kar’ shɛŋa din ʒi Ɛfurɔn Zoli zuɣu la. Ka di daa lan yi nimaani n-chaŋ ti ŋmaligi n-zaŋ hal ti paai Baala bee Kiriatijiarim. 10Ka di daa zaŋ chaŋ ha nti lan gili Baala wulinluhili polo n-zaŋ hal ti paai Ɛdom zoya ni n-zaŋ chaŋ hal ti baɣisi Jiarim Zoli nuzaa polo gari bee din nyɛ Chɛsalɔn la, ka di lan zaŋ nimaani hal ti paai Bɛtishɛmɛshi n-gari chaŋ ti baɣisi Timna gari. 11Ka lan zaŋ nimaani chaŋ hal ti du Ɛkurɔn nuzaa polo kuŋkuni. Ka di tariga maa daa ŋmaligi chaŋ hal ni Shikɛrɔn n-zaŋ nimaani hal ti baɣisi Baala Zoli gari, ka lan zaŋ nimaani hal ti paai Jabiniil; ka di daa naanyi kana ti paai di tariga teeku ni. 12Wulinluhili polo tiŋgbani maa tariga daa nyɛla Mɛditirɛniɛn Teeku la. Tintariga bɔbili maa n-daa gili Juda zuliya maa niŋ sunsuuni.
Kalɛb ŋme n-deei Hiburɔn mini Dɛbir
(Zuɣulaannima 1.11-15)
13Naawuni ni daa zali Jɔshua shɛm zuɣu daa chɛ ka o ŋmaai Juda zuliya la tiŋgbani yaɣ’ shɛli polo bɛ ni booni Hiburɔn la ti Jɛfune bia Kalɛb. Kiriatariba, di gbinni nyɛla Hiburɔn. (Ariba n-daa nyɛ Anakinim’ yaba) 14#Zuɣ 1.20 Ka Kalɛb daa ŋme n-kari Anaki bidibis’ ata bɛn daa nyɛ: Shɛshai mini Ahiman ni Talimai bɛn daa nyɛ ŋun’ Anaki zuliya la bahi. 15Ka Kalɛb daa lan yi nimaani chaŋ ti lu Dɛbirinim’ zuɣu. Dɛbir tuuli yuli n-daa nyɛ Kiriatisɛfa. 16Ka Kalɛb daa yɛli, “Ninvuɣ’ so ŋun ŋme n-nyaŋ Kiriatisɛfanim’ ka deei bɛ tiŋ’ maa, n ni zaŋ m bipuɣiŋga Akisa ti o paɣipini.” 17Ka Otiniɛl ŋun daa nyɛ Kalɛb tizo Kɛnaz bidibiga la daa chaŋ ti tuhi deei tiŋ’ maa; ka Kalɛb daa shiri zaŋ o bipuɣiŋga Akisa maa ti o ka o niŋ o paɣa. 18Bɛ ni daa ti kulisi Akisa na dahin’ shɛli, ka Otiniɛl daa kpam’ o jaande ni o suhim’ o ba tiŋgbani palo. Ka Akisa daa ti sheeg’ o buŋ’ zuɣu na; ka Kalɛb bɔh’ o, “Bɔ ka a bɔra?” 19Ka o garigi yɛl’ o, “Tim ma pini. A ni zaŋ Nɛgɛb tiŋgbani n-ti ma la zuɣu, tim ma kulibɔna din kom zɔri gba pahi.” Ka Kalɛb daa zaŋ zuɣusaa polo mini naɣiliŋga ni kulibɔna ti o pahi.
Juda zuliya tinsi ni nyɛ shɛm
20Juda zuliya ni daa deei tiŋgban’ shɛli ni bɛ su li m-bɔŋɔ. 21Juda zuliya ni daa su fɔntiŋ’ kar’ shɛŋa daa bela nudirigu polo ha zaŋ kpa Ɛdom tintariga polo. Tinsi maa n-nyɛ Kabiziil mini Ɛda ni Jagur 22ni Kina ni Dimɔna ni Adada 23ni Kɛdɛshi ni Hazɔr ni Itinan 24ni Zif ni Tɛlɛm ni Biilɔt 25ni Hazɔrihadata ni Kiriɔtihɛzirɔn (bee Hazɔr) 26ni Amam ni Shɛma ni Molada 27ni Hazarigada ni Hɛshimɔn ni Bɛtipɛlɛt 28ni Hazarishual ni Bɛrishiiba ni Biziɔtia 29ni Baala ni Iim ni Ɛzɛm 30ni Ɛlitolad ni Chɛsil ni Hɔrima 31ni Zikilag ni Madimanna ni Sansanna 32ni Lɛbaɔt ni Shilihim ni Ain ni Rimɔn: ka di zaa kalinli yiɣisi fɔntiŋ’ kara pihitayinika m-pahi di tiŋkpansi zuɣu.
33Fɔntiŋ’ kar’ shɛŋa din daa be zolɔna ni n-nyɛ: Ɛshitaol mini Zɔra ni Ashina 34ni Zanɔa ni Ɛnganim ni Tapua ni Ɛnam 35ni Jarimut ni Adulam ni Soko ni Azɛka 36ni Shaaraim ni Aditaim ni Gɛdɛra ni Gɛdɛrɔtaim: ka di zaa kalinli yiɣisi fɔntiŋ’ kara pinaanahi m-pahi di tiŋkpansi zuɣu.
37Tin’ shɛŋa din yuya dolina ŋɔ gba daa beni. Dina n-nyɛ: Zɛnan mini Hadasha ni Migidaligad 38ni Dilian ni Mizipa ni Jokitiɛl 39ni Lakishi ni Bɔzikat ni Ɛgilɔn 40ni Kabɔn ni Lamam ni Chitilishi 41ni Gɛdɛrɔt ni Bɛtidagɔn ni Naama ni Makɛda: ka di zaa kalinli yiɣisi fɔntiŋ’ kara pinaayɔbu m-pahi di tiŋkpansi zuɣu.
42Tin’ shɛŋa din yuya dolina ŋɔ gba daa beni. Dina n-nyɛ: Libina mini Ɛta ni Ashan 43ni Ifita ni Ashina ni Nɛzib 44ni Kɛila ni Akizib ni Marɛsha ka di zaa kalinli yiɣisi fɔntiŋ’ kara awɛi m-pahi di tiŋkpansi zuɣu.
45Ɛkurɔn mini di fɔndi ni di tiŋkpansi gba daa beni Ɛkurɔn zaŋ hal ti paai Mɛditirɛniɛn Teeku noli daa nyɛla 46fɔntiŋ’ kara mini fɔndi zaa din baɣi Ashidɔd la m-pahi di tiŋkpansi zuɣu.
47Ashidɔd mini di fɔndi ni di tiŋkpansi ni Gaza mini di fɔndi ni di tiŋkpansi daa zaŋmi hal ti paai Ijipti kulibɔŋ mini Mɛditirɛniɛn Teeku noli tintariga la.
48Zoya zuɣu tinsi mi n-daa nyɛ: Shamir mini Jatir ni Soko 49ni Danna ni Kiriatisɛfa (dina n-nyɛ Dɛbir) 50ni Anab ni Ɛshitɛmo ni Anim 51ni Goshɛn ni Holɔn ni Gilo: ka di zaa kalinli yiɣisi fɔntiŋ’ kara piniyini m-pahi di tiŋkpansi zuɣu.
52Tin’ shɛŋa din pahi n-daa nyɛ Arab mini Duma ni Ɛshan 53ni Janim ni Bɛtitapua ni Afɛka 54ni Humta ni Kiriatariba (Hiburɔn m-bala) ni Ziɔr: ka di zaa kalinli yiɣisi fɔntiŋ’ kara awɛi m-pahi di tiŋkpansi zuɣu.
55Ka tin’ shɛŋa din pahi n-daa lan nyɛ: Maɔn mini Kamɛl ni Zif ni Juta 56ni Jɛziriil ni Jokidiyam ni Zanɔa 57ni Kain ni Gibia ni Timna: ka di zaa kalinli yiɣisi fɔntiŋ’ kara pia m-pahi di tiŋkpansi zuɣu.
58Ka tin’ shɛŋa din gba lan pahi n-daa nyɛ: Halihul mini Bɛtizur ni Gɛdɔr 59ni Maarat ni Bɛtanɔt ni Ɛlitɛkɔn: ka di zaa kalinli yiɣisi fɔntiŋ’ kara ayɔbu m-pahi di tiŋkpansi zuɣu.
60Kiriatibaal (Kiriatijiarim m-bala) mini Raba gba daa beni: di daa nyɛla fɔntiŋ’ kara ayi m-pahi di tiŋkpansi zuɣu.
61Tin’ shɛŋa din gba daa be yɔɣu ni la n-daa nyɛ: Bɛtaraba mini Midin ni Sɛkaka 62ni Nibishan ni Yalim Tiŋ’ la ni Ɛngɛdi: ka di zaa kalinli yiɣisi fɔntiŋ’ kara ayɔbu m-pahi di tiŋkpansi zuɣu.
63 #
Zuɣ 1.21; 2 Sam 5.6; 1 Yɛl 11.4 Amaa ka Judanim’ daa bi tooi kari Jɛbusinim’ bɛn daa pun be Jɛrusalɛm la bahi. Dina n-chɛ ka Jɛbusinim’ mini Judanim’ na kul laɣim be Jɛrusalɛm hal ni zuŋɔ.
Red Letter Dagbani Bible © Bible Society of Ghana, 2011